ယေန်ထဝ်မန်၊ ဂိတုသေပ်တေမ်ဗာ ၁၊ သၞာံ ၂၀၂၀
ဇၟာပ်သၞာံ ဂိတုခ္ဍဲသဳပေၚ် ကၠောန်ဗဒှ်မံၚ် တ္ၚဲပၠန်ဂတးမန် ရှေ်သှေ်မံၚ် က္ဍိုပ်သ္ကိုပ်ကောန်ဂကူမန် ပ္ဍဲကွာန်ပ္ၚဂှ် သၞာံဏံ ဟိုတ်နူယဲကိုဝ်ဝေဒ်တုဲ သွက်ဂွံကၠောန်ဂှ် အစဳအဇန်ဟွံမွဲရောၚ် ညးမဒှ်ဒတောဝ်တၞောဝ် နာဲအံၚ်ထောန် နာဲဟုတ် ဟီုလဝ်ရ။
စိုပ်တ္ၚဲပၠန်ဂတးမန်မ္ဂး ပ္ဍဲကွာန်ပ္ၚ ဘာပလိုက်ဂှ် ညးသ္ပဂါရဝ ကျာ်ဇၞော်အာစာ သဳလတေဇတုဲ ဆက် ဇက်ဂၠောဲတိုန်အာ လ္တူကုန်ကျာ်စာၚ်ဍေဝ်တေံတုဲ ထပ်သပဂါရဝကဵု နာဲအံၚ်ထောန် နွံကၠုၚ်လဝ်ရ။
“တ္ၚဲပၠန်ဂတးဂှ် လုၟဟ် စပ်ကဵုကိုဝ်ဝေဒ်ဏံတုဲ အစဳအဇန်ပိုဲ မုဟွံမွဲပုဟ်၊ ကိုဝ်ဝေဒ်ဂှ် ဍေံထပ်ပတေၚ်လဝ်ပၠန်တှေ် ဟွံဂံၚ်ကၠောန်ပုဟ်၊ နကဵုရဲဂကောံဗော်ဍုၚ်မန်တၟိဂှ်တှေ် ညးတံကၠောန်တှေ် ကၠောန်ဏောၚ်၊ ကွာန်ပိုဲဂှ် ဟွံဒှ်ကၠောန်ရ” သာ်ဝွံ နာဲဟုတ် ဟီုလဝ်ရ။
ပ္ဍဲကွာန်ပ္ၚဂှ် ဒက်စွံလဝ် ဒၞာဲဂိုဟ်နာဲအံၚ်ထောန် လ္တူကုန်ကျာ်စာၚ်ဍေဝ်ဂှ်တုဲ ဒၞာဲဂိုဟ်ကျာ်ဇၞော်အာစာ သဳလတေဇဂှ် နွံပ္ဍဲဘာပလိုက် ကွာန်ပ္ၚဂှ်ရ။ လၟေၚ်သၞာံ စိုပ်တ္ၚဲပၠန်ဂတးမ္ဂး နူကဵုဂကောံဗွဲမဂၠိုၚ်၊ ကွာန်ဗွဲမဂၠိုၚ် ကၠုၚ်သ္ပဂါရဝ ဂြုဂြုဂြီုဂြီုကီု ဂွံတီကေတ်ရ။
“သၞာံဏံဂှ်တှေ် ပ္ဍဲပ္ၚဂှ် မုဟွံမိၚ်ဏီပုဟ် ပရူတ္ၚဲပၠန်ဂတးဂှ် မုလေဝ် ဂွိုအ်ချပ်ဏီပုဟ်တှေ် ဟွံဒှ်ရပုဟ်လေဝ်၊ ဟိုတ်နူကဵု ညးဟွံကဵုပကောံမၞိဟ်တှေ် မုလေဝ်ကၠောန်ဟွံဂွံ ဟွံဒှ်ကၠောန်ဂှ် ဂၠိုၚ်မံၚ်ဏောၚ်” သာ်ဝွံ နူကဵု ကမ္မတဳလိက်ပတ်ယေန်သၞာၚ်မန် ကွာန်ပ္ၚ နာဲတိၚ်ထောန် ဟီုလဝ်ပၠန်ရ။
ကျာ်ဇၞော်အာစာသဳလတေဇဝွံ ဇာတိကွာန်ပ္ၚ ပွိုၚ်ဍုၚ်ဇြပ်ဗုတုဲ ပ္ဍဲပရေၚ်ပၠန်ဂတးဂှ် ကဵုကၠုၚ်အရီုအဗၚ် ဒၞာဲဌာန်ဒတန် ကေုာံ ကဵုကၠုၚ်သြဝါဒ ကသပ်ကုက္ဍိုပ်သ္ကိုပ်မန်ဂမၠိုၚ်ရ။ တုဲပၠန် ပ္ဍဲခမဳသၚ်မန် မဟာသံဃသမဂ္ဂဳဂှ်လေဝ် နဒဒှ်ဥက္ကဌ မဟာနာယက ယိုက်ဂၠေၚ်ကၠုၚ်တာလျိုၚ်ရ။
နာဲအံၚ်ထောန်ဝွံ ဇာတိကွာန်ပ္ၚ၊ ပွိုၚ်ဍုၚ်ဇြပ်ဗုကီုတုဲ ညးဝွံ ပ္ဍဲပရေၚ်ပၠန်ဂတးရပ်လွဟ်လေဝ် ကေၚ်ယိုက်ဂၠေၚ်ကၠုၚ်တာလျိုၚ် နဒဒှ်ဥက္ကဌ ပ္ဍဲဗော်ဍုၚ်ပၠတရဴဍုၚ်မန်ရ။ တုဲပၠန် ပရေၚ်ပၠန်ဂတး ပွိုၚ်ပ္ဍဲဍုၚ်လေဝ် ဂွံဒှ်ကၠုၚ်ဝန်ဇၞော် ပရေၚ်ဂကူမန် ကေုာံ ပရေၚ်ဟံၚ်ပြာ်ရ။
မွဲသာ်ပၠန်ဂှ် ပ္ဍဲကွာန်မုဟ်ဒုန် ပွိုၚ်ဍုၚ်ၜါသွာၚ် ဒၞာဲဂိုဟ်နာဲဂတာပ်ခေတ်၊ နာဲယူ ကေုာံ နာဲမေန်ထောဋ်တံ နွံမံၚ်ဂှ် ဂကောံသ္ၚိကၟိန်ဍုၚ် သွက်ဂွံအာသ္ပဂါရဝ နွံမံၚ်ရောၚ် ပ္တိုန်မံၚ်လ္တူမုက်လိက်လပှ်ကျာဂှ် ဂွံဆဵုကေတ်ကီုရ။
နကဵုကမ္မတဳကၠောန်ဗဒှ် တ္ၚဲပၠန်ဂတးမန် ဗွိုၚ်အပ္ဍဲဍုၚ်တံဂှ် ကမၠောန်ဒးပကောံမၞိဟ်တံဂှ် ဟွံကၠောန်သ္ပတုဲ ပြံၚ်သၠာဲဗီုပြၚ် ဟီုတွံနူကဵုလပှ်ကျာတံဟေၚ် စဳဇန်မံၚ်ရောၚ် ဂွံတီကေတ်ရ။
