မိလတိုပ်ဗု၊ ဂိတုဂျာန္နဝါရဳ (၁၂၊ ၂၀၂၁)
သွက်ဂွံကၠောန်ဗဒှ်အာ တ္ၚဲကောန်ဂကူမန် မရနုက်ကဵု (၇၄) ဝါ ဗဟဵုသၞာံဏံဂှ် ဟိုတ်နူကဵု အကာဲအရာယဲကပ်တုဲ ကၠောန်ဗဒှ်အာ ပ္ဍဲဖဠာတ်ဗၠးဗၠးၜးၜးဟွံသေၚ် ချပ်ရန်လဝ်ဒၞာဲ လ္တူဍုၚ်မတ်မလီု (၂) ဒၞာဲနွံရောၚ် ဒုဥက္ကဌ လၟေၚ် (၂) နာဲမန်ရာဇာ ဟီုသာ်ဏံရ။
‘ပိုဲဂှ် ရန်လဝ်နွံမံၚ် (၂) ဒၞာဲ၊ (၁) ဂှ်တှေ် ၝောံခန်တွဵုရး (ပြည်နယ်ခန်းမ)၊ (၂) ဂှ် ကျာ်ဒေါဝ်သာသနာ (၂၅၀၀) လ္တူဍုၚ်မတ်မလီု၊ ပိုဲအာတ်ဒၞာဲ (ပြည်နယ်ခန်းမ) ဂှ်ကၠာ ယဝ်ဟွံပြေပြံၚ်တှေ် ပိုဲကေတ်ဒၞာဲ ဘာသာသနာ (၂၅၀၀) ဂှ်ဏောၚ်၊ တုဲတှေ် ဒးရံၚ်ကဵု အကာဲအရာယဲကပ်ဏံတုဲ သွက်ဂွံကၠောန်ပေါဲဟီုတွံ လ္တူလိုၚ်ဂှ်ဒှ်ဂၠိုၚ်ဏောၚ်’ သာ်ဏံ ဒုဥက္ကဌ လၟေၚ် (၂) နာဲမန်ရာဇာ ဟီုရ။
ပ္ဍဲကဵုစၟတ်တ္ၚဲ (၁၀-၁-၂၀၂၁) ဂှ် ကော်လဝ်ကောံဓရီုနွံတုဲ ညးတိုန်စိုပ် (၁၀) ပွိုၚ်ဍုၚ်နွံရ၊ ပ္ဍဲဂှ် ဒက်လဝ်ဂကောံ နာယက သၚ် (၅) ဇကု၊ ခရှ် (၄) တၠတုဲ ဂကောံဥက္ကဌဂှ် (၃) တၠ၊ ဂကောံညးအုပ်ကာ (၃) တၠ၊ ဂကောံသာပ်ကမ္မတဳဂှ် (၆) သာပ်ကမ္မတဳ တုဲဒှ်အာတုဲ ဇၟာပ်သတ္တဟ စိုပ်တ္ၚဲအဒိုတ်မ္ဂး ကော်အာကောံဓရီု ပ္ဍဲဘာသာသနာ (၂၅၀၀) နွံရောၚ်ဂှ်လေဝ် နာဲမန်ရာဇာ ဟီုထ္ၜးရ။
‘စပ်ကဵုသြန်တံဂှ်တှေ် သြန်အလဵုအသဳ သွက်ဂွံကၠောန်တ္ၚဲပရဲနွံမံၚ်ဂှ် ပိုဲပ္တိတ်ဏောၚ်၊ တုဲတှေ် ဒုၚ်ဒါန်သြန် ညး ဍုၚ်ကွာန်တံဏောၚ်၊ ဗီုရုပ်ဂတဵုမုက်ဗစူတိ တ္ၚဲကောန်ဂကူမန်သၞာံဏံဂှ်တှေ် ဒုၚ်သဇိုၚ်ကဵု ဝၚ်လိက်တၟံဍုၚ်မတ်တၟတုဲ ဒးချူဓဇက်အာ ဗီုရုပ်ဂတဵုမုက်ဗစူတိဂှ်ဏောၚ်၊ တုဲတှေ် စပ်ကဵုပေါဲပြိုၚ်တံဂှ်တှေ် ပေါဲပြိုၚ်လိက်ပတ်တံ ပေါဲပြိုၚ်တိၚ်တိုက်လှေ်ဒယှေ်၊ ပေါဲပြိုၚ်ဝေၚ်ဇြဟတ်တံဂှ် ကၠောန်ဏောၚ်၊ ပိုဲဖျေံလဝ်သ္ဂုတ်သွာတ်ကောံဓရီုနွံ’ သာ်ဏံ ဒုဥက္ကဌ လၟေၚ် (၂) နာဲမန်ရာဇာ ဟီုရ။
တ္ၚဲကောန်ဂကူမန်ဗဟဵုဝွံ မရနုက်ကဵု (၆၁) ဝါဂှ် ကၠောန်ဗဒှ်လဝ် ပ္ဍဲဍုၚ်မုဟ်ဍုၚ်၊ မရနုက်ကဵု (၆၂) ဝါဂှ် ပ္ဍဲကွာန်ကၟာမဵု ပွိုၚ်ဍုၚ်ၜါသွာၚ်၊ မရနုက်ကဵု (၆၃) ဝါဂှ် ပ္ဍဲဍုၚ်လၟိုၚ်၊ မရနုက်ကဵု (၆၄) ဝါဂှ် ပ္ဍဲဍုၚ်ဇြပ်ဗု၊ မရနုက်ကဵု (၆၅) ဝါဂှ် ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက်၊ မရနုက်ကဵု (၆၆) ဝါဂှ် ပ္ဍဲဍုၚ်ပံၚ်၊ မရနုက်ကဵု (၆၇) ဝါဂှ် ပ္ဍဲဍုၚ်ကၟာဝက် ပွိုၚ်ဍုၚ်မုဟ်ဍုၚ်၊ မရနုက်ကဵု (၆၈) ဝါဂှ် ပ္ဍဲဍုၚ်ရေဝ်၊ မရနုက်ကဵု (၆၉) ဝါဂှ် ပ္ဍဲကွာန်ကလအ် ပွိုၚ်ဍုၚ်ၜါသွာၚ်၊ မရနုက်ကဵု (၇၀) ဝါဂှ် ပ္ဍဲဍုၚ်ကျာ်မြဟ်၊ မရနုက်ကဵု (၇၁) ဝါဂှ် ပ္ဍဲကွာန်ထဝ်ပၠၚ် ပွိုၚ်ဍုၚ်ဘာအၚ်၊ မရနုက်ကဵု (၇၂) ဝါဂှ် ပ္ဍဲဍုၚ်ဟံသာဝတဳ(ဗ္ဂော)၊ မရနုက်ကဵု (၇၃) ဝါဂှ် ပ္ဍဲဍုၚ်မတ်မလီုရ။
