မိလတိုပ်ဗု၊ သေပ်တေမ်ဗာ ၁၂၊ ၂၀၂၀

ပ္ဍဲကာလယဲ (Covid -19) အသိၚ်သၠုၚ်တိုန်ဂှ် သ္ၚုဒေသသ္ၚောဲသ္ၚောဲတအ် ကေတ်ဝါတ်ကၠုၚ်ကီု၊ ၚုဟ် သ္ၚုလေဝ် သၠုၚ်ပဵုတိုန်ကၠုၚ်မံၚ်ရောၚ် တၠဆေၚ်သွံသ္ၚု လတူဍုၚ်ဇြပ်ဗုမွဲတၠ ဟီုထ္ၜးရ။
‘သ္ၚုကြပ်ပ္ဍဲရး (နေဝ်) ဇကုဂှ်တှေ် ကေတ်လောဲမံၚ်ရ၊ ဆဂး သ္ၚုနူသ္ၚောဲသ္ၚောဲဂှ် ဒၟာနူကွဳစက် (ကာ) အာကၠုၚ် အောန်စှေ်တုဲတှေ် ဗ္ကန်သ္ၚုကျာတ်မံၚ်ညိ၊ ဟိုတ်နူဂှ်တုဲတှေ် ၚုဟ်သ္ၚုဂှ်လေဝ် သၠုၚ်က္ဍၚ်တိုန်ညိ’ သာ်ဏံ တၠဆေၚ်သွံရာန်သ္ၚု မိအေမျဝေန် ဟီုရ။
အဃောကာလယဲကပ် တ္ၚဲဏံဂှ် ၚုဟ်သ္ၚုမျ (နူလ္ဂုၚ်) ၁၀၈ ပံၚ်ဂှ် နွံၚုဟ် (၄၅၀၀၀) ဒကေဝ်၊ ၚုဟ်သ္ၚု (ရေႊ စၚ်ကြယ်) ကီု၊ သ္ၚု (ဟိန်းရာဇာ) ကီုဂှ် မွဲရိုက် (၁၀၈) ပံၚ်ဂှ် နွံၚုဟ် (၃၇၀၀၀) ဒကေဝ်၊ သ္ၚုဇၞော် မွဲရိုက် (၁၀၀) ပံၚ်ဂှ် နွံၚုဟ် (၃၁၅၀၀) ဒကေဝ်၊ သ္ၚုအပြောံ (အကြမ်း) တဲခိုဟ် (ဍိုန်ညိ) (၁၀၈) ပံၚ်ဂှ် နွံၚုဟ် (၃၄၀၀၀) ဒကေဝ်၊ သ္ၚုအပြောံ (အကြမ်း) (သ္ၚုမ္ၚိုဟ်) မွဲရိုက် (၁၀၈) ပံၚ်ဂှ် နွံၚုဟ် (၂၆၅၀၀) ဒကေဝ်ရ။ ၚုဟ်တံဂှ် အကြာမွဲဖျာကဵု မွဲဖျာဂှ် တၞဟ်ခြာနွံညိကီု၊ အကြာပွိုၚ်ဍုၚ်မွဲကဵုမွဲဂှ် ၚုဟ်တၞဟ်ခြာ နွံညိညရ။
ဗွဲကြဴနူကဵု အကာဲအရာယဲ (COVID-19) ဂှ် အသိၚ်သၠုၚ်တိုန်တုဲဂှ် ၚုဟ်သ္ၚုဂှ် မွဲရိုက်မ္ဂး ၚုဟ်သၠုၚ်တိုန်ညိကီု၊ မၞိဟ်ရာန်သ္ၚုတံလေဝ် ဒှ်ကၠုၚ်ဂဝိၚ် ဖေက်သ္ၚုပိုတ်ဒကုတ်တုဲ ရာန်ပကောံစွံလဝ်သ္ၚုလေဝ်နွံရ။
‘နူကဵုယဲဏံ အသိၚ်ပဵုတိုန်ကၠုၚ်တုဲတှေ် ၚုဟ်သ္ၚုပဵုတိုန်မံၚ် ပ္ဍဲမွဲရိုက်တှေ် (၂၀၀၀) ဒကေဝ်၊ သ္ၚုဒေသဇကုဂှ် မွဲရိုက် (၁၅၀၀) ဒကေဝ်၊ လ္ၚဵုဂှ် မွဲရိုက် (၁၀၀၀) ဒကေဝ် ပဵုတိုန်နွံ၊ ပ္ဍဲအခိၚ်အကာဲအရာ ယဲအလန်ဏံဂှ်တှေ် နူကဵုဒေသလ္ဂုၚ်´ ရခေၚ်တအ် ယဲပဵုတိုန်တုဲ မၞိဟ်ရာန်သ္ၚု ပ္ဍဲ (၂/၃) တ္ၚဲဏံဂှ် အသိၚ်ပဵုတိုန်မံၚ်၊ ညးဂစာန်ရာန် အဲဂစာန်ရာန်တုဲ သ္ၚုပ္ဍဲဆေၚ် ပိုတ်အာမွဲလစုတ်၊ ကလေၚ်ဗပေၚ်သ္ၚုတုဲ ပရေၚ်သွံရာန် ညိၚ်အာညိပၠန်၊ လၟုဟ် ယဲကလေၚ်ပဵုတိုန်တုဲ မၞိဟ်ဂှ်ဖေက်တိုန် ကလေၚ်လုပ်ရာန်မံၚ် မွဲရိုက်၊ ၜါရိုက် နွံကၠုၚ်ညိပၠန်’ သာ်ဝွံ မိအေမျဝေန် ဆက်ဟီုထ္ၜးရ။
ဟိုတ်နူအကာဲအရာ ယဲကပ်ကိုဝ်ဝေဒ် (၁၉) ဏံ အသိၚ်သၠုၚ်တိုန်ကၠုၚ် သီုတွဵုရးဍုၚ်မန်ဂှ်တုဲ နူဂိတုသေပ်တေမ်ဗာ (၁၁) ဂှ်စတုဲ ကွဳစက်ဒမြိပ်လာၚ်ဂမၠိုၚ် ကဵုဒေံါဇူထောံကီုရောၚ် နူကဵု (ပြည်နယ် ယာဉ်လုပ်ၚန်းများ ထိန်းသိမ်းကြီးကြပ်ရေးကော်မတီ) တွဵုရးဍုၚ်မန် ပတိတ်လိက်ရ။
အဃောကာလ ယဲအသိၚ်သၠုၚ်ကၠုၚ်ဏံဂှ် ပရေၚ်သွံရာန်သ္ၚုကီု၊ ပရေၚ်သွံရာန် ကပေါတ်ဖျာဂမၠိုၚ်ကီု၊ စၞစစၞသုၚ်နာနာသာ်ကီု ညးလ္ၚဵုဂှ် ဒှ်ဂဝိၚ်ကဵု ဖေက်ကပေါတ်ပိုတ်ဒကုတ် ရာန်ဟွံဂွံတုဲ ရာန်ပကောံစွံလဝ် ဇွောံမ၊ စၞစစၞသုၚ်နွံရ။