မိလတိုပ်ဗု၊ သေပ်တေမ်ဗာ ၁၄၊ ၂၀၂၀
ဂကောံစဳပျးဖေါအ်ဗြေဝ်မဟာဇန်မန်၊ ဂကောံကောန်ဟံသာ၊ ဂကောံသၟတ်မန်လညာတ်တၟိ (MYPO) ၊ ဂကောံ ဌာန်ဒတန်အခေါၚ်အရာမၞိဟ်ပ္ဍဲဍုၚ်မန် (Human Rights Foundation of Monland) (၄) ဂကောံတံ ပံၚ်ကောံဂှ် ဒုၚ်ယၟုဂကောံ (CAFFE) တုဲ ပံက်တန်ဗ္တောန်လညာတ်ပညာကဵုမာဲ အဆံၚ်သ္ပအ္စာ ပ္ဍဲရုၚ်ဗော်ညဳသၟဟ်မန် ပွိုၚ်ဍုၚ်ဇြပ်ဗု ပွိုၚ် (၃) တ္ၚဲရ။
တန်ဗ္တောန်ကဵုလညာတ်ပညာ နဲကဲစုတ်မာဲဝွံ စပတံနူဂိတုသေပ်တေမ်ဗာ (၁၂-၁၃-၁၄) ဂှ် ပံက်ဏာ ပွိုၚ် (၃) တ္ၚဲတုဲ ကွးဘာတိုန်လ္ၚတ်လဝ်ဂမၠိုၚ်တံ သွက်ဂွံကလေၚ်ဖျေံကဵုတန်ဗ္တောန် ပ္ဍဲကဵုအဆံၚ်ကွာန်ဂမၠိုၚ်ပၠန်ရ။
‘တၚ်ရန်တၟံ ဂွံပံက်တန်ဗ္တောန်ဏံဂှ်တှေ် ရန်ကဵု သွက်ညးဍုၚ်ကွာန်တံ ဂွံစုတ်မာဲကဵု ဗော်မန်ပိုဲမာန်၊ မူဟိုတ်ဒးစုတ်မာဲဗော်မန်ရော၊ မမာဲဗီုလဵုဂှ် ဒှ်မာဲခိုၚ်/မာဲပဲါရောဂှ် ညံၚ်မိမညးဍုၚ်တံ ဂွံတီကၠိုဟ်အာ ရန်တၟံသာ်ဏံ၊ တုဲပၠန် တန်ဗ္တောန်ပိုဲဏံတုဲတှေ် အ္စာတိုန်လဝ်တန်ဗ္တောန်တံဏံဂှ် ဒးကလေၚ်ဖျေံကဵု ညးကွာန်တံမွဲအဆံၚ်ပၠန်ဏောၚ်’ သာ်ဝွံ ညးတာလျိုၚ်ဗော်ညဳသၟဟ်မန် ပွိုၚ်ဍုၚ်ဇြပ်ဗု နာဲပ္ကဴဇၟောဝ်အလာံ ဟီုထ္ၜးရ။
တန်ဗ္တောန်ကဵုလညာတ်ပညာကဵုမာဲဝွံ တဲကၠာဂှ် ရန်လဝ်နူကွာန်မွဲတှေ် ညး (၅) တၠ၊ အကာဲအရာလၟုဟ် ကဵုယဲဏံတုဲ မၞိဟ် (၅၀) တၠ နကဵုစၞောန်ပၟိၚ် နူဌာနပရေၚ်ထတ်ယုက် (အလဵုအသဳ) ဂှ် ပကောံမၞိဟ်ဂၠိုၚ်ဟွံဂွံတုဲ လၟိဟ်ကောန်တန်ဗ္တောန်တံပါလုပ် ၜိုတ် (၄၀) တၠပြၚ် တိုန်စိုပ်ရ။
‘တန်ဗ္တောန်ကဵုပညာဗီုဗီုဏံဂှ် သွက်ညးဍုၚ်ကွာန်တံ ခိုဟ်ကွေံကွေံ၊ ပိုဲစဴအာနူတန်ဗ္တောန်ဏံတုဲတှေ် ပိုဲကလေၚ်ကဵုပညာ ကုရဲကွာန်တံ နဲကဲလဵု ဂွံစုတ်မာဲ၊ ညံၚ်ဂွိုအ်ဒှ်အာမာဲပဲါကီု ညံၚ်ဂွံအာစုတ်မာဲသီုညးဖအိုတ်ကီုဂှ် စှေ်သဳကၠဳအကြာကွာန် တိုန်မွဲသ္ၚိ စှေ်မွဲသ္ၚိဏောၚ် ရန်လဝ်ဗီုဏံနွံ’ သာ်ဏံ ညးတိုန်တန်ဗ္တောန်မွဲတၠ နာဲသာန်ကျဳ ဟီုရ။
ပ္ဍဲကဵုတန်ဗ္တောန်ဏံဝွံ ဂကောံကွာန်နာနာ နူပွိုၚ်ဍုၚ်ဇြပ်ဗုတံ တိုန်စိုပ်တုဲ စှေ်တန်ဗ္တောန်ဏံမ္ဂး ညံၚ်ဂွံကလေၚ်ဖျေံ တန်ဗ္တောန် သွက်အကြာကွာန်တံနွံပၠန်ရောၚ် ဂွံတီကေတ်လဝ်ရ။
