ဗညာပိုၚ်၊ ဂျူလာၚ် ၂၉၊ ၂၀၂၀
ဌာန်ဒေသ မာၚ် (ဗမ်) ခတိုဟ်ဒၟံၚ် ပွဳပွူကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် လၟုဟ်ဝွံ ညးတၠကၠအ်တံ သ္ဂောံအာကၠအ်ဂှ် ရံၚ် ဒၟံၚ်အကာဲအရာဖိုဟ်ရောၚ် ညးတၠကၠအ်မွဲတၠ ဟီုရ။
‘ရံၚ်အကာဲအရာ ဍုၚ်ကွာန်တုဲ ဠဍုၚ်ကွာန်ၜိုဟ်သြိုဟ်တှေ် ကလေၚ်အာတှေ် အာပၠန်ရ၊ တုဲပၠန် ရာန်လဝ် လှုဲအိုတ် လဝ်တှေ် အောန်မံၚ်စိုတ်ကီုရ။ ရန်တၟံလဝ် တဵုကၠအ်ဂှ်ဂှ် မွဲအာယုက်ရလေဝ်၊ လၟုဟ်ဏံ ကၠအ်ဂှ် ဟွံဂံၚ်အာဏီ ထောံလဝ်မွဲလစုတ်ကၠာရ’ သာ်ဏံ ညးကၠောန်ဒၟံၚ်ကၠအ် ပ္ဍဲဒေသဝါဂြၚ်အေက် ကောန်ကွာန်ဟံဂါမ် နာဲမျဵုထောန် ဟီုရ။
စပ်ကဵုကိစ္စ မာၚ် (ဗမ်) ခတိုဟ်ဒၟံၚ် ပွဳပွူကွာန်ဌာန်ဇၞူ ပွိုၚ်ဍုၚ်ဍာ်ဗုတံဂှ် အလဵုအသဳတံလေဝ် သ္ဂောံဟီုမွဲသာ်ဂှ် ဟွံမွဲတုဲ သ္ၚိတ်ဒၟံၚ်အတိုၚ်ဂှ်ရရောၚ် သကိုပ်အုပ်ဓုပ်ကွာန် (ဂကောံကွာန် ၄ ကွာန်) ဌာန်ဇၞူ နာဲတေန်သာန် ဟီုရ။
‘မၞိဟ်ဇၞော်ဇၞော်ကဵု မၞိဟ်ဇၞော်ဇၞော်တံဂှ် တက်လဝ်ကျာတုဲတှေ် လၟုဟ်ဂှ် ဍေံသ္ၚိတ်မံၚ်ရ၊ တုဲပၠန် လ္ပါ်အလဵုအသဳတံဂှ်လေဝ် မုဍေံတံ ဟွံဟီုပုဟ် သ္ၚိတ်မံၚ်အတိုၚ်ဂှ်ရ” သာ်ဝွံ ညးဂးရ။
တုဲကၠုၚ်ဂိတုမေ (၄) ဂှ် ပ္ဍဲဒေသဝါဂြၚ်အေက် ပွဳပွူကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် ညးတၠကၠအ်မွဲတၠ ထပ်လိုန်ဒးလဝ် မာၚ် (ဗမ်) မွဲတၠပၠန်တုဲ ကအ်ဇိုၚ်လ္ပါ်ပုၚ်ဂှ် မ္ဒးပိုတ်သ္ကုတ်အာဂှ်လေဝ် ဓမံက်ထ္ၜးလဝ် ပ္ဍဲကဵုပရိုၚ်တံဂှ် ဂွံတီကေတ်ရ။
ကောန်ကွာန်ဌာန်ဇၞူ ညးတၠကၠအ် မိသောဲဂှ် ‘ဟွံဂံၚ်အာဏီလေဝ် ဖေက်ဒၟံၚ်ဖိုဟ်ရ ဒးဒုၚ်ဆောံဒၟံၚ် ဒၞာဲဂှ်ရ။ ဒြပ်ဇကု တှေ် နူစကၠောန်ဗဒှ်လဝ်ဂှ် စမွဲအာယုက်ရလေဝ်၊ လဝဲါဒှ်သတ်ပ္ကဴမှ ဒှ်အာဗီုဏံတှေ် အောန်စိုတ် စိုတ်ဟွံခိုဟ်ရ။ ပိုဲတံဂှ် ပတှေ်စကၠအ်ရ’ သာ်ဏံ ဟီုထ္ၜးလဝ်ကဵု ဌာန်ပရိုၚ်မန်ရ။
မာၚ် (ဗမ်) စခတိုဟ်ကၠုၚ် ပ္ဍဲဒေသကွာန်ဌာန်ဇၞူ ပွိုၚ်ဍုၚ်ဍာ်ဗုဂှ် စတံနူကဵု သၞာံ (၂၀၁၇) စဵုကဵုစိုပ် သၞာံ (၂၀၂၀) တုဲ ညးဒေသလိုန်ဒး မာၚ် (ဗမ်) လၟေၚ်အဆက်က် ဒေသပွဳပွူဗဟဵု ဗော်ဍုၚ်မန်တၟိကီု ဒေသပွိုၚ်ဍုၚ်ဍာ်ဗုကီု သီုဖအိုတ် (စုတိ-ဒးဝပ်) ဂှ် ဒးလဝ် (၁၆) တၠရ။
