ဌာန်ပရိုၚ်မန် (မုဟ်ဍုၚ်၊ ဒဳဇြေမ်ဗာ ၈)

ဌာန်ပရိုၚ်မန် (မုဟ်ဍုၚ်၊ ဒဳဇြေမ်ဗာ ၈)
ပ္ဍဲဂိတုဒဳဇြေမ်ဗာ ပ္ဍဲကဵုစၟတ်တ္ၚဲ (၈) အခိၚ်သဝ်တ္ၚဲဂှ် ဗၠာဲသၟိၚ်လ္တူဍုၚ်မုဟ်ဍုၚ်တအ် လုပ်ရပ်သီကေတ်လဝ် ကၠအ်တဵုလွဳဒၟံၚ်တၞးဘိၚ် ပ္ဍဲကဵုကွာန်လာံသဴ၊ ဂအုံကွာန်ၜဝ်၊ ပွိုၚ်ဍုၚ်မုဟ်ဍုၚ်ရ။
ဗၠာဲသၟိၚ်လ္တူဍုၚ်မုဟ်ဍုၚ်တအ် ဂွံလဝ်ပရိုၚ်တၚ်နၚ် ဒဒှ်ရသဝ်ညဳညဳထောန်(ခ) ညဳညဳ သွံဒၟံၚ်တၞးဘိၚ်တအ်ဂှ်တုဲ လုပ်ဂၠိုက်ဂၠဲါ ပ္ဍဲကဵုသ္ၚိညးရ။ ပ္ဍဲကဵုဗွိုၚ်ကၠအ်သ္ၚိညးဂှ် တဵုလဝ်တၞံဘိၚ် ဗွဲမစှေ်သၞောတ်တုဲ အပ္ဍဲဂှ်မ္ဂး တၞံအဝယ်(၁၄) ၝောံတဲဂှ် နွံဒၟံၚ်ၜိုတ်(၇၀) တၞံ၊ မအလတ်(ပလုမ်)လဝ်ဂှ် နွံ(၁၂) တၞံ နကဵုသက်သဳ ရပ်ဂွံလဝ်ရ။
“ဟိုတ်နူကဵု ကောန်ကွာန်တအ် ကဵုလဝ်ပရိုၚ်တုဲ ပိုယ်အာရပ်စပ်ရ၊ နကဵုတၞံတၞးဘိၚ်(၇၀) တၞံကဵု မအလတ်(၁၂)တၞံဂှ်လေဝ် ရပ်ဂွံလဝ်ရ၊ ညံၚ်ဂဥုဲၜူမာဲဂွံအိုတ်အးမာန်ဂှ် ညးဍုၚ်ကွာန်တအ်လေဝ် ပံၚ်တောဲကဵုပိုယ်တအ်ကီုညိ။ ယဝ်ရကဵုပိုယ်ပရိုၚ်တှေ် ပိုယ်ဟွံဓမံက်ထ္ၜးပုဟ်၊ ညံၚ်ဂွံဂီုကၠီုဂှ်လေဝ် ပိုယ်ကေတ်ကဵုတာလျိုၚ်ဏောၚ်၊ ပိုယ်တအ်လေဝ် နကဵုတာလျိုၚ်ကောန်ဂကူမွဲသာ်ဂှ် ပိုယ်တအ်ရပ်စပ်ဒၟံၚ်ရ၊ လောန်ကၠုၚ်သတ္တဟတေံဂှ် ပ္ဍဲကွာန်အၜေတ်ဂှ် ရပ်ဂွံလဝ်တၞးဘိၚ်ဗွဲမဂၠိုၚ်ရ” သာ်ဝွံ ဒုသ္ကိုပ်ဗၠာဲသၟိၚ် ရုၚ်လ္တူဍုၚ်မုဟ်ဍုၚ် နာဲအံၚ်မျိုဝ်ထောန် ဟီုရ။
မၞိဟ်သွံဒၟံၚ်တၞးဘိၚ်ဂမၠိုၚ် နာဲညဳညဳ သီုကဵု မၞိဟ်(၃)တၠဂှ် ပံက်လဝ်ဂဗုတ် လ္တူဍုၚ်မုဟ်ဍုၚ် မယ(ပ)၈၈/၂၀၂၀ နကဵုၝောံပိုဒ်-၁၉(က)/၁၆(က)/၂၁ တအ် မဒှ်ရ။
“ရပ်စပ်ကဵုဗီုဗီုတအ်ဏံဂှ် မိပ်စိုတ်ရ၊ ဗၠာဲသၟိၚ်တအ် ဂ္စါန်ရပ်မံၚ်ဗီုဏံဂှ်လေဝ် တၚ်မံၚ်ဂုဏ်ရ၊ အဓိက ဒိုၚ်သွံမံၚ်ဇၞော်ဇၞော် တအ်လဝ် မိက်ဂွံကဵုရပ်စပ်ဂၠိုၚ်ဂၠိုၚ်ညိ၊ မၞိဟ်ဍောတ်ဍောတ်တအ် ညံၚ်ဟွံဗၠိုက်တၞီအာ အကြာဂဥုဲၜူမာဲဏံဂှ်လေဝ် ပိုယ်တအ် ဒးဓမံက်မံၚ်ကဵုကီုဏောၚ်၊ အခိၚ်ပိုယ်တိုန်စိုပ်လ္တူကၠတ်ထဝ်တှေ် ဆေၚ်စပ်ကဵု ပရေၚ်ဂဥုဲၜူမာဲဏံ ပိုယ်တအ် ချပ်သဳကၠဳ အာဏောၚ်” သာ်ဝွံ ညးစၞးဇၞးလဝ်မာဲ ကၠတ်ထဝ်ညးဍုၚ်ကွာန်၊ ပွိုၚ်ဍုၚ်မုဟ်ဍုၚ် နာဲသာန်တေန် ဟီုရ။
သၞာံ (၂၀၂၀) ပ္ဍဲကဵုပွိုၚ်ဍုၚ်မုဟ်ဍုၚ်ဂှ်ဝွံ ရုၚ်ဗၠာဲသၟိၚ်လ္တူဍုၚ်မုဟ်ဍုၚ်ဂှ် (၈၈) ဂဗုတ်၊ ရုၚ်ဗၠာဲသၟိၚ်ပ္ဍဲဍုၚ်ကၟာဝက်ဂှ် (၅၇) ဂဗုတ် အပံၚ်သီုဖအိုတ်မ္ဂး ရပ်စပ်ဂွံလဝ်ဂဗုတ် (၁၄၅) ဂဗုတ်နွံရောၚ် ဂွံတီလဝ်ရ။