ယေန်ထဝ်မန်၊ ဂိတုဂျာန္နဝါရဳ ၂၅ သၞာံ ၂၀၂၀
ပ္ဍဲကဵုအခိၚ်ကာလယဲကပ် ကိုဝ်ဝေဒ် (၁၉) ဏံ ဟိုတ်နူကဵုပရေၚ်သြန်လုပ်တိတ် ဟွံညဳသၟဟ်တုဲ ဌာနမဆေၚ်စပ် ဗက်ဒၟံၚ်အကံက်အခေါန်တံဂှ် မိက်ဂွံကဵုယှအ်ဖျေံညိဏောၚ် တၠကမၠောန်ဆေၚ်စသုၚ်တံ ဟီုဂးဒၟံၚ်အိုတ်ရ။
ဆေၚ်စသုၚ်ဂမၠိုၚ်တံဂှ် (၆) ဂိတုမ္ဂး မွဲအလန် ဒးကဵုဒၟၚ် အကံက်အခေါန်တုဲ အခိၚ်ကဵုမာန်မှကဵု ဟီုဂှ်လေဝ် ယဝ်ရၜက်အာနူကဵု တ္ၚဲဒးကဵုအခေါန်ဂှ်ဏောၚ်ဟီုတှေ် ပရေၚ်ကေတ်အရေဝ်လေဝ် နွံဒၟံၚ်ရောၚ် တၠဆေၚ်ဖျာပုၚ် Ever Green နူဍုၚ်ဇြပ်ဗု ဥုတေန်မျဵုအံၚ် ဟီုရ။
“ပိုဲဂှ် ဟိုတ်နူကဵု ဒးကဵုအခေါန်တုဲ တးပါဲမံၚ်ဟွံသေၚ်ပုဟ်၊ အခိၚ်ကာလယဲကပ်ဏံ မိက်ဂွံကဵုကၠိုဟ်ကဵု လ္တူပိုဲညိ၊ အခိၚ်ကြေပ်ဂြတ်မံၚ်ဏံဂှ် စပ်ကဵုကိစ္စအခေါန်တုဲ ဒးဒှ်ဒၟံၚ်ဓဝိၚ် အရိုဟ်ရိုဟ်တ္ၚဲ၊ တိက်လေဝ်ဟွံသၠိၚ်ပုဟ်” သာ်ဝွံ ဥုတေန်မျဵုအံၚ် ဟီုရ။
တုပ်သာ်ဂှ်ကီု ဒၞာဲမဆေၚ်စပ်တံဂှ် ပတိုန်လိက်လၟေၚ်ဒုၚ်ဂုဏ်တုဲ ပရေၚ်ဗက်အကံက်အခေါန်ဂှ် ၜိုတ်မာန်ကဵုမာန် သွက်ဂွံယှအ်ဖျေံကဵုညိဂှ်လေဝ် နူကဵုဍုၚ်မတ်မလီု ဆေၚ်ပိုယ် စၞစအခိုက်ကၞာမန် မာံရဲမာန်ဂှ် ဟီုရ။
“သၞာံအာတေံဂှ် ပ္ဍဲကဵုပရဲဖျာပိုဲ (၃) က္ဍိုပ်ကၠံဂှ်တှေ် ပိုဲဒးပၠောပ်ကဵုဍေံတအ်၊ သၞာံဏံဂှ်တှေ် ဍေံကေတ် ၜိုတ် (၆) က္ဍိုပ်ကၠံဏောၚ် ဍေံဟီုလဝ်ဟဂှ်၊ အခိၚ်ကာလ ဂွံသွံဒၟံၚ်ကဵုထိုၚ် (ပါဆယ်) ညိညိဏံရတှေ် ဒးကဵု (၆) က္ဍိုပ်ကၠံ ဏောၚ်ဟီုတှေ် ဍေံဒှ်အခက်အခုဲညိဏောၚ်” သာ်ဝွံ မာံရဲမာန်ဂှ် ဟီုရ။
ဟိုတ်နူယဲကပ်ဏံတုဲ ပ္ဍဲကဵုကာလကၟာတ်လဝ်ဆေၚ်ဖျာတံဂှ် ပါဲနူကဵု အကံက်အခေါန် လိုၚ်ဇြေန်ကမၠောန်တုဲ အခေါန်သြန်လုပ်၊ အခေါန်ပြဲ၊ အခေါန်တဆိပ်တံလေဝ် ဒးကဵုဒၟံၚ်ကီုဏောၚ် တၠဆေၚ်ဖျာစသုၚ်တံ ဟီုမံၚ်အိုတ်ရ။
“လၟုဟ်ဂှ် စပ်ကဵုပရေၚ်အခေါန်တုဲတှေ် အစဳအဇန် ဂွံယှအ်ဖျေံဂှ် ဍေံဟွံမွဲဏီပုဟ်၊ ဆဂး အခေါန်လ္ၚဵုဂှ်တှေ် ယှအ်လဝ်ဂှ်နွံမံၚ်ကီု၊ တုဲပၠန် ပရေၚ်ယှအ်အခေါန်ဏံဟီုဂှ်တှေ် ပိုဲတအ် ယှအ်ဖျေံကေတ်ကေတ်လေဝ်ဟွံဂွံ၊ ဒးပတိုန်ထ္ၜး အဆံၚ်ကၟိန်ဍုၚ်တုဲ ရဲလ္တူတေံ ညးကဵုအခေါၚ်မှ ပိုဲတအ် ဆက်ကၠောန်အာဂွံ” သာ်ဝွံ နူကဵုဌာနဗဂဵုလဟဵုဍုၚ် တွဵုရးဍုၚ်မန် သ္ကိုပ်စၞောန်ပ္ညုၚ် ဥုတေန်ကိုဝ်ဝ် ဂးရ။
နူကဵုစဆဵုစၟယဲကိုဝ်ဝေဒ်(၁၉) အခိၚ်ဂိတုမာတ် လပါ်အိုတ်တုဲကၠုၚ်တေံဂှ် စဒးကၟာတ်ကၠုၚ်ဖျာစသုၚ်တံတုဲ ဖျာစသုၚ်တံဂှ် သွံကဵုထိုၚ် (ပါဆယ်) ဟေၚ် ညးကဵုအခေါၚ်ရ။ လောန်ကၠုၚ်ဂိတုဒဳဇြေမ်ဗာ စၟတ်တ္ၚဲ (၂၂) ဂှ် စဂွံအခေါၚ်ကလေၚ်ပံက်ကီုလေဝ် ဆေၚ်စသုၚ်ဍောတ်တ်လ္ၚဵုတံဂှ် ကလေၚ်ယာက္ဍိုပ်ဟွံမာန် နွံမံၚ်ဗွဲမဂၠိုၚ်ဏောၚ် ဂွံတီကေတ်ရ။
