ပ္ဍဲကဵုတွဵုရးဍုၚ်မန်ဂှ် အသိၚ်ကၠောံထၞာန်ယဲကပ်ကဝ်ဝေဒ်သၠုၚ်တိုန်မံၚ်ဖိုဟ်တုဲ ပၞောဝ်ကဵုမၞိဟ်ယဲသ္ပဒတန်ဆဵုစၟယဲဂှ် ဗၞတ်စှ်ဂအုံမွဲဂအုံဂှ် ဒှ်မံၚ်ကောန်ၚာ်တံဂၠိုၚ်မံၚ်ရောၚ် ဂွံတီကေတ်နူကဵုဌာနပရေၚ်ထတ်ယုက်ရ။
“နွံမံၚ်ၜိုတ် (၁၀) က္ဍိုပ်ကၠံဒှ်ဏောၚ်။ ကောန်ၚာ်ဗွဲမဂၠိုၚ်ဂှ် ဟွံထ္ၜးလက်သန် ယဲသ္ကာတ်မြဟ်ပုဟ်။ ဆဵုစၟတုဲတှ်ေလေဝ် သွက်ဂွံမၚ်မွဲရံၚ်စံၚ်ကောန်ၚာ်တံဂှ် ညးလ္ၚဵုပါကၠုၚ်သီုမိမရ။ ရဲမိမဟွံမွဲအဏံဂှ်တှ်ေ မိနော်၊ အပါနော်တံ ကၠုၚ်မၚ်မံၚ်ကဵုနွံမံၚ်ရ” သာ်ဝွံ နူကဵုဌာနက္ဍိုက်ပ်ပရေၚ်ထတ်ယုက်တွဵုရး ဒုသ္ကိုပ်တွဵုရး ဒံက်တာဝတ်မှုၚ် ဂးရ။
ပ္ဍဲကဵုတွဵုရးဍုၚ်မန်ဂှ် စဵုကဵုလၟုဟ် မၞိဟ်ယဲသ္ပဒတန်ဆဵုညာတ်စၟယဲကဝ်ဝေဒ်ဂှ် ၆၅၀ တၠပြၚ်တုဲ မၞိဟ်ဟွံထ္ၜးလက်သန်ယဲ မၞိဟ်ယဲဗၠးဂွံစှ်ေအာနူကဵုရုၚ်ဂဥုဲဂှ် ဗၞတ် (၅၀၀) တၠနွံရောၚ် ဂွံတီကေတ်ရ။
သွက်ဂွံမၚ်ယဲကောန်ၚာ်တံဂးတုဲ မၞိဟ်ဇၞော်ဇၞော်ပါကၠုၚ်တံဂှ် မံၚ်လုက်စုက်ကြပ်မံၚ်ဂှ်ရ ဒးဒုၚ်ကၠောံယဲလေဝ် နွံမံၚ်ကီုရောၚ် ဒံက်တာဝတ်မှုၚ် ထပ်ဟီုရ။
“မိမ၊ မၞိဟ်ကောပ်ကာဲဟွံပါမွဲသာ် ကောန်ၚာ်ဏောၚ်တှ်ေ အတိုၚ်ဏံလေဝ် ဟွံမိက်စွံပုဟ်။ ဗွဲမဂၠိုၚ်ဂှ် ဆဵုညာတ်စၟယဲအတိုၚ်မွဲသ္ၚိဂှ် ဂၠိုၚ်မံၚ်ဏောၚ်။ ဒၞာဲလ္ၚဵုဂှ် မိမတံဆဵုစၟယဲကီုလေဝ် ကောန်ၚာ်ယဲဟွံကၠောံဂှ် နွံမံၚ်ကီု၊ ဆဵုစၟယဲပ္ဍဲကောန်ၚာ် ဟွံကၠောံမိမလေဝ်နွံမံၚ်ရ” သာ်ဝွံ ညးထပ်ဟီုရ။
ပၞောဝ်ကဵုကောန်ၚာ်ဒှ်ယဲကဝ်ဝေဒ်တံဂှ် ဍောတ်အိုတ်အာယုက် ၜါသၞာံဘာ်ပါလုပ်မံၚ်တုဲ အာယုက် (၁၀) သၞာံကဵု (၁၁) သၞာံဂှ် ပါဂၠိုၚ်မံၚ်ရောၚ် ဂွံတီကေတ်ရ။
အလုံကၟိန်ဍုၚ်ဂှ် ဆဵုညာတ်လဝ်စၟယဲကဝ်ဝေဒ် လၟိဟ်မၞိဟ် မသုန်လက်ပြၚ်တုဲ မၞိဟ်ချိုတ်အာဂှ် မွဲလ္ၚီၜါကၠံတၠပြၚ်ရောၚ် ဂွံတီကေတ်ရ။
