ဗညာသာၚ်၊ အံက်တဝ်ဗာ ၂၃၊ ၂၀၂၀
ပ္ဍဲလက်ထက်အလဵုအသဳ NLD နူသက္ကရာဇ် (၂၀၁၅) တေံ ၜိုန်ရဖျေံလဝ်မူဝါဒ သၟတ်တံနွံဒၟံၚ်ကီုလေဝ် ပရေၚ်ပြံၚ်သၠာဲဟွံမွဲကွေံကွေံ၊ လၟုဟ်ပၠန် ပေဲါရုဲမာဲ (၂၀၂၀) ဏံ ပ္ဍဲမူဝါဒ ဗော် NLD ဂှ် ထပ်ဖျေံလဝ် ပ္ဍဲကဏ္ဍသၟတ် သွက်ဂွံဇၞော်မောဝ်နွံကီုလေဝ် စပ်ကဵုပရူဂဥုဲၜူမာဲဂှ် ဒှ်ဒၟံၚ်အန္တရာယ်သွက်သၟတ်တံတုဲ ပရေၚ်ဂဥုဲၜူမာဲမွဲကဏ္ဍ ထေက်ကဵုဒးစုတ်ရောၚ် ညးအုပ်ကာကမ္မတဳသၟတ် တွဵုရးဍုၚ်မန် နာဲဂျဳဇြဝ်လောန် (နိုၚ်ကြည်ဇော်လွၚ်) ဟီုရ။
ပ္ဍဲပေဲါရုဲမာဲ (၂၀၂၀) ဏံဝွံ ဗော် NLD သၟးဟွံသေၚ် ဗော်ပရေၚ်ဍုၚ်ကွာန်လဵုဒှ်ဒှ် ဆေၚ်စပ်ပရေၚ်စဵုဒၞာဂဥုဲၜူမာဲဂှ် ထေက်ကဵုဒးချူဓဇက်လဝ် ပ္ဍဲမူဝါဒဗော်တအ်ရောၚ်။ မုဟိုတ်ရောဟီုမ္ဂး ပြသၞာဂဥုဲၜူမာဲဝွံ ဒှ်ဒၟံၚ်ပြသၞာဇၞော်ကဵုဇြဟတ် အလုံကၟိန်ဍုၚ်မွဲရောၚ်၊ တုဲပၠန် အတိုၚ်ဂတိပါၚ်ဗော်တအ် မလးဖျေံလဝ် စပ်ကဵုဂွံစဵုဒၞာဂဥုဲၜူမာဲ သွက်ညးဍုၚ်ကွာန် တအ်ဂှ် ရုပ်ရဴညံၚ်သ္ဂောံမံက်တိုန်ဂှ် ဒးကၠောန်သ္ပကဵုမာန်ရောၚ် နာဲဂျဳဇြဝ်လောန် ဆက်ဟီုလဝ်ရ။
“ပ္ဍဲကဵုဂကောံသၟတ် တွဵုရးဍုၚ်မန်ပိုယ်လေဝ် ဆေၚ်စပ်ကဵုမူဝါဒသၟတ်တအ်ဂှ် ပ္ဍဲကဏ္ဍဂဥုဲၜူမာဲကီု၊ ပ္ဍဲကဏ္ဍတၞဟ်တၞဟ်တအ်ဗွဲမဂၠိုၚ် ပိုယ်တအ် ချူဓဇက်လဝ်နွံမံၚ်ရ၊ ဆဂး အတိုၚ်မူဝါဒဓဇက်လဝ် ပ္ဍဲကဏ္ဍဗွဲမဂၠိုၚ်တအ်ဂှ် အလဵုအသဳတအ် ဒးကလၚ်ရမျာၚ်ပိုယ်တအ်ကီုဏောၚ်၊ ပ္ဍဲသၞာံ (၂၀၂၀) ဗော်ဂွံဒၞာဲ (အလဵုအသဳ) တအ်ဂှ် လ္တူမူဝါဒပိုယ်ဖျေံလဝ်ဂှ် ဒးကေတ်တာလျိုၚ် ဒးဓမံက်ကဵုရုပ်ရဴဏောၚ်၊ ပိုယ်တအ်လေဝ် ဟိုတ်ဂွံဓမံက်ရုပ်ရဴထေက်ဂှ်လေဝ် ကလေၚ်ဆဝ်မ္ၚုဟ်ပၠန်ဏောၚ်၊၊ မူဝါဒဏံဂှ် ပ္ဍဲကၟိန်ဍုၚ်ပိုယ် ဟလိုၚ်လဵုကိစ္စဇၞော်မံၚ်ဂှ် ဗော်ပရေၚ်ဍုၚ်ကွာန်တအ်လေဝ် ဒးဟီုမံၚ်ကီုဏောၚ်၊ ဒးဘိုၚ်ရီုဗၚ်ဓမံက်ကဵု ရုပ်ရဴကီုဏောၚ်” သာ်ဝွံ နာဲဂျဳဇြဝ်လောန်ဟီုရ။
ပရေၚ်ဂဥုဲၜူမာဲ ဂွံအောန်အာမာန်ဂှ် နကဵုအလဵုအသဳတအ် သ္ပပေဲါပရေၚ်ချဳဒရာၚ်ကီု၊ ကၠောန်တန်ဗ္တောန်ကီု၊ ပရေၚ်ပေဲါသဳကၠဳကီုဂှ် ဒးကၠောန်စှေ်ကဵုပညာ သွက်ညးဍုၚ်ကွာန်တအ်ထေက်ရောၚ်။ တုဲပၠန် ပ္ဍဲချူခၞံဇုက်ဓရံၚ်ဇၞော် သၞောတ်ပရေၚ်ပညာကၟိန်ဍုၚ်မ္ဂး ကဏ္ဍဂဥုဲၜူမာဲမွဲဂှ် ဒးစုတ်ပ္ဍဲတန်ဗ္တောန်ဘာထေက်ရောၚ် သာ်ဝွံ ညးကဵုကသပ်ဌာန်ကောံသၟတ်မန် နာဲညာဏ်သိုက်ရာမာဉ် ဟီုရ။
＂ကဏ္ဍမူဝါဒ ဂဥုဲၜူမာဲဏံဂှ် ပ္ဍဲမူဝါဒသၟတ်သၟး ဆၜိုတ်ချူဓဇက်လဝ်ဂှ် ဍေံဟွံရုံဂပ်ပုဟ်၊ ပရူဏံဂှ် ဍေံဆက်စပ်ဒၟံၚ် အလုံဍုၚ်ဏောၚ်၊ သွက်ဂွံဓမံက်ရုပ်ရဴဂွံဂှ် မၞိဟ်အာက္ဍိုပ်မွဲမွဲ ဒးနွံကီုဏောၚ်။ တုဲမ္ဂး ဒးပံၚ်ကဵုဗၠာဲသၟိၚ်တအ်တုဲ ပရေၚ်ကဵုပညာ ဆေၚ်စပ်ကဵုဂဥုဲၜူမာဲကီု၊ ပရေၚ်ရပ်စပ် ရဲကူသာန်သွံသာန်ဂဥုဲၜူမာဲကီုဂှ် ဒးကၠောန် ချိုတ်ချိုတ်ပၠိုတ်ပၠိုတ်ရောၚ်။ အလဵုအသဳဍုၚ်ပိုဲဏံလေဝ် ဟွံကၠောန်ဟွံသေၚ် ကၠောန်လဝ်နွံမံၚ်ရ၊ ဆဂး မၞိဟ်စလာပ်ဗဇဴဂၠိုၚ်မံၚ်တုဲတှေ် ပိုဲတအ်ဗတိုက်သရိုဟ်ဟွံမာန် ဒှ်မံၚ်သာ်ဂှ်ရ” သာ်ဝွံ နာဲညာဏ်သိုက်ရာမာဉ် ဟီုလဝ်ရ။
ပ္ဍဲအခိၚ်အလဵုအသဳ NLD ဂွံလဝ်အဝဵုဏံဝွံ ပ္ဍဲသၞာံ (၂၀၁၈) ဂိတုဂျာန္နဝါရဳဂှ် မူဝါဒသၟတ်အလုံကၟိန်ဍုၚ်မွဲဂှ် ချူဓဇက်လဝ်တုဲ သ္ပဒတန်မာန်ကၠုၚ်ရ။ ပ္ဍဲ (၂၀၁၉) ဏံဝွံ မူဝါဒသၟတ်ဂှ်မ္ဂး သွက်ဂွံကောပ်ကာဲဂှ် ဒက်ပတိုန်ကၠုၚ်လဝ် ကမ္မတဳအဆံၚ်ကၟိန်ဍုၚ် (၂၇) တၠ နွံကၠုၚ်ဒၟံၚ်ရ။ တုဲပၠန် ပ္ဍဲတွဵုရးညးကဵုညး ညံၚ်သ္ဂောံဒက်ပတိုန် ဂကောံသၟတ် အဆံၚ်ဗဟဵုမာန်ဂှ်လေဝ် စၞောန်ပညုၚ်လဝ် နွံဒၟံၚ်ကီုရ။ နူ (၂၀၁၅) စဵုကဵုလၟုဟ်ဏံ ၜိုန်ရချူဓဇက်လဝ် မူဝါဒ နွံဒၟံၚ်ကီုလေဝ် သ္ဂောံလးထ္ၜး သွက်ကောန်ဍုၚ်အရၚ်တံကီု၊ နဲကဲဗျူဟာ ဂွံဓမံက်ရုပ်ရဴကီု ကၠးကၠးမးမး ဟွံမွဲဏီရောၚ် သာ်ဝွံ နာဲညာဏ်သိုက်ရာမာဉ် ဆက်သောၚ်ကလးလဝ်ရ။
ဗော်လုပ်ဒးဒုၚ်ရုဲမာဲဂမၠိုၚ် ပ္ဍဲပေဲါရုဲမာဲ (၂၀၂၀) ဏံဝွံ ဆေၚ်စပ်ကဵုကဏ္ဍသၟတ်တအ် အနာဂတ်ဂတဏံ သ္ဂောံတဴတက်တိုန်မာန်ဂှ် ပရေၚ်ပညာကီု၊ ပရေၚ်စဵုဒၞာဂဥုဲၜူမာဲကီု၊ ပရေၚ်ပိုန်ဒြပ်ကီု၊ ပရေၚ်အုပ်ဓုပ်ကီု၊ အခေါၚ်အရာကမၠောန်တအ်ကီုဂှ် ချူဓဇက်လဝ်မူဝါဒနွံတုဲ စန်ဒက်မာဲ အဓိက မာဲသၟတ်တံ သွက်ဂွံကဵုဗော်ညးတံရောၚ်။
