ဟိုတ်နူကဵုယဲကပ်ကဝ်ဝေဒ် လပှ်ဒုတိယဇီုဂဗတ်ကၠုၚ်တုဲ ပ္ဍဲကဵုဒေသပတှ်ေမံၚ်ကမၠောန်ကၠအ်ထ္ၜိုတ် တွဵုရးဍုၚ်မန်ကဵု တွဵုရးဍုၚ်ကရေၚ်ဂှ် စဵုဒၞာပိုၚ်ခြာလဝ် ဖျေံလဝ်စေဝ်ပၞောန်နွံတုဲ ပရေၚ်ကွာ်တရဴခက်ခုဲမံၚ်ဂှ်ရ သၟာကမၠောန်ကၠအ်ထ္ၜိုတ်တံ အာစိုပ်ကၠအ်ဟွံမာန်ဏီရောၚ် ဂွံတီကေတ်ရ။
ပရေၚ်ကွာ်တရဴဂှ် ပဲါနူကဵုကွဳစက်ဖဍိုက်ကပေါတ်တုဲ ကွဳစက်လာၚ်ကီု ကွဳစက်စကာအပ္ဍဲသ္ၚိကီု တတ်ကၠောံတွဵုရး အာကၠုၚ်ဟွံဂွံဂှ်ရ သၟာကမၠောန်ကြပ်ကဵုကၠအ်တံဟေၚ် ပံက်ထ္ၜိုတ်မာန်မံၚ်ရောၚ် တၠကၠအ် ဥုတုၚ်ထောန် ဂးရ။
“ကၠအ်ပိုဲဂှ် လောန်အာထဝ်ပၠၚ်ညိတှ်ေ စိုပ်ရ။ ဂွံကောပ်ကာဲသၟာကမၠောန်ဂှ် သ္ပဟွံမာန်ပုဟ်။ ဗလးထောံလဝ်ကဵုဍေံတံ အတိုၚ်ဂှ်ရ။ ဍေံတံနွံပၟိက်မွဲမွဲသာ်လေဝ် ဂွံဗပေၚ်ကဵုဂှ် ခက်မံၚ်ဖိုဟ်။ ကမၠောန်လ္ၚဵုဂှ် ဇကုနွံမှ ကၠောန်ဂွံတှ်ေ ကမၠောန်တံဂှ် လီုအိုတ်တး” သာ်ဝွံ ဥုတုၚ်ထောန် ဟီုရ။
ပ္ဍဲကဵုကၠအ်ထ္ၜိုတ် ဒေသတွဵုရးမန်တံလေဝ် သၟာကမၠောန်ဒေသသၟးဟွံက နူကဵုရးဨရာဝတဳကဵု ဒေသတၞဟ်ဟ်တံလေဝ် ကၠုၚ်ကွာတ်မံၚ်ထ္ၜိုတ်နွံမံၚ်ကီု ဂွံတီကေတ်ရ။
“မွဲတွဵုရးကဵုမွဲတွဵုရး တတ်ကၠောံအာကၠုၚ်ဟွံဂွံပုဟ်တှ်ေ ဟွံပြေပြံၚ်ပုဟ်။ ညးလ္ၚဵုဂှ် စိုပ်မံၚ်တုဲ ကၠောန်မံၚ်ကမၠောန်လေဝ်နွံ၊ ဒးဒၟံၚ်အပ္ဍဲကၠအ်ဂှ် တွဵုဏောၚ်။ ပံက်ထ္ၜိုတ်ဏောၚ်တှ်ေ ကိုပ်ကၠာအိုတ် ဒးၚးကၠအ်၊ ဒးစုတ်ဝဲါဏောၚ်။ လၟုဟ်ဂှ် ဂွံၚးကၠအ် ဂွံစုတ်ဝဲါဂှ် ဟွံဂွံကၠောန်ဏီပုဟ်” သာ်ဝွံ တၠကၠအ်မွဲတၠ ဥုဝေန်လှ ဟီုရ။
ပ္ဍဲကဵုဒေသမန်ဂှ် ညးလ္ၚဵုကွာတ်နကဵုစရိတ်လၟိဟ်တၞံ၊ ကၠအ်လ္ၚဵုဂှ် ပရအ်စ (၆/၄) ကၠအ်လ္ၚဵုဂှ် ညးကဝက်အဲကဝက် ပါ်ပရအ်တုဲ ကၠောန်မံၚ်ကမၠောန်ထ္ၜိုတ်ရောၚ် ဂွံတီကေတ်ရ။
ပ္ဍဲကဵုတွဵုရးဍုၚ်မန်ဂှ် ကၠအ်တဵုလဝ်ထ္ၜိုတ်နွံမံၚ် (၅) ကိုတ်ဨကတုဲ မွဲသၞာံမ္ဂး လျိုတ်ထ္ၜိုတ်မွဲကိုတ်တာန် ကၠောန်ပ္တိတ်မာန်မံၚ်ရောၚ် ဂွံတီကေတ်ရ။
