ဗညာပိုၚ်၊ အဝ်ဂါတ် ၁၄၊ ၂၀၂၀

သွက်ပေဲါရုဲမာဲ သၞာံ (၂၀၂၀) ဏံ ပ္ဍဲတိဍာ်သၟဝ်တဲဗော်ဍုၚ်မန်တၟိဂှ် နူကမ္မယှေန်ပေါဲရုဲမာဲတံ အာကေတ်စရၚ်ဂှ် ဗော်ဍုၚ်မန်တၟိ ဟွံကဵုလဝ်အခေါၚ်ကၠာလေဝ် နကဵုဂကောံမဟာဇန်တံ ကံက်မ္ဂး ကဵုအခေါၚ်ရောၚ် ညးတာလျိုၚ် ဗွိုၚ်ဍုၚ် ကမ္မတဳကေၚ်ကာ (ဗဟဵု) နာဲဗညာလဴ ဟီုရ။
‘ရန်ကဵုပရေၚ်ဂီုကၠီုကီု ပရေၚ်အာကၠုၚ်ဝါတ်တုဲတှေ် လ္ပါ်ကၞောတ်ၜဳရေဝ်တံ၊ ဗွိုၚ်ဗဟဵုတံ၊ လ္ပါ်ပွိုၚ်ဍုၚ်ဍာ်ဗု ပွဳဗွိုၚ်ခရိုၚ် ထဝါဲဂှ်တှေ် ဆေၚ်စပ်ကဵုကမ္မယှေန်တံ အာကေတ်စရၚ်ဂှ် ပိုဲတံဟွံကဵုလဝ်အခေါၚ်ပုဟ်။ နူဂကောံအကြာ ဗီုဂကောံ CSO တဏံ၊ ဂကောံသၟတ်တဏံ ညးတံဘိုၚ်ရေၚ်တၠုၚ် အာကေတ်စရၚ်မာဲ ပ္ဍဲညးဍုၚ်ကွာန်တုဲတှေ် ညးတံဗစိုပ်ကဵု လ္ပါ်ကမ္မယှေန်တဏံဂှ်တှေ် ပိုဲတံကဵုလဝ်အခေါၚ်နွံမံၚ်ရ’ သာ်ဏံ သ္ဂးရ။
အပ္ဍဲဒေသ သၟဝ်ပရေၚ်အုပ်ဓုပ် ဗော်ဍုၚ်မန်တၟိ (ကၞောတ်ၜဳရေဝ်) ဂှ် အခေါၚ်ညးဍုၚ်ကွာန်တံ သ္ဂောံအာစုတ်မာဲဂှ်ကီု သ္ဂောံအာစုတ်စရၚ်တံဂှ်လေဝ် ဗွဲမသၠးၜး ကဵုလဝ်အခေါၚ်နွံရရောၚ် ညးဆက်ဟီုရ။
ပ္ဍဲတိဍာ်သၟဝ်တဲဗော်ဍုၚ်မန်တၟိ ကၞောတ်ၜဳရေဝ်ကဵု ဗွိုၚ်ဗဟဵုတံဂှ် ဟိုတ်နူကဵု အကာဲအရာ ရုၚ်မာဲသ္ၚောဲဒၟံၚ်ကီု၊ ပရေၚ် အာကၠုၚ်ဝါတ်ဒၟံၚ်တုဲ ညးဍုၚ်ကွာန်ဂမၠိုၚ်တံ သ္ဂောံအာစုတ်မာဲဂှ် ဒှ်ကၠုၚ်ဒၟံၚ်အခက်ခုဲရ။
‘အကာဲအရာ ရုၚ်မာဲလေဝ် သ္ၚောဲမံၚ်၊ အာကၠုၚ်လေဝ် ဝါတ်ဂါတ်မံၚ်တှေ် ညးတံ ဂွံကၠုၚ်စုတ်မာဲဂှ် ဒှ်အခက်ခုဲရ။ လ္တူညးဍုၚ်ကွာန်တံ အာကၠုၚ်ဝါတ်ဂါတ်မံၚ်ဂှ် ဂကောံ CSO တံကီု၊ ဂကောံမဟာဇန်တံ ယဝ်ဘိုၚ်ရေၚ်တၠုၚ်ကဵု ဗီုပြၚ်စုတ်မာဲကီု ဗီုပြၚ်ဂွံပလံၚ်ဒၞါဲရုၚ်မာဲတေံမာန်တှေ် ဒှ်ဂုဏ်ဖဵုအရၚ်ညးတံဏောၚ်ရ’ သာ်ဝွံ နာဲဗညာလဴ ဆက်ဟီုထ္ၜးရ။
တုဲကၠုၚ်ပေဲါရုဲမာဲ အလန်ပထမ၊ အလန်ဒုတိယတေံဂှ် ဟိုတ်နူဗော်ဍုၚ်မန်တၟိ ဟွံဂွံထ္ပက်လဝ် လိက်က သုက်တၚ်တုပ်စိုတ်ဒေံါပန်ပှော် (NCA) တုဲ ညးဍုၚ်ကွာန်တံ ပရေၚ်ကံက်စရၚ်ကီု၊ ပရေၚ်စုတ်မာဲကီုဂှ် ဟွံဂွံကၠုၚ်အခေါၚ်ရ။