မိလတိုပ်ဗု၊ နဝ်ဝေမ်ဗာ ၂၈၊ ၂၀၂၀
တ္ၚဲသၟတ်မန် မရနုက်ကဵုအလန်နဝမဏံဝွံ ၜိုန်အကာဲအရာယဲကပ် Covid-19 နွံကီုလေဝ် ညံၚ်သၞာံဟွံဂွံသ္ကုတ်အာဂှ် ဆက်ကၠောန်အာ ပ္ဍဲပွိုၚ်ဍုၚ်ရေဝ်နွံရောၚ် ညးအုပ်ကာနာနာ ဌာန်ကောံသၟတ်မန် နာဲဇာနဲဥူ ဟီုထ္ၜးသာ်ဏံရ။
‘ပိုဲဂှ် ဒုၚ်သဇိုၚ်ကဵု နူကၠောန်လဝ် တ္ၚဲသၟတ်မန် အလန်အဌမ (၈) ဝါတေံရ သွက်အလန်နဝမ (၉) ဝါဏံတှေ် ကၠောန်အာ ပွိုၚ်ဍုၚ်ရေဝ်ဏောၚ်ဟီုလဝ်တုဲ တဆိပ်သၟတ်မန်ဂှ်လေဝ် ဒုၚ်ဖျဴနၚ်ရေဝ်ဏံလေဝ်တုဲမံၚ်ရ၊ တ္ၚဲဍေံဂှ် လေဝ် ကြပ်ကၠုၚ်ရတှေ်၊ ဆဂး ဟိုတ်နူကဵု အကာဲအရာယဲကပ်ဂၠးကဝ် ကတဵုဒှ် ကၠောံမံၚ်ရိုဟ်တ္ၚဲဏံဂှ်တှေ် ပိုဲဒးရံၚ်ကဵု သၞောဝ်ကၟိန်ဍုၚ်ကီု ပကောံမၞိဟ်ဂၠိုၚ်ၚ်လေဝ်ဟွံဂွံ၊ ယဝ်ပိုဲ ဟွံဒ္ဂေတ်ဗက်သၞောဝ်ဟီုတှေ် ဒှ်ဖံက်သၞောဝ် ညာတ်ကေတ်ဗီုဏံတုဲ လၟေၚ်ကမၠောန်လေဝ် ညံၚ်သၞာံဂွိုအ်ပိုတ်သ္ကုတ်အာ နကဵုဗၠးဒုဟ် ဗၠးသၞောဝ် ပိုဲဆက်ကၠောန်အာဏောၚ်’ သာ်ဏံ ညးအုပ်ကာနာနာ ဌာန်ကောံသၟတ်မန် နာဲဇာနဲဥူ ဟီုရ။
တ္ၚဲသၟတ်မန် မရနုက်ကဵု အလန်နဝမဏံ ကၠောန်အာ ပ္ဍဲပွိုၚ်ဍုၚ်ရေဝ်ရောၚ်ဂှ် နူကဵုတ္ၚဲသၟတ်မန် အလန်အဌမ ကၠောန်လဝ် ပ္ဍဲဒဵုခရီု၊ ပွိုၚ်ဍုၚ်ကျာ်မြဟ်တေံ ဂကောံသၟတ် ပွိုၚ်ဍုၚ်ရေဝ်တံ ဒုၚ်ကေတ်လဝ် တဆိပ်တ္ၚဲသၟတ်မန် တုဲတုဲမံၚ်ရ။ ဆဂးဂှ် အဃောကာလယဲကပ်ဏံ နဲကဲသာ်လဵု ကၠောန်အာရောဂှ် သ္ဒးချပ်အာ ပ္ဍဲကောံဓရီုရောၚ် ညးတာလျိုၚ်တံ သ္ဂးရ။
‘တ္ၚဲသၟတ်မန်ဂှ် ကၠောန်အာဏောၚ်၊ ဆဂး ကမ္မတဳဂှ် ဟွံဂွံဒက်ဏီပုဟ်၊ ပ္ဍဲဂိတုက္ထိုန် (၁) စွေက်ဏံတှေ် ကော်ကောံဓရီုကဵု ဌာန်ကောံသၟတ်မန်တံ ပ္ဍဲကွာန်အၜဝ်နွံဏောၚ်၊ သွက်ဂွံပဒတန် ဗီုလဵုကၠောန်ဂှ် တုဲတှေ် ပ္ဍဲကဵု ဂိတုက္ထိုန် (၃) စွေက်ဂှ်တှေ် ပံက်အာကမ္မတဳသ္ပတိုၚ် ဂကောံသၟတ်မန် လတူဍုၚ်ရေဝ်ဏံဏောၚ်’ သာ်ဏံ ညးစန္ဒက်ဌာန်ကောံသၟတ်မန် မာံပရ ဟီုရ။
ပ္ဍဲကဵုသၞာံဏံဝွံ ဟိုတ်နူကဵုယဲကပ် Covid-19 တုဲ ကၠောန်အာ သ္ဘၚ်တ္ၚဲသၟတ်မန် မရနုက်ကဵု (၉) ဝါ နကဵုသၞောဝ် ကၟိန်ဍုၚ် ညံၚ်မၞိဟ်ဟွံဂွံဂၠိုၚ်ကီု ဘိက်အာ ဂကောံသဘာပတိကဵု ကၟုဲတၟေၚ်တံတုဲ လလောၚ်တြးဏာ လတူလာၚ်/ လပှ်ကျာနွံရောၚ် ဂွံတီကေတ်ရ။
တ္ၚဲသၟတ်မန် အလန်ပထမဂှ် ကၠောန်ပ္ဍဲဒဵုထောၚ် ပွိုၚ်ဍုၚ်လှာဒကှ်၊ အလန်ဒုတိယဂှ် ပ္ဍဲကွာန်တၟံကၞေၚ် ပွိုၚ်ဍုၚ်ရေဝ်သၟဝ်ကျာ၊ အလန်တတိယဂှ် ပ္ဍဲကွာန်သၞေဟ်ဗဒဝ် ပွိုၚ်ဍုၚ်မုဟ်ဍုၚ်၊ အလန်စတုတ္ထဂှ် ပ္ဍဲကွာန်ကံဗိန် ပွိုၚ်ဍုၚ်ကံကြိက်၊ အလန်ပဥ္စမဂှ် ကၠောန်ပ္ဍဲကွာန်ဝါခရူ ပွိုၚ်ဍုၚ်ဇြပ်ဗု၊ အလန်ဆဌမဂှ် ကၠောန်ပ္ဍဲကွာန်ကၟာမဵု ပွိုၚ်ဍုၚ်ၜါသွာၚ်၊ အလန်သတ္တမဂှ် ကၠောန်ပ္ဍဲကွာန်သာံလှေဝ် ပွိုၚ်ဍုၚ်ဘာအၚ်၊ အလန်အဌမဂှ် ကၠောန်အာပ္ဍဲ ဒဵုခရီု ပွိုၚ်ဍုၚ်ကျာ်မြဟ်၊ အလန်နဝမဏံမ္ဂး သွက်သ္ဂောံကၠောန်အာ ပွိုၚ်ဍုၚ်ရေဝ်နွံရ။
