မိလတိုပ်ဗု၊ သေပ်တေမ်ဗာ ၈၊ ၂၀၂၀၊
ပရေၚ်ပညာကောန်ဂကူမန် သ္ဂောံဆက်တန်တဴအာ ဍာ်ဇမၠိၚ်မာန်ဂှ် သ္ဒးဒက်ပတန်အာ ဂကောံညးဆာန်ပရေၚ်ပညာမွဲဂကောံရောၚ် ညးတာလျိုၚ်ပရေၚ်ပညာမန်တံ ဟီုဂးဏာ ပ္ဍဲကာလဝိုၚ်တက်ကျာ ညးဆာန်ပရေၚ်ပညာကောန်ဂကူမန် မကၠောန်ဗဒှ် ဒၞာဲဘာရမညရဌဗုဒ္ဓတက္ကသဵု ဍုၚ်မတ်မလီုရ။
တုဲကၠုၚ်ဂိတုသေပ်တေမ်ဗာ (၆) ဂှ် နူကဵုကမ္မတဳပရေၚ်ပညာမန် သ္ပသ္ကိုပ်သ္ကတုဲ ကၠောန်ဗဒှ် ဝိုၚ်တက်ကျာ ညး ဆာန်ပရေၚ်ညာကောန်ဂကူမန်တုဲ နူကမ္မတဳပရေၚ်ပညာကောန်ဂကူမန် (သၚ်) ကျာ်ဇၞော်အ္စာကေတုမာလာ (ဘာကံပလိုၚ်)၊ ကမ္မတဳပရေၚ်ပညာဗဟဵု အ္စာရတ်ဂကူ (အ္စာဇြေ)၊ ကမ္မတဳပရေၚ်ပညာ အ္စာဗြဴမိလွဳဟာန်၊ အ္စာဗြဴမိလှိုၚ်နန် (ရုၚ်ဌာနပရေၚ်ပညာ) တံ သဳကၠဳပတိုန်ထ္ၜး ပရေၚ်ပညာ ဂွံတန်တဴဍာ်ဇမၠိၚ်ရ။
‘သၞောတ်ပညာ ဒုၚ်သ္ဇိုၚ်ကဵု အရေဝ်ဘာသာမိတုဲ ဗ္တောန်အာဘာသာဇဳိဏံ သွက်ရဂွံအာဍာ်ဇမၠိၚ်မာန်ဂှ် ပိုဲဒးဒက် ဂကောံ ညးဆာန်ပရေၚ်ပညာကောန်ဂကူမန်မွဲဏောၚ်၊ ဠဂှ်မှ ဂွံအာဍာ်ဇမၠိၚ်မာန်၊ အလဵုအသဳလေဝ် ဟွံပစၟတ် သမ္တီကဵုပိုဲ ချိုတ်တ်ပၠိုတ်တ်ဏီဖိုဟ်တှေ် ပိုဲရ ဒးဂိုတ်ဂ္စာန် ပိုဲဒက်ဂကောံတုဲတှေ် ဒးကသေအ်ကၟဝ်စန်ဒက်အာ ညံၚ်ဂွံစုတ်သြန်ဂကောံ’ သာ်ဏံ နာဲရတ်ဂကူ (အ္စာဇြေ) သဳကၠဳရ။
သြန်ဂအုံ ပရေၚ်ပညာကောန်ဂကူမန်ဂှ် မွဲဂိတုမ္ဂး သြန်ဗၟာ (၁၀၀၀) ဒကေဝ် စုတ်ကဵုတုဲ ပွိုၚ်မွဲသၞာံမ္ဂး (၁၂၀၀၀) ဒကေဝ်ရ။ သြန်ဝွံ ဒှ်သြန်တမ်-သြန်ဗွဝ်တုဲ သ္ဂောံထံက်ပၚ်အာ ခရိတ်အ္စာဘာတံရောၚ် နာဲရတ်ဂကူ ဆက်ဟီုရ။
ဘာပရေၚ်ပညာကောန်ဂကူမန်ဂှ် ပြဟ်ဟ်ဏံမ္ဂး သ္ဒးပဓာန်ဒၟံၚ်ကဵု သြန်ထံက်ပၚ် နူညးတၠဒါန်ကီု၊ သြန်မိမညး ဍုၚ်ကွာန် ကောန်ဂကူမန်ကီုတုဲ ဓမံက်ဒၟံၚ်ရုပ်ရဴ လၟေၚ်ကမၠောန်ပရေၚ်ပညာကောန်ဂကူမန်ရ။
ဘာကောန်ဂကူမန်ဝွံ သြန်ထံက်ပၚ်သွက်အ္စာဘာဂှ် ဟိုတ်ဒးပတှေ်မံၚ် နူကဵုတၠဒါန်တအ်ဏောၚ် ဒးကဵုဒၟံၚ် သြန်ဂိတုလၟေၚ်သၞာံဂှ် ဒှ်ခက်ခုဲနွံတုဲ ဟိုတ်ဂှ်ရ မိမဂကူမန်ပိုဲ ကောန်ဇကု ဘာမန်စွံစွံ၊ ဘာအလဵုသဳစွံစွံ၊ ဘာတန် ကဆံၚ်သၠုၚ်ၚ် မိက်ဂွံစွံစွံ၊ ဒၞာဲဒးစိုတ်ဂှ်စွံ၊ ဆဂး ဇကုကောန်မန်တှေ် ညံၚ်ဂွံဒှ်သြန်ဗွဝ် သွက်ပရေၚ်ပညာ ကောန် ဂကူမန်မာန် တာလျိုၚ်နွံမံၚ်ဏောၚ်ဂှ် လပဝိုတ်ညိ၊ ဘိုၚ်ရီုဗၚ်ထံက်ပၚ် စုတ်အာကဵုသြန်ကီု နာဲရတ်ဂကူ ဆက် ဖတိုက်ဖၟောဝ်လဝ်ရ။
‘ယဝ်ရ ဇြဟတ်ဂကူဟွံမွဲမ္ဂး ဂွံအာဍာ်ဇမၠိၚ်ဂှ် ဒှ်ဟွံမာန်၊ ဟိုတ်ဂှ်ရ ပိုဲဂှ် မိက်ဂွံဒက်ပတန် ဂကောံညးဆာန်ပရေၚ် ပညာဏံ၊ ရန်လဝ် ဂွံအာဘိုၚ်စှေ်စန်ဒက် ပ္ဍဲဍုၚ်မ္ၚး ပ္ဍဲဒေသတအ်ဂှ်တုဲရ၊ ဟိုတ်နူကဵုယဲကပ်ဏံတုဲ ပိုဲကၠောန်ကၠုၚ် ဝိုၚ်တက်ကျာ ညးဆာန်ပရေၚ်ပညာကောန်ဂကူမန် လ္တူလပှ်ကျာ (Online) ဏံ အဓိက ဂွံအာဍာ်ဇမၠိၚ်မာန်ဂှ် တှေ် သြန်ဗွဝ်ရ၊ ဟိုတ်ဂှ်ရ ဂကူမန်ပိုဲညးညးအဲအဲ ဘိုၚ်စုတ်ကဵုသြန်ဗွဝ်’ သာ်ဏံလေဝ် ကျာ်ဇၞော်အ္စာဘဒ္ဒန္တကေ တုမာလာ ဟီုမြော်ကီုရ။
လၟေၚ်ကမၠောန်ပရေၚ်ပညာကောန်ဂကူမန် သ္ဂောံဂေတ်ဆက်တန်တဴဍာ်ဇမၠိၚ်မာန်ဂှ် နူကဵုညးတာလျိုၚ်ကမ္မတဳ ပရေၚ်ပညာကောန်ဂကူမန်ဂှ် အာတ်မိက်ပတိုန်ထ္ၜးလဝ်ကဵု အလဵုအသဳကၟိန်ဍုၚ်-အလဵုအသဳတွဵုရး နွံကီုလေဝ် သြန်ထံက်ပၚ်ဝွံ အလဵုအသဳ ဟွံဖန်ဇန်ကဵုရ။
ဘာကောန်ဂကူမန်သီုဖအိုတ်ဝွံ တၟော်ကဵုစရၚ်သၞာံတုဲကၠုၚ်တေံမ္ဂး ဘာဖအိုတ် နွံ (၁၃၂) ဘာ၊ အ္စာဘာ (၆၈၆) တၠ၊ လၟိဟ်ကွးဘာ နွံ (၁၀၂၃ ၀) တၠ၊ အပ္ဍဲဂှ်မ္ဂး ဘာတန်သၠုၚ် (၃) ဘာ၊ ဘာတန်လ္ဒောဝ် (၈) ဘာနွံရ။
