ဌာန်ပရိုၚ်မန် (ဇြပ်ဗု၊ ဒဳဇြေမ်ဗာ ၁၇၊ ၂၀၂၀)

ပ္ဍဲဂိတုဒဳဇြေမ်ဗာ (၁၇)၊ အခိၚ်တ္ၚဲစေၚ်ဂှ် ရပ်ဂွံဂဥုဲၜူမာဲ (၂၂၈) မ၊ ပ္ဍဲကဵုသ္ၚိမွဲမ မၞုံပ္ဍဲကွာန်ပ္ၚ၊ ပွိုၚ်ဍုၚ်ဇြပ်ဗုဂှ် ဂွံတီကေတ် နူရုၚ်ဗၠာဲသၟိၚ်ဍုၚ်ဇြပ်ဗုရ။
အတိုၚ်ပရိုၚ်ဂဥုဲၜူမာဲဂှ်မ္ဂး ညးတန်တဴဒၟံၚ် ပ္ဍဲကွာန်ပ္ၚ ပ္ဍဲကဵုသ္ၚိ မိဨမန် (က) မချဵုဂှ် ဂကောံဒပ်အထံက်အရီုအမှုရာဇဝတ်ကဵု ဂကောံဒပ်ဗၠာဲသၟိၚ် ဍုၚ်ဇြပ်ဗုတအ် လုပ်ဂၠိုက်ဂၠာဲစၟဳစၟတ်တုဲ ရပ်ဂွံဂဥုဲၜူမာဲ ပ္ဍဲဇရေၚ်တာန်ဝေန်အံၚ် (က) အဗျု (၂၉) သၞာံကဵု မိဨမန် (က) မိချဵု (၃၈) သၞာံတအ်ရ။
“ဒပ်အထံက်အရီုအမှုရာဇဝတ်ကဵု ဂကောံပိုယ်တအ် ပံၚ်တောဲတုဲ အတိုၚ်ဂွံပရိုၚ်ဂှ် ပိုယ်တအ် လုပ်ရပ်ရ၊ ရပ်ဂွံဂဥုဲၜူမာဲ (၂၂၈) မရ၊ သီုမၞိဟ်ၜါဂှ် ဒှ်မၞိဟ်သွံဂဥုဲၜူမာဲ သီုၜါရ၊ အတိုၚ်သၞောဝ်ဥပဒေဂှ် ရပ်စပ်လဝ်ရ” သာ်ဏံ ဒုဂအုပ်ဗၠာဲသၟိၚ် (ဒုရဲအုပ်) ဂျဝ်နိုၚ် နူဗဒိုပ်ဗၠာဲသၟိၚ်ဍုၚ်ဇြပ်ဗု ဟီုရ။
နူကဵုတာန်ဝေန်အံၚ် (ခ) အဗျု ဂှ် အရံၚ်သာ် ပ္ကဴ WYမလိက်ပါ ဂဥုဲၜူမာဲ (၁၄၀) မ ၊ အရံၚ်သာ်မိတ် WYမလိက်ပါ ဂဥုဲၜူမာဲ (၅၇)မ ၊ ပ္ဍဲကဵုပဠောံအပ္ဍဲ မိဨမန် (ခ) မိချဵု ဂှ် အရံၚ်သာ်ပ္ကဴ WY မလိက်ပါ ဂဥုဲၜူမာဲဂှ် (၃၁) မ ၊ ပံၚ်ဖအိုတ် ဂဥုဲၜူမာဲ (၂၂၈) မ ဂၠိက်ဂၠာဲစၟဳစၟတ်ဂွံလဝ်ဂှ် ဂွံတီကေတ် နူကဵုစရၚ်စၟတ်သမ္တီ ဗၠာဲသၟိၚ်တအ်ရ။
လ္တူမၞိဟ်ၜါဏံဂှ် နူကဵုရုၚ်ဗၠာဲသၟိၚ်ဍုၚ်ဇြပ်ဗုတအ် နကဵုဂဗုတ် မယ(ပ)၆၇/၂၀၂၀၊ ဂဗုတ်စိုတ်ပြံၚ်သၠာဲဂဥုဲၜူမာဲ -၁၉(က)/၂၀(က)/၂၁ တအ် ပံက်လဝ်ဂဗုတ်နွံမံၚ်ဏောၚ် ဂးရ။
“လၟုဟ်မှဂွံရပ်စပ်ဂှ် လဇုဲလဇမံၚ်ရ၊ ပ္ဍဲကွာန်တှေ် ပ္ဍဲကဵုပြးဂဥုဲၜူမာဲဂှ် ဂကောံဏံယၟုဇၞော်မံၚ်၊ ကဵုဂကောံကၠတ်ကွဳစက်တအ်လေဝ် ဆက်စပ်မံၚ်ညးသ္ကအ်ကီုဏောၚ် ဟီုဂးမံၚ်ပ္ဍဲကွာန်အိုတ်ရ၊ ရပ်စပ်ဂွံဗီုဏံဂှ် တၚ်မံၚ်ဂုဏ်ရ၊ ဆဂး ခြာဟွံလအ် ဂွိၚ်ဖေက်ကလေၚ်ဗၠးတိတ်ကၠုၚ်ပၠန်” သာ်ဏံ ကောန်ကွာန်ပ္ၚမွဲတၠ ဟီုရ။
ပ္ဍဲကဵုသၞာံ (၂၀၂၀) ဏံ ပ္ဍဲပွိုၚ်ဍုၚ်ဇြပ်ဗု ၜိုန်ရရပ်ဂွံလဝ် ဂဗုတ်ဂဥုဲၜူမာဲ (၈၁) ဂဗုတ်နွံကီုလေဝ် အပ္ဍဲဂှ်မ္ဂး မၞိဟ်သွံရာန်ဒၟံၚ်မွဲတဆံၚ်တအ်ကဵု မၞိဟ်သုၚ်စောဲမံၚ်တအ်ဂှ်ဟေၚ်ဂၠိုၚ်ရောၚ် ဂွံလ္ၚတ်တီကေတ်ရ။