ယေန်ထဝ်မန် (ဂျာန္နဝါရဳ ၂၂၊ ၂၀၂၁)

ဟိုတ်နူကဵုယဲကပ်ကိုဝေဒ် (၁၉) ဏံတုဲ ညးအာတရဴ ကၟုဲနူကဵုဍုၚ်သၟာၚ်တံကီု ကၟုဲပ္ဍဲဍုၚ်တံကီု ကၠုၚ်ဝေၚ် တွဵုရးဍုၚ်မန်ဂှ် အောန်စှေ်အာ ဗဒဲါ (၉၀) က္ဍိုပ်ကၠံရောၚ် ဂွံတီကေတ် နူဌာနက္ဍိုက်က္ဍိုပ် ပရေၚ်အာတရဴ ပ္ဍဲတွဵုရးဍုၚ်မန်ရ။
“ပ္ဍဲကဵုသၞာံ (၂၀၁၉) ဂှ်တှေ် မၞိဟ်အာတရဴ ပ္ဍဲကဵုတွဵုရးဍုၚ်မန်ပိုဲ နွံမံၚ်ၜိုတ် (၂၈) ကိုဋ်ပြၚ်ဂှ် ပ္ဍဲသၞာံ (၂၀၂၀) ဂှ်တှေ် ၜိုတ် (၁) ကိုဋ် (၂) ဠက်ရနွံ၊ စပ်ကဵုပရေၚ်သြန်လုပ်ဂှ်တှေ် ပ္ဍဲသၞာံ (၂၀၁၉) ဂှ် သြန်လုပ်ဒၟံၚ် ကိုဋ် (၃) ဠက်ပြၚ်တုဲ ပ္ဍဲသၞာံ (၂၀၂၀) ဂှ်တှေ် ကိုဋ် (၁) ဠက်ကဵု (၂) လ္ၚီရ ဂွံမံၚ်” သာ်ဝွံ ဌာနက္ဍိုက်က္ဍိုပ် ပရေၚ်အာတရဴ ပ္ဍဲတွဵုရးဍုၚ်မန် ဥက္ကဌဥုတာန်ထောတ်ခိုၚ် ဟီုရ။
စပ်ကဵုပရေၚ်အာတရဴ အောန်စှေ်ကၠုၚ်ဂှ်တုဲ ညးမကၠောန်ဒၟံၚ် ကမၠောန်ပၠတရဴထ္ၜးဂၠံၚ် ပ္ဍဲကဵုတွဵုရးဍုၚ်မန်တံလေဝ် ဒးဒေါံဇူလဝ် ဗဒါဲက္ဍိုပ်ကၠံရောၚ် နူကဵုဂကောံပၠတရဴထ္ၜးဂၠံၚ် တွဵုရးဍုၚ်မန် ဥက္ကဌ နာဲမျဵုမေန် ဟီုရ။
“အဓိကဒးဒုၚ်ဂိဂှ်တှေ် ရဲကၠောန်မံၚ်ကမၠောန်တွာ်ကၟုဲ (Guide) တံရ၊ မၞိဟ်ကၠောန်လဝ် လိုၚ်ဇြေန်တုဲ ကၠောန်ဒၟံၚ်ကမၠောန် နွံဒၟံၚ် (၂၀၀) ဂှ် ၜိုတ်မၞိဟ် (၁၀) ရ။ ဂွံကောန်ဒၟံၚ်ကမၠောန်ညိညိ၊ သှေ်နူဂှ်တှေ် ဒးဗဒဗဒါဲဒၟံၚ် ကဵုသ္ၚိညးကဵုညးရ” သာ်ဝွံ နာဲမျဵုမေန်ဂှ် ဆက်ဟီုရ။
ဟိုတ်ဂှ်ရ ညးတံနွံပၟိက် မိက်ဂွံကဵုပံက်ဂၠံၚ်ဍာန် သွက်ဂွံဂေတ်ဂေၚ်အာ ပရေၚ်ကမၠောန်အာတရဴ ပ္ဍဲတွဵုရးဍုၚ်မန်တုဲ စပ်ကဵုပရေၚ်အာတရဴတုဲ အလဵုအသဳတံ ညံၚ်ဂွံဓမံက်ကဵုရုပ်ရဴ ဂၠိုၚ်ဂၠိုၚ်ဂှ်လေဝ် ညးတံ အာတ်မိက်ရ။
နူကဵု Golden River Hotel ညးနွံတာလျိုၚ်မွဲဂှ် “ညးအာတရဴလေဝ်ဟွံမွဲတှေ် အခက်အခုဲဂှ်တှေ် ဍေံဒှ်ကၠုၚ် နာနာသာ်ရ၊ ကမၠောန်ဇကုဂှ်တှေ် ဒးဗဒါဲဒၟံၚ်ကဵု ညးအာတရဴရတှေ်၊ တုဲပၠန် သြန်ဂိတုလေဝ် ဒးကဵုဒၟံၚ်ကဵု သၟာကမၠောန်တံလေဝ်နွံဒၟံၚ်တှေ် ဒုၚ်ကျတုဲတှေ် ကၠောန်ဒၟံၚ် သီုဖအိုတ်ရ” သာ်ဝွံ ဟီုရ။
လၟုဟ်ဝွံ နူကဵုဂကောံအလဵုအသဳ တွဵုရးဍုၚ်မန်ဂှ် စပ်ကဵုပရေၚ်ကမၠာန်အာတရဴ သွက်ဂွံဖောအ်ဗြေဝ်တုဲ ပ္ဍဲပွိုၚ်ဍုၚ်ရေဝ် ဒၞာဲပြၚ်ၜဳပါၚ်မ္ၚဵု၊ ပြၚ်ၜဳမၚ်ဂၠန်၊ ပွိုၚ်ဍုၚ်ကျာ်မြဟ် ထီုဖာၜံၚ်ဂှ် ညံၚ်ဂွံပံက်အာ သွက်ညးအာ တရဴတံမာန်ဂှ် ရေၚ်တၠုၚ်ဒၟံၚ်ရောၚ် ဂွံတီကေတ်လဝ်ရ။