ဝဏ္ဏမာန်၊ ဂိတုအံက်တဝ်ဗာ ၁၃၊ ၂၀၂၀
သွဟ်ပေဲါရုဲမာဲ (၂၀၂၀) တုဲကၠုၚ်ဂိတုနဝ်ဝေမ်ဗာ (၈) ဂှ် နကဵုညးစၞးဗော်ညဳသၟဟ်မန်ဝွံ သွာၚ်ကၠတ်ထဝ်တွဵုရး (၆) တၠ၊ သွာၚ်ကၠတ်ထဝ်ကောန်ဂကူ (၃) တၠကဵု သွာၚ်ကၠတ်ထဝ်ညးဍုၚ်ကွာန် (၂) တၠ၊ ပ္ဍဲတွဵုရးဍုၚ်ကရေၚ် စၞးကောန်ဍုၚ်အရၚ် (၁) တၠ ပံၚ်သီုဖအိုတ် (၁၂) တၠ ဇၞးလဝ်ရောၚ် ကမ္မတဳအံၚ်ဇၞးမာဲ ဗော်ညဳသၟဟ်မန်ဗဟဵုမွဲတၠ ဟီုထ္ၜးသာ်ဝွံရ။
“နကဵုညးစၞးဗော်ညဳသၟဟ်မန်ဂှ် ပွိုၚ်ဍုၚ်ရေဝ် သီု (၅) ဒၞာဲ၊ ပွိုၚ်ဍုၚ်ဇြပ်ဗုဂှ် ကၠတ်ထဝ်တွဵုရး (၂) မွဲဒၞာဲ၊ ပွိုၚ်ဍုၚ်မုဟ်ဍုၚ် ဂှ် ကၠတ်ထဝ်တွဵုရး (၂) မွဲဒၞာဲ၊ ကၠတ်ထဝ်ညးဍုၚ်ကွာန်ကဵု ကၠတ်ထဝ်ကောန်ဂကူဂှ် မွဲမွဲဒၞာဲ၊ ပွိုၚ်ဍုၚ်ၜါသွာၚ် ကၠတ်ထဝ်တွဵုရး (၁) မွဲဒၞာဲ၊ ပွိုၚ်ဍုၚ်ကျာ်မြဟ် ကၠတ်ထဝ်တွဵုရး (၂) မွဲဒၞာဲ၊ တွဵုရးဍုၚ်ကရေၚ် စၞးကောန်ဍုၚ်အရၚ် (၁) ဒၞာဲ ပံၚ် (၁၂) ဒၞာဲဇၞးလဝ်နွံ” သာ်ဝွံ ကမ္မတဳအံၚ်ဇၞးမာဲ ဗဟဵု နာဲတာန်ယှိုဲ ဟီုလဴထ္ၜးရ။
လတူသွဟ်ပေဲါရုဲမာဲ ပ္ဍဲတွဵုရးဍုၚ်မန်ဂှ် ပွိုၚ်ဍုၚ်ဇြပ်ဗု၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်ပံၚ် ဗော်ညဳသၟဟ်မန် ပွိုၚ်ဍုၚ်တံ ဒှ်မံၚ် သၠေဟ်ပၟာ သံသယနွံတုဲ လ္ၚတ်ဂၠိုက်ဂၠာဲမံၚ် တၚ်နၚ်ဓဝ်ဍာံနွံရ။
“စရၚ်ဇၞးမာဲဂှ် နကဵုဗော်ပိုဲ သ္ပဒတန်တုဲယျ၊ ဆဂး သှေ်မံၚ် ခက်ခုဲမံၚ် ပွိုၚ်ဍုၚ်လ္ၚဵုဂှ် ဗီုကဵုပွိုၚ်ဍုၚ်ဇြပ်ဗု၊ ပွိုၚ်ဍုၚ်ပံၚ်၊ ပွိုၚ်ဍုၚ်ကျာ်မြဟ်တံစဂှ်တှေ် ပိုဲကဵုလဝ် အခေါၚ်လ္ၚတ်ဂၠိုက်ဂၠာဲ ဟိုတ်ဖဵုဍေံ ဗီုလဵု ဗီုလဵု တုဲတှေ် သွက်ဂွံဆက်ပတိုန်ထ္ၜးအာ အဆံၚ်ဆံၚ်ဍေံနွံ” သာ်ဏံ ဖက်ဆေားညးအုပ်ကာ လၟိဟ် (၂) နာဲသာန်တေန် ဟီုရ။
နကဵုညးဗော်ညဳသၟဟ်မန်ဝွံ အလုံမွဲတွဵုရးဍုၚ်မန်ဂှ် ဖအိုတ်လုပ်ပြိုၚ် (၈) ပွိုၚ်ဍုၚ်တုဲ သွာၚ်ကၠတ်ထဝ်ညးဍုၚ်ကွာန် (၈) ဒၞာဲ၊ သွာၚ်ကၠတ်ထဝ်ကောန်ဂကူ (၁၀) ဒၞာဲ၊ သွာၚ်ကၠတ်ထဝ်တွဵုရး (၁၆) ဒၞာဲကဵု ညးစၞးကောန်ဍုၚ်အရၚ် ဗမာ မွဲတၠ လုပ်ပြိုၚ်လဝ်နွံရ။
ပ္ဍဲကဵုပေဲါရုဲမာဲ (၂၀၂၀) ဏံဂှ် ဟိုတ်နူဗော်ပရေၚ်ဍုၚ်ကွာန်ပံၚ်ကောံ ဒှ်အာမွဲဗော်ဓဝ်တုဲ ပ္ဍဲတွဵုရးဍုၚ်မန်ဂှ် ပွိုၚ်ဍုၚ်ဗွဲမဂၠိုၚ် သွက်ဂွံဇၞးမာန်ရောၚ် ညးအခါတ်အကာဲ ပရေၚ်ဍုၚ်ကွာန်ဂမၠိုၚ် သ္ၚဳဂၠိပ်တော်ဆလဝ်ကီုလေဝ် ၜိုတ်စၟဳတော်လဝ်ဂှ် ပဲါနူပွိုၚ်ဍုၚ်ရေဝ်တုဲ သှေ်ပွိုၚ်ဍုၚ်တၞဟ်တၞဟ်ဂှ် ဇၞးဆဗၞတ်ဓဝ်ရ။
“ဟိုတ်ဂွံဇၞးအောန်ဂှ် အဓိက (၂) တၚ်လေဝ် မွဲတၚ်ဂှ်တှေ် သၟာကမၠောန်ဆုဲပြံၚ်တံ ဇွောဝ်လုပ်စိုပ်ကၠုၚ် တိဍာ်ဍုၚ်မန် လၟိဟ်ဂၠိုၚ်ကွေံကွေံဂှ် မွဲတၚ်၊ မွဲတၚ်ပၠန်ဂှ်တှေ် ညးဂွံအခေါၚ်ကဵုမာဲလၟိဟ်ဂကူမန်တံ အာထောံဍုၚ်သေံလၟိဟ်ဂၠိုၚ် အဓိကတှေ် (၂) တၚ်ဏံ မန်ကျဂၠိုၚ်” သာ်ဏံ ဖက်ဆောညးအုပ်ကာ ဗော်ညဳသၟဟ်မန် (ဗဟဵု) နာဲလျးတၟး ဟီုရ။
တုဲကၠုၚ်ကာလပေဲါရုဲမာဲ (၂၀၁၅) တေံဂှ် နကဵုညးစၞးဗော်ကောန်ဂကူမန်ကဵု ဗော်ဒဳမဵုကရေဇြဳအလုံရးမန်ဂှ် ပွိုၚ်ဍုၚ်ရေဝ် ကၠတ်ထဝ်ကောန်ဂကူ (၁) တၠကဵု ကၠတ်ထဝ်တွဵုရး (၁) တၠ ပံၚ် (၂) တၠ၊ ပွိုၚ်ဍုၚ်မုဟ်ဍုၚ်ဂှ် ကၠတ်ထဝ်တွဵုရး (၁) တၠကဵု ပွိုၚ်ဍုၚ်ၜါသွာၚ် ကၠတ်ထဝ်တွဵုရး (၁) တၠ ပံၚ်ကၠတ်ထဝ်တွဵုရး (၃) တၠကဵု ကၠတ်ထဝ်ကောန်ဂကူ (၁) တၠ ပံၚ် (၄) တၠ ကေၚ်ဇၞးကၠုၚ်လဝ်ရ။
ပ္ဍဲကဵုတွဵုရးဍုၚ်မန်ဂှ် ဗော်ပရေၚ်ဍုၚ်ကွာန် (၁၇) ဗော်ကဵု ပူဂဵု ညးစၞးကၠတ်ထဝ်သွာၚ်နာနာ (၃၀၂) တၠ လုပ်ပြိုၚ်ရ။ ဖအိုတ်ရုၚ်မာဲနွံ (၉၇၃) ရုၚ်တုဲ မၞိဟ်ဂွံအခေါၚ်ကဵုမာဲ နွံ (၁,၈၄၇,၇၈၀) တၠဂှ် စရၚ်မၞိဟ်ကၠုၚ်ကဵုမာဲ နွံ (၁,၀၆၉,၆၅၆) တၠ တၟော်ကဵုဍိုပ်ကၠံမ္ဂး လၟိဟ် (၅၈%) နွံရ။ ပေဲါရုဲမာဲ (၂၀၁၅) တေံဂှ် မၞိဟ်ကၠုၚ်ကဵုမာဲ (၅၁.၃၃%) နွံရ။
