ဗညာပိုၚ်၊ ဂျူလိုၚ် ၁၀၊ ၂၀၂၀

သဘၚ်သၟာန်သွဟ်လိက် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် မရနုက်ကဵု (၂၁) ဝါဏံဂှ် ဂိတုဒုတိယဒ္ဂိုန် (၇) မံက်မ္ဂး သွဟ်အာပွိုၚ်ဍုၚ်ညးကဵုညးရရောၚ် ညးအုပ်ကာ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် နာဲမန်ရာဇာ ဟီုရ။
“ပ္ဍဲ (၁၉) ပွိုၚ်ဍုၚ်ဂှ်တှေ် ပွိုၚ်ဍုၚ်သွဟ်ဂှ် နွံ (၁၄) ပွိုၚ်ဍုၚ်၊ ဟွံသွဟ်ဂှ် နွံ (၅) ပွိုၚ်ဍုၚ်ရ။ သွဟ်ဂှ် ဒုတိယဒ္ဂိုန် (၇) မံက် အခိၚ်ဒေါဝ်တ္ၚဲ (၁၂) နာဍဳ သွဟ်တုပ်တုပ်ဖအိုတ်ဏောၚ်။ နူကဵုဗဟဵုဏံ ပလံၚ်ဗစိုပ်ကဵု ပွိုၚ်ဍုၚ်တံပုစ္ဆာရ။ တုဲတှေ် ဗဟဵုတံရ ကောပ်ကာဲကဵု ပွိုၚ်ဍုၚ်တုဲ တၞးလိက်သွဟ်တံဂှ် ပိုဲတံ သီဖျဴနၚ်ဏောၚ်။ တုဲတှေ် ပိုဲတံစၟတ် ပ္ဍဲကဵုဘာကျာ်သာသနာ (၂၅၀၀) ရ” သာ်ဝွံ နာဲမန်ရာဇာ ဂးရ။
ပွိုၚ်ဍုၚ်သွဟ်လိက်တံဂှ် မွဲပွိုၚ်ဍုၚ်မ္ဂး ထံက်ပၚ်အာကဵုသြန် (၁၀) ကိုဋ္ဋ်တုဲ ပ္ဍဲကဵုသွဟ်လိက်ကီု စှေ်ဘာတံကီု ညံၚ်သ္ဂောံပြေပြံၚ်အာဂှ် နူကဵုအလုံဒေသရးမန်တံ ပ္တိုန်ထ္ၜးအာကဵု အလဵုအသဳတံရရောၚ် ဂွံတီကေတ်ရ။
“စှေ်ဘာဂှ်တှေ် ပွိုၚ်ဍုၚ်ညးကဵုညး စှေ်ဏောၚ်။ အခိၚ်စှေ်ဘာတှေ် လာပ်သြန်တံကီု၊ စၟတ်တဲတံကီု၊ တဆိပ်ကြာတံကီုဂှ် နူကဵုဗဟဵုဏံ ကေတ်အာကဵု တာလျိုၚ်ဖအိုတ်ရ” သာ်ဏံ နာဲမန်ရာဇာ ဟီုရ။
ပ္ဍဲကဵုအလုံဒေသရးမန်ဂှ် သ္ဂောံသွဟ်အာ တန်အဘိဓရ်၊ တန်ဝၚ်ဍုၚ်ဟံသာဝတဳ၊ ဝၚ်ဍုၚ်သုဝဏ္ဏဘုံ၊ ဝၚ်ဍုၚ်မုဟ်တၟအ်၊ ဝၚ်လိက်ပတ်မန် ကေုာံ လိက်အခိုက်ကၞာမန်တံဂှ် ဂွံတီကေတ်ရ။
“ကၠာတေံ ပိုဲချပ်လဝ်ဂှ် ဟွံဒှ်ရလေဝ်၊ ညးတံကၠုၚ်ဖ္တိုက်ဖၟောဝ် ညံၚ်ဂွံဒှ်ဂှ်ကၠောန်အာ လ္ပဒေါံထောံ၊ အဵုဂှ်ရ ကိစ္စသွဟ်လိက်ဂှ် ဒှ်အာရ။ တုဲပၠန် အခိၚ်ဘာတန်ပံက်တုဲမှ သွဟ်လေဝ်၊ အခိၚ်သွဟ်ဂှ်တှေ် ညံၚ်ဂွံဗၠးအာဒုဟ် ပရေၚ်ထတ်ယုက်ဂှ် သွဟ်အာဏောၚ်။ (၁၀) ပွိုၚ်ဍုၚ် ဒှ်သွဟ်ဖအိုတ်တှေ် တုပ်သၟဟ်ညးသ္ကံဂှ် ခိုဟ်ရလေဝ်” သာ်ဝွံ ညးရေၚ်တၠုၚ်ဖဵု ဂကောံလိက်ပတ်မန် ပွိုၚ်ဍုၚ်ရေဝ် ကျာ်ဇၞော်အ္စာ မေဓာဝဳ ဟီုမြော်ရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ဂှ် နူကဵုသၞာံ (၁၃၆၀) တေံ ဒက်ပ္တန်ကၠုၚ်လဝ်တုဲ လၟုဟ်ဝွံ နူကဵုပွိုၚ်ဍုၚ်နာနာ (၁၉) ပွိုၚ်ဍုၚ်တံ ပါလုပ်ချဳဓရာၚ်မံၚ်ရောၚ် ဂွံတီကေတ်ရ။