မာံသုခ၊ အဝ်ဂါတ် ၁၂၊ ၂၀၂၀

ဘာကောန်ဂကူမန် မၞုံဒေသလှာဒကှ်ဝွံ တုဲကၠုၚ်စၟတ်တ္ၚဲ 15.7.2020 ဂှ် စပံက်ကၠုၚ်ဘာတုဲ သၞောတ်ပံက်ဘာ ပ္ဍဲ အခိၚ်ယဲ covid 19 ဏံ ကွးဘာတအ် ဒးမံၚ်ခြာ (၃) ပေဂှ်ကီု၊ ဒးစုတ်ယာတ်ဂရောပ်ပါၚ် (Mark) ဒးကြာတ်တဲ အတိုၚ်မဖျေံလဝ် ဒးမၚ်မွဲဒ္ဂေတ်ဗက်အာမံၚ်ဂှ် ဒှ်တၚ်ခက်ခုဲကဵု အ္စာဘာ၊ ကွးဘာတအ် နွံဂၠိုၚ်မံၚ်ရောၚ် အ္စာဘာတအ်ဟီုရ။
‘တၚ်ခက်ခုဲဂှ်တှေ် ဒၞာဲကြာတ်တဲ ဗီုကဵုဍေံတအ် ဟွံတီပုဟ်လေဝ် အတိုၚ်ပၟိက်စိုတ်ဍေံကြာတ်ဏောၚ်၊ တုဲတှ် အခိၚ် ဗ္တောန်လိက်ဂှ်အောန်စှေ်၊ မုပရောတှေ် ကွးဘာတအ်လုပ်တိတ် ဒးကြာတ်မံၚ်တဲတှေ် ဒးမၚ်မံၚ်ဍေံတအ် မွဲအခိၚ်ကဵုမွဲအခိၚ် ဍေံအောန်စှေ်၊ ဍေံမိက်ဂွံကျာတ် (ခက်ခုဲ) နူကဵုသၞောတ်တြေံညိဏး၊ မုပရောတှေ် မာတ်မုက်တုဲမှ ဗတောန်လိက်တှေ် ကွးဘာတအ် ဍေံတအ် မၞိဟ်ဍောတ်ဍောတ်တှေ် ဒဵုကဵုမံၚ် ဍေံဂွံယီု ဟလဲဟလဲလးလးဂှ် ဍေံဟွံဒှ်လေဝ်ဏး’ သာ်ဏံ အ္စာဘာတန်လ္ဒောဝ် ကွာန်ကုန်ဗ္ဒဝ် နာဲဝၚ်မန် ဟီုရ။
အတိုၚ်စေဝ်ပၞောန်တိုန်ဘာ အခိၚ်ယဲကိုဝ်ဝေဒ် (၁၉) ဂှ်မ္ဂး ဒးမံၚ်ခြာ မၞိဟ်ကောံဂၠိုၚ်ဟွံဂွံတုဲ ပ္ဍဲဘာကွး ဘာတအ် မံၚ်ဟွံရုံဂပ် ကွးဘာတအ် ဂွံဗ္တောန်လိက်မၞိဟ်စုၚ်ဂှ် အ္စာဘာတအ် အာတ်အရီုဗၚ် ဒၞာဲဘာသၚ်တအ်တုဲ ဒးပါ်ဗ္တောန်ကၠုၚ်မံၚ်၊ ကွးဘာတအ် ကၟာတ်ပါၚ်ဂၠိုၚ်လောန်အာမ္ဂး သီုဒးဂွိၚ်ကဵု ပရေၚ်ထတ်ယုက်သွက်ဍေံတအ် ရောၚ် သ္ဂးရ။
‘လဆောဝ်ကွးဘာတအ် ဍေံအာတ်မိက်ကၠုၚ်နွံမံၚ် အဝ်-အ္စာ အ္စာၝောံ ပိုဲတအ် ပဟွံမာန်ရ၊ က္တဴကွေံ ကဵုအခေါၚ်ဟလောတ်မွဲစုတ်ဏး၊ မုဏး သွက်ကွးဘာတအ်တှေ် ဟွံပြေပြံၚ် ဒှ်တၚ်ခက်ခုဲ မုပရောတှေ် ကောန်ၚာ်ဏောၚ်တှေ် ဒဵုကဵုဍေံဂွံအေၚ်မံၚ် မၞိဟ်ဇၞော်ဇၞော်ဂှ် ဍေံဒှ်ဟွံမာန် အဲညာတ်ဟဂှ်’ သာ်ဏံ ဂအုပ်ဘာ ကွာန်ကအ်အၚ်ထဝ် နာဲဗညာ ရဲမန် ထပ်ဟီုထ္ၜးရ။
စပ်ကဵုကပေါတ်စဵုဒၞာဲယဲ ကိုဝ်ဝေဒ် (၁၉) ဂှ် သွက်ဂွံစကာအာ ပ္ဍဲအခိၚ်ပံက်ဘာဏံ နူဌာနပညာပါ်ပရအ်ကဵုလဝ် မပ္တံ ယာတ်ဂရောပ်ပါၚ်၊ ကပေါတ်စဵုဒၞာမုက် ဗံၚ်ကြာတ်တဲတအ် နွံကီုလေဝ် ဟိုတ်နူဒးသုၚ်စောဲမံၚ်လၟိုန်တ္ၚဲတုဲ သုၚ်စောဲဟွံရုံဂပ်၊ ဘာလ္ၚဵု ကြပ်အိုတ်မံၚ်လေဝ်နွံရ။
ဗီုပွိုၚ်ဍုၚ်လှာဒကှ်ကီု ဒၞာဲဒေသဩဇာဗော်ဍုၚ်မန်တၟိတဴ ဘာကောန်ဂကူမန် မၞုံဒေသကၞောတ်ၜဳရေဝ်၊ ခရိုၚ်ထဝဲါ ပွိုၚ်ဍုၚ်ဍာ်ဗု ကျာ်ပိတအ် ပံက်ကၠုၚ်ဘာနွံတုဲ ဒးဒ္ဂေတ်ဗက် သၞောတ်ပရေၚ်ထတ်ယုက်ကီုရ။