မာံညာခ၊ ဂိတုသေပ်တေမ်ဗာ ၃၀၊ ၂၀၂၀
ဟိုတ်နူဂဥုဲၜူမာဲပြးဇးဒၟံၚ် အလုံတွဵုရးဍုၚ်မန်မွဲတုဲ သၟတ်မန်တအ်ဗွဲမဂၠိုၚ် စောဲလာံဒၟံၚ်ဂှ်တုဲ ယဝ်ရ ညးစၞး နူကဵုဗော်ညဳသၟဟ်မန်တံ ဒးဒုၚ်ရုဲစှ် စိုပ်ကၠတ်ထဝ်မ္ဂး စပ်ကဵုကိစ္စဏအ် နကဵုအလဵုအသဳ ညံၚ်သ္ဂောံစွံအာရီုကီု၊ ညံၚ်သ္ဂောံသၠုၚ်ပ္တိုန်အသိၚ်တုဲ ညံၚ်ဂွံစဵုဒၞါကဵုမာန်ကီု နကဵုဗော် စွံအဓိက ဟီုဂးပတိုန်ထ္ၜးအာရောၚ် ဖက်ဆောညးအုပ်ကာ (၁) ဗော်ညဳသၟဟ်မန် ＂နာဲလျးတၟး＂ဟီုရ။
ဍုၚ်မွဲမွဲ ဂွံဇၞော်မောဝ်မာန်ကီု၊ ဗွိုၚ်ပရေၚ်ဍုၚ်ကွာန် ကေုာံ ဗွိုၚ်မဟာဇန်မန်ဂမၠိုၚ် ညံၚ်သ္ဂောံက္ဍိုက်ပ် သွက်အနာဂတ်မာန်ဂှ် သၟတ်မန်တအ် ဒှ်အဓိကဟေၚ်ရ။ သၟတ်မန်တအ်ဂှ် ပ္ဍဲဗွိုၚ်နာနာ သွက်ဂွံဒှ်က္ဍိုပ်သ္ကိုပ်ခိုဟ်မွဲဂှ် ညံၚ်ဟွံဂွံစောဲလာံအာကဵု ဂဥုဲၜူမာဲကီု၊ ညံၚ်ဂွံကတ်လ္ၚတ်အာ ပရေၚ်ပညာမာန် ရန်တၟံလဝ်တုဲ ညးတံ ဖျေံလဝ်မူဝါဒနွံရောၚ် နာဲလျးတၟး ဆက်ဟီုလဝ်ရ။
“မၞိဟ်စောဲမံၚ် ဂဥုဲၜူမာဲတအ် (အလဵုအသဳတံ) ရပ်ဂွံတှေ် ၜိုတ်ဖျေံဒုဟ် ကဵုမံၚ်ဒဏ်သၟး ဟွံတုဲရ၊ အဃောဖျေံမံၚ်ဒုဟ်ကဵုဍေံတအ်ဂှ် စိုတ်ဍေံကီု၊ ဒ္ဂေတ်ဍေံကီု ညံၚ်ဂွံကလေၚ်ဒက်ပ္တိုန်မာန်ဂှ် ညံၚ်ဂွံပံက်ဒၞာဲ ပဠေဝ်စရိုတ် ကဵုပညာမွဲမွဲမာန်ဂှ် ပိုယ်ဂိုတ်ဂ္စါန်ဏောၚ် ပိုယ်ချပ်လဝ်နွံရ＂ သာ်ဝွံ နာဲလျးတၟး ဟီုလဝ်ရ။
ဆက်တုဲမ္ဂး ပ္ဍဲအရာပရေၚ်ကဵုပညာဟီုဂှ် နဲကဲနွံမံၚ်နာနာသာ်လေဝ်၊ ပ္ဍဲဏအ်ဂှ် အလဵုအသဳသၟး၊ ဗော်ပရေၚ်ဍုၚ်ကွာန်သၟး ကၠောန် ဟွံတုဲရ၊ ဒးပံၚ်ကဵု ဂကောံမဟာဇန်တအ် တၠပညာတအ်တုဲ ဓမံက်ရုပ်ရဴ ကဵုပညာထေက်ရောၚ်။ မူဝါဒ သွက်ဂွံစဵုဒၞာဂဥုဲၜူမာဲကီု သွက်ဂွံဓမံက်ရုပ်ရဴကဵုပညာဂှ် ပ္ဍဲအလဵုအသဳ မူဝါဒဗိုန်ဗိုန်ဗတ်ဗတ် ဒးနွံရောၚ်၊ မူဝါဒသာ်ဂှ် ညံၚ်ဂွံမံက်ဂှ် နကဵုဗော်ညဳသၟဟ်မန် ဒးဂစာန်အာရောၚ် နာဲလျးတၟး ဟီုရ။
“ကမၠောန်သောၚ်ကၠး ဆေၚ်စပ်ကဵု ဂဥုဲၜူမာဲဏအ် ပ္ဍဲမူဝါဒ (ဗော်ညဳသၟဟ်မန်) ဖျေံလဝ် ပိုဒ် (၁၁) (ဃ) ကဵု (၁၆) (ဂ) ပါလုပ်မံၚ် (၂) တၚ်ဂှ် နကဵုသၟတ်မွဲတှေ် ပိုယ်မိပ်စိုတ်ဗွဲမလောန်ရ။ ပြသၞာဏအ်ဂှ် ဒှ်ပြသၞာဇၞော်ဇၞော်မွဲဏောၚ် ညးတအ်ညာတ်တုဲ ညးတအ် စုတ်လဝ် ပ္ဍဲကဏ္ဍပရေၚ်ထတ်ယုက်ရ။ မွဲသာ်ပၠန်ဂှ် ပြသၞာဏအ်ဂှ် ဆေၚ်စပ်ကဵု သၟတ်တအ်ဏောၚ် ညးတအ် ညာတ်ကေတ်တုဲ ပရေၚ်သၟတ်ပါလုပ်မံၚ် မွဲကဏ္ဍဏောၚ်၊ နကဵုပိုယ်လေဝ် မိပ်စိုတ်ဒုၚ်တဲမာန်ရ” သာ်ဝွံ ကေၚ်ကာဂကောံသၟတ်မန်လညာတ်တၟိ ＂နာဲဟံၚ်ပြာ်＂ ဟီုရ။
အတိုၚ်ဗော်ညဳသၟဟ်မန် ဖျေံလဝ်မူဝါဒဏအ် ယဝ်ရကဵုဖျုန်ကဵု ပရေၚ်ဂဥုဲၜူမာဲမ္ဂး ဒးပါ်ပတိတ် မွဲကဏ္ဍသက်က်ထေက်ရောၚ် ညာတ်ရ။ ကဏ္ဍဂဥုဲၜူမာဲဏအ်ဂှ် ဆက်စပ်မံၚ် ပ္ဍဲကဏ္ဍဗွဲမဂၠိုၚ်မဒှ်ရ။ ကိစ္စပသောၚ်ပြသၞာ ဂဥုဲၜူမာဲဏအ်ဝွံ စပ်ကဵုလၟေၚ်ကမၠောန် ဒးကၠောန်အာဂှ် နွံဗွဲမဂၠိုၚ်ရောၚ်။ အတိုၚ်မူဝါဒဖျေံလဝ်နွံမ္ဂး တန်တဴကဵုနဲကဲဗီုပြၚ်တုဲ နကဵုဗော် ထေက်ကဵု ဒးကၠောန်ဓမံက်ရုပ်ရဴမာန်ရောၚ် သာ်ဝွံ နာဲဟံၚ်ပြာ် ဆက်ဟီုလဝ်ရ။
ပ္ဍဲကၟိန်ဍုၚ်ပိုယ်ဏအ်ဂှ် နကဵုအလဵုအသဳတအ် သွက်ဂွံစဵုဒၞာဂဥုဲၜူမာဲဂှ် ဒက်ပ္တိုန်လဝ်မူဝါဒ ကဏ္ဍ (၅) ကဏ္ဍ နွံဒၟံၚ်ကီုရ။ ၜိုန်ရမူဝါဒဏအ် နွံဒၟံၚ်ကီုလေဝ် ဆေၚ်စပ်ကဵု ပရေၚ်လွဳလွတ်ကီု၊ ပရေၚ်ရပ်စပ်ကီု၊ ဇြဟတ်တံရိုဟ်မၞိဟ်ကီု၊ သြန်ဘဏ္ဍာကီု၊ ဌာနရုၚ်ဂဥုဲကဵုဌာနလွဳလွတ်ကီု ကပေါတ်ကရိယာနာနာတအ်ဂှ် တၚ်ဍိုန်လျ နွံဒၟံၚ်တၟာဂလိုၚ်ရ။
ဟိုတ်ဒှ်သာ်ဂှ်ရ အလဵုအသဳတံ ဓမံက်ရုပ်ရဴဟွံမာန် ဂွံဆဵုကေတ်ရ။ ပ္ဍဲကဵုတၚ်ဍိုန်လျဏအ် ၜိုတ်ထေက်ကြိုက် ယဝ်ဗော်ညဳသၟဟ်မန် ဓမံက်ရုပ်ရဴု သၠုၚ်ပ္တိုန်အသိၚ်မာန်မ္ဂး ပရေၚ်စောဲလာံဂဥုဲၜူမာဲဏအ် ယအ်မာန်ရောၚ် သာ်ဝွံ နာဲဟံၚ်ပြာ် ဆက်ဟီုလဝ်ပၠန်ရ။
ပ္ဍဲကဵုဂကောံမဟာဇန်မန် လ္တူဍုၚ်မတ်မလီုတံဂှ် ဂကောံသၟတ်မန်လညာတ်တၟိကီု၊ ဂကောံဖောအ်ဗြေဝ်မန်တၞဟ်တၞဟ်တအ် က္ဍိုက်က္ဍိုပ်တုဲ ပရေၚ်ကဵုပညာကီု၊ သွက်ဂွံဗတိုက်သရိုဟ် ဂဥုဲၜူမာဲကီု၊ သွက်ဂွံဒက်ပ္တိုန် မူဝါဒကီု ကၠောန်သ္ပလဝ်နွံကီုရ။
