ပ္ဍဲကာလလၟုဟ် ဟိုတ်နူကဵုဒှ်မံၚ်ယဲကိုဝ်ဝေဒ် (၁၉) ဂှ်ရ ကောန်သၟိၚ်ဗြဴလ္ၚဵုတအ် ဒှ်အခက်ခုဲတုဲ ပြံၚ်လှာဲအာကမၠောန်လေဝ်နွံမံၚ်ကီုဂှ် ကောန်သၟိၚ်ဗြဴ မိမဥ္ဇူ ဟီုသာ်ဝွံရ။

“ကောန်သၟိၚ်ဗြဴလ္ၚဵုဂှ်တှ်ေ ပြံၚ်အာကမၠောန် ကမၠောန်မ္ၚးနွံတှ်ေကၠောန်၊ ဂွံတိတ်အာနူဘဝကောန်သၟိၚ်ဗြဴဂှ်ဟွံသေၚ်။ ကာလလှ်ေပေါဲဂွံတှ်ေ ကလေၚ်လုပ်ဇာတ်ပၠန်” သာ်ဝွံ ကောန်သၟိၚ်ဗြဴမွဲတၠ မိမဥ္ဇူ ဂးရ။

လၟုဟ်ဟိုတ်နူကဵုယဲဏံ ဟွံဂွံလှ်ေပေါဲဂှ်မွဲသာ်တုဲ ကာလကလေၚ်လှ်ေပၠန်မ္ဂး လ္တူကောန်သၟိၚ်၊ ကောန်သၟိၚ်ဗြဴ၊ သၟာကမၠောန်တံသီုဖအိုတ်ဂှ် အ္စာဇာတ်တအ် လ္ပနုက် စရိတ်ဂၠိုၚ်ဂှ်လေဝ် ညးတံအာတ်မိက်လဝ်ရ။

“ဒှ်မာန်တှ်ေအ္စာဇာတ်ဂှ် မိက်ဂွံကဵုကေတ်တာလျိုၚ်ပေၚ်ၚ်။ ယဝ်ခါရ ဒးကလေၚ်လှ်ေပေါဲဏောၚ်တှ်ေ လ္ပနုက်စ လ္တူကောန်ကမၠောန်ဇကုဂၠိုၚ် နုက်ထောံတှ်ေ ပ္ဍဲပိုဲဏံမုလေဝ်ဟွံသှ်ေရ” သာ်ဝွံ ကောန်သၟိၚ်ဗြဴ မိမဥ္ဇူ ဂးရ။

သၞာံတုဲတုဲတေံ အခိၚ်ဏံဂှ် စတေက်မံၚ်ဇာတ်ယျကီုလေဝ် လၟုဟ်ဟို်တ်နူကဵုယဲဏံဂှ် လ္ဇုဲမံၚ်ညိတုဲ ပေဲါဇာတ်ကောန်သၟိၚ်သိုက်ဟံသာ က္ဍိုက်လဝ်က္ဍိုပ်ဇာတ်သၟိၚ်ဟံသာဂှ် ဂိတုဏံအိုတ်မ္ဂး ကၠောန်ပတိတ်အာလလောၚ်ပဝ်သတာတံရောၚ် ကောန်သၟိၚ်သိုက်ဟံသာ ဟီုဂးလဝ်သာ်ဝွံရ။

“ဒှ်အာကဵုအခိၚ်ကိုဝ်ဝေဒ်တုဲ ဒးကၟာတ်ကမၠောန်။ အဓိကဂှ်တှ်ေ ကမၠောန်ရဲဗဒဗဒါဲစဂကောံဂှ်တှ်ေ ဍေံတှ်ခက်ခုဲညိ၊ တုဲပၠန် အ္စာဇာတ်တံဂှ် ပေါဲလီုအာပွိုၚ်ၜါဂိတု၊ ပိဂိတုတှ်ေ ယအ်အာဟွံသာပုဟ်၊ မၞိဟ်လ္ၚဵုဂှ်တှ်ေ ကမၠောန်တၞဟ်ဟ်ဟွံမွဲတှ်ေ နွံကမၠောန်ပေါဲဏံမွဲဓရ်ရတှ်ေ လှုဲစဏံဂှ်ဗဂေတ်ဟွံဂွံ ဒှ်အခက်ခုဲ” သာ်ဝွံ ကောန်သၟိၚ်သိုက်ဟံသာ ဂးရ။

ဟိုတ်နူကဵုယဲကဝ်ဝေဒ်တုဲ အခိၚ်ကာလပေဲါဇာတ်တံ ဂွံလှ်ေဂၠိုၚ်ဂှ် ဒးဒေံါဇူထောံ ပွိုၚ် (၃) ကီု သၟာကမၠောန်ဇာတ် ပ္ဍဲတွဵုရးဍုၚ်မန် လၟိဟ်ကဵုလ္ၚီတံ ကမၠောန်ကၟိတ် ဒးဆောံလေၚ်အာရောၚ်။

ပ္ဍဲကဵုသၞာံ ၁၃၈၀ ဂျောန် (၂၈) ဂှ် ဒက်ပ္တန်လဝ်ဂကောံဇာတ်မန် နွံကီုလေဝ် နကဵုဂကောံလုပ်သၞောဝ်အဆံၚ်ကၟိုန်ဍုၚ်ဂှ် ဒးသ္ပမံၚ် Register သၟဝ်ဂကောံတၠပညာဇာတ် တွဵုရးဍုၚ်မန်ဏီရောၚ် ဂွံတီကေတ်ရ။