ဗော်ဍုၚ်မန်တၟိ ကၠောန်သ္ပ ပေဲါဆဵုဂဗ သောၚ်ကလး သၠာဲဂတးလညာတ် ကုညးဍုၚ်ကွာန်

by | Dec 3, 2020 | ပရိုၚ် | 0 comments

မိလတိုပ်ဗု၊ နဝ်ဝေမ်ဗာ ၂၇၊ ၂၀၂၀

ပ္ဍဲကဵုစၟတ်တ္ၚဲ (၂၆-၁၁-၂၀၂၀) ဂှ် နူဗော်ဍုၚ်မန်တၟိ ကၠောန်သ္ပပေဲါဆဵုဂဗ သောၚ်ကလး သၠာဲဂတး လညာတ် ကုညးဍုၚ်ကွာန် ဒၞာဲရုၚ်ဆက်ဆောံ လတူဍုၚ်ဇြပ်ဗုဂှ်ရ၊ တၚ်ရန်တၟံ ကၠောန်ပေါဲဆဵုဂဗ သၠာဲဂတးလညာတ် ကုညးဍုၚ်ကွာန်ဏံဂှ် ကမ္မတဳရေၚ်တၠုၚ်ကေၚ်ကာဗဟဵု နာဲဗညာလဴ ဟီုထ္ၜးသာ်ဏံရ။
“အဓိကဂှ်တှေ် ပိုဲကဵုကသပ် ကေတ်ကသပ် လ္တူညးဍုၚ်ကွာန်တံရ၊ လၟေၚ်ကမၠောန်ဗော်ပိုဲလေဝ် မွဲသၞာံမွဲအလန် ဗော်ဍိုက်ဍိုပ်တုဲ ပံၚ်ကဵုခရိုၚ် စှေ်ဆဵုဂဗကဵု ညးဍုၚ်ကွာန်တံဂှ် ကၠောန်မံၚ်လၟေၚ်ၚ်ရ၊ ဆဂး သၞာံဏံဂှ် ဟိုတ်နူကဵု အကာဲအရာယဲကပ်ဏံတုဲ ချပ်လဝ်ဆဵုဂဗဂှ်တှေ် ဟွံဒှ်ဆဵုပုဟ်၊ အကြာဏံဂှ် လၟေၚ်ကမၠောန် ရုၚ်ဆက်ဆောံလေဝ် ဆဵုဂဗကဵု ညးဍုၚ်ကွာန်တုဲ ကဵုကသပ်လ္တူရုၚ်ဂှ် အစဳဇန်ညးတံလေဝ်နွံမံၚ်၊ ဟိုတ်ဂှ်ရ ဗော်ပိုဲလေဝ် ပံၚ်ကဵုညးတံတုဲ ဒုၚ်သဇိုၚ်ကဵု ဒၞာဲရုၚ်ဆက်ဆောံနွံကဵုဒှ် ကြပ်ကဵုရုၚ်ကဵုဒှ် ဗဟဵုပိုဲဍိုက်ဍိုပ်တုဲ စှေ်ဆဵုဂဗသဳကၠဳကဵု ညးဍုၚ်ကွာန်တံ” သာ်ဏံ ကမ္မတဳကေၚ်ကာဗဟဵု နာဲဗညာလဴ ဟီုရ။
ပေါဲဆဵုဂဗ သောၚ်ကလးသၠာဲဂတးလညာတ် ကုညးဍုၚ်ကွာန်ဗီုဏံဝွံ ဒုၚ်သဇိုၚ်ကဵုခရိုၚ်တုဲ ပ္ဍဲဒၞာဲရုၚ်ဆက်ဆောံ နွံကီု ဒၞာဲကြပ်ကဵုရုၚ်ဆက်ဆောံကီု ကၠောန်အာတုဲ ဒုၚ်သဇိုၚ်ကဵု ခရိုၚ်မတ်မလီုတုဲ ကၠောန်အာ ပ္ဍဲခရိုၚ်သဓီု မွဲအလန်၊ ပ္ဍဲဍုၚ်ဇြပ်ဗုမွဲအလန်၊ သွက်မုဟ်ဍုၚ်ဂှ် ကၠောန်ပ္ဍဲရုၚ်ခရိုၚ်မွဲအလန် ပ္ဍဲဍုၚ်ရေဝ်ဂှ် ဒုၚ်သဇိုၚ်ကဵု ရုၚ်ဆက်ဆောံရေဝ်တုဲ ကၠောန်ပ္ဍဲဗဒိုပ်ဝါဇြေန်မွဲအလန် လပါ်ရုၚ်ဆက်ဆောံဍာ်တူဂှ် ကၠောန်ပ္ဍဲရုၚ်ဆက်ဆောံ ဍာ်တူမွဲအလန် ပွိုၚ်ဍုၚ်ကျာ်ပိဂှ် ကၠောန်အာ ပ္ဍဲရုၚ်ဆက်ဆောံကျာ်ပိမွဲအလန် သာ်ဏံနွံတုဲ တၚ်အဓိက ကဵုလညာတ် ကုညးဍုၚ်ကွာန်တံဂှ် ကမ္မတဳကေၚ်ကာဗဟဵု နာဲဗညာလဴ ဆက်ဟီုထ္ၜးသာ်ဏံရ။
“ပိုဲဂှ် ပါ်လဝ်တာလျိုၚ် ညးကဵုညး သွာၚ်လဵုဂှ် ကေၚ်ကာလဵု ဍိုက်ဍိုပ်တုဲ စှေ်သဳကၠဳအာဏောၚ်၊ ကၠာဂိတုဏံ ဟွံအိုတ်တှေ် ညံၚ်ဂွံကၠောန်တုဲရ၊ အဓိက မုပိုဲကဵုလညာတ်ကဵု ညးဍုၚ်ကွာန်တံဂှ်တှေ် ကဵုကသပ် ကေတ်ကသပ် လ္တူညးဍုၚ်ကွာန်တံရ၊ ညးတံ ဂွံထံက်ထ္ၜးကဵုပိုဲမာန်ဂှ်တှေ် ပိုဲလဴစ အကာဲအရာ ပရေၚ်ဍုၚ်ကွာန်လၟုဟ် ဒှ်မံၚ်ဗီုလဵု၊ ပရေၚ်ၜိုဟ်လလမ်ကီု ပရေၚ်လ္တူပေါဲရုဲမာဲဏံ ဒှ်မံၚ်ဗီုလဵုကီု ပရေၚ်ဆေၚ်ကဵု ဂဥုဲၜူမာဲကဵုသၟတ်တံကီု တုဲတှေ် ပရေၚ်ကမၠောန်ရုၚ်ဆက်ဆောံပိုဲကီု ပိုဲလဴကဵုညးဍုၚ်ကွာန်၊ ဂကောံနာနာတံတုဲ ညးတံ ဗီုလဵုမိက်ဂွံကဵုကသပ်ကဵုဗော်ပိုဲ ပိုဲကေတ်လညာတ်ညးဍုၚ်ကွာန်တံရ” သာ်ဏံ ကမ္မတဳရေၚ်တၠုၚ်ကေၚ်ကာဗဟဵု နာဲဗညာလဴ ဟီုထ္ၜးရ။
ပေါဲဆဵုဂဗ သောၚ်ကလးသၠာဲဂတးလညာတ် ကုညးဍုၚ်ကွာန်တံဝွံ နူဗော်တံ ၜိုန်ရဖျေံလဝ်အစဳဇန်ဆဵုဂဗကဵု ညးဍုၚ်ကွာန်တံကီုလေဝ် ဟိုတ်နူယဲကပ် Covid-19 တုဲ စှေ်ဆဵုဂဗ ကုညးဍုၚ်ကွာန်တံ ဟွံပြေပြံၚ်ဂှ်ရ နူကဵု ဗော်တံပလဝ်တိုၚ်ကဵု ဂကောံအ္စာဂဥုဲ၊ ဂကောံအ္စာဘာ၊ ဂကောံသ္ဂံၚ်တြေံ၊ ဂကောံဂူယာ၊ ဂကောံသၟတ်၊ ဂကောံညးဗြဴ ပလဝ်တိုၚ် ဒုၚ်သဇိုၚ်ကဵု ဂကောံ (၆) ဂကောံဏံတုဲ ဘိက်လဴကလးလဝ် ပ္ဍဲပေါဲသဳကၠဳဏံတုဲ နူ ဂကောံတံဏံမွဲအဆံၚ် ညံၚ်ညးတံ ဂွံလဴကဵုညးဍုၚ်ကွာန် သွာၚ်ညးကုညးတံလေဝ်နွံ သာ်ဏံ ဂွံတီကေတ်ရ။

Written by

Related Posts

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲကဵုရုင်ပွိုင်ဍုင် (ရုင်အာမ်ဖေ) သင်ခႅဠဗူရဳ (ဝင်က) မၞုံခရိုၚ်ကမ္မရဳ ကၟိန်ဍုၚ်သေံဂှ်ဝွံ သၞာံဏအ် စနူဂိတုဂျောန်မံက် ဓမံက်ရုပ်ရဴ ကၠောန်သၠုင်ပတိုန်အဆံင်ၝာတ် ကဵု ညးဍုင်ကွာန်တံတုဲ စဵုကဵုသၞာံဏံအိုတ် ကၠောန်ကဵုညံင်ဂွံတုဲဒှ်အာရောင် ဂွံတီကေတ် နူသၞာဲဒဴကၠောန်ဒၟံင်ကမၠောန် (ပ္ဍဲရုင်အာမ်ဖေ) မွဲတၠဂှ် ဟီုရ။

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

နူကဵုဂကောံညဳသၟဟ်မန်ယူရောပ် က္ဍိုက်ပ်တုဲ သွက်သၞာံ ၂၀၂၅ ဏအ် ကၠောန်ဗဒှ်လဝ်သဘင်ဥတုကညင် မရနုက်ကဵု ၄ ဝါ ပ္ဍဲကဵုဍုင်နေဝ်တာလာန် တုဲဒှ်အာရ။

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

နူကဵုဂကောံရပ်လွဟ်ဒဳကေဗဳအေ ကေုာံ ဗော်ကေအေန်ယူ မထိၚ်ဒဝ်လဝ် ပ္ဍဲဍုၚ်ကျာ်ပိတအ်ဂှ် စနူဂိတုဂျူလာၚ် စၟတ်တ္ၚဲ (၂၅) ဂှ်တုဲ ကၟာတ်ကၠေံလဝ်အခေါင် သွံရာန် ဍာ်တၞးၝာဲကထီု ကော်ဂး ဍာ်တၞးဘိင်ဂမၠိုင်ရောင် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.