တွဵုရးဍုၚ်မန် ဒေသတ္ကံခၟိုၚ် ပ္ဍဲကွာန်ဝါဍောတ်ဂှ် ဟိုတ်နူကဵုယဲကိုဝ်ဝေဒ်ဏံတုဲ ကပေါတ်တိတ်နူဒေသ ကပေါတ်ကၠောန် နကဵုပညာကွတ်တဲတံ ပရေၚ်သ္ဂောံသွံရာန်ဂှ် ဒှ်ကၠုၚ်အခက်ခုဲရရောၚ် ဂွံတီကေတ်ရ။
အခိၚ်သၞာံကၠာတေံဂှ် ပရေၚ်သွံရာန်ကပေါတ်တံခိုဟ်ဒၟံၚ်တုဲ လၟုဟ်ဝွံ ဟိုတ်နူကဵုယဲကိုဝ်ဝေဒ်တုဲ ပရေၚ်သွံရာန်ကပေါတ်ပညာကွတ်တဲ (လက်မှုပညာ) ဂှ် သွံစဟွံခိုဟ်ရရောၚ် တၠဆေၚ်ကပေါတ်ကွတ်တဲ (555) ညးမကၠောန်ဒၟံၚ်ၜံက်တဝ် ရဲကွာန်ဝါဍောတ် နာဲမန်ၚိုဲဝေန် ဟီုဝွံရ။
“ဠတေံဂှ်တှ်ေ သွံစခိုဟ်မံၚ်ရလေဝ်၊ လၟုဟ်ဂှ် ကဵုယဲကဝ်ဝေဒ်ဏံဂှ်တှ်ေ မၞိဟ်အာကၠုၚ်လေဝ်ဟွံမွဲ၊ ကၟုဲလေဝ်ဟွံမွဲရ။ ဠတေံဂှ်တှ်ေ ကၟုဲဍုၚ်သၟာၚ်လေဝ်ကၠုၚ်၊ ကၟုဲအပ္ဍဲဍုၚ်ဏံလေဝ်ကၠုၚ် တုဲတှ်ေ ဖံက်သေဝ် (ဖောက်သည်) ကၠုၚ်ကေတ်မံၚ်ဂၠိုၚ်ဂၠိုၚ်တံဂှ်လေဝ်ကၠုၚ်ရ၊ လၟုဟ်ဂှ် မုဟွံဂွံကၠောန်ကမၠောန်ရပုဟ်” သာ်ဝွံ နာဲမန်ၚိုဲဝေန် ဂးရ။
ပ္ဍဲကဵုကပေါတ်ကၠောန်ဒၟံၚ် နကဵုပညာကွတ်တဲဂှ် ၜံက်တဝ်၊ လေံဒစုန်၊ ကောန်ရုပ်ချေံ၊ ကောန်ရုပ်စိၚ်၊ နာဍဳ၊ ကောန်ရုပ်ဂစေံတံကီု ကောန်ရုပ်ကၠောန်ကဵုစက္ခူတံလေဝ် ပါဒၟံၚ်ရရောၚ် ဂွံတီကေတ်ရ။
တုပ်သာ်ဂှ်ကီု ကာလယဲကိုဝ်ဝေဒ်ဏံ ပရေၚ်သွံရာန်ကွာၚ်ေၚပ်ဂှ် သ္ဂောံအောန်စှ်ေကၠုၚ်တုဲ ဒးနုက်ပ္တိတ်ထောံ ကောန်ကမၠောန်တံလေဝ်နွံရောၚ် ပွိုၚ်ဍုၚ်ၜါသွာၚ် ကွာန်လာန် ညးတၠကမၠောန်ကၠောန်ကွာၚ်ေၚပ်မွဲတၠ ဟီုရ။
တၠကမၠောန်ကၠောန်ကွာၚ်ေၚပ် မိဆာန်ဂှ် “အခိၚ်တေံမၞိဟ်ကၠောန်ကွာၚ်ဂှ် နွံၜိုတ် ၂၀ တၠ၊ လၟုဟ်ယဲကိုဝ်ဝေဒ်ဏံဂှ် မၞိဟ်ကၠောန်နွံမံၚ် ၜိုတ် ၄၊ ၅ တၠရ။ အခိၚ်ကိုဝ်ဝေဒ်ဏံဂှ် အာကၠုၚ်လေဝ်ကျာတ်မံၚ်တုဲတှ်ေ မၞိဟ်ဗကန်ကွာၚ် (အော်ဒါ) ဂှ်လေဝ်ပိုတ်အာ သွံရာန်စဂှ်လေဝ်အောန်အာရ၊ တုဲပၠန် ကမၠောန်ဂှ်လေဝ်ဒးဇူထောံ ကမၠောန်လေဝ် ဟွံဂွံကၠောန်ရတှ်ေ ဒးယှအ်ထောံကောန်ကလောန်တံလေဝ် ဒှ်ကၠုၚ်အခက်ခုဲမာဟလိုၚ်ရ” သာ်ဏံ ညးဂးရ။
ပ္ဍဲကဵုတွဵုရးဍုၚ်မန် အခိၚ်ကာလယဲကဝ်ဝေဒ်ဏံဝွံ ပရေၚ်ကူသာန်သွံရာန်တံဂှ် ဆေၚ်စပ်ကဵု ထၜိုတ်တံကီု၊ ၜဵုတံကီု ပရေၚ်ဆက်စၠောံဂၠံၚ်ဍာန်ပိုတ်အာတုဲ သ္ဂောံသွံရာန်ဂှ် ဒှ်ကၠုၚ်အခက်ခုဲရရောၚ်။
နကဵုအလဵုအသဳကၟိန်ဍုၚ်လေဝ် ပၟိက်ဟွံဇၞော်မွဲသာ် ညံၚ်ဟွံဂွံတိတ်တရဴ၊ ညံၚ်ဂွံမံၚ်စံၚ်အာ အပ္ဍဲသ္ၚိဂှ်လေဝ် ဆဝ်ဗ္ၚုဟ်မံၚ်ရောၚ် ဂွံတီကေတ်ရ။
