ဗညာပိုၚ်၊ ဂျာန်နဝါရဳ ၂၈၊ ၂၀၂၁
ဟိုတ်နူကဵု အသိၚ်ယဲကိုဝ်ဝေဒ်ဏံ ဟွံယအ်စှေ်ကၠုၚ်ဏီတုဲ သၟာဂဳတဂမၠိုၚ်တံ သ္ဂောံကၠောန်အာ ပရေၚ်ချဳဒရာၚ်ဂှ် ဒှ်ကၠုၚ်မံၚ် အခက်အခုဲရောၚ် သၟာဂဳတဂကူမန်ဂမၠိုၚ်တံ ဟီုဂးကၠုၚ်မံၚ်အိုတ်ရ။
ယဲကပ်ကိုဝ်ဝေဒ်ဝွံ စနူကဵု သၞာံ (၂၀၂၀) ဂိတုမာတ် စဵုကဵုစိုပ် အခိၚ်လၟုဟ်ဝွံဏံ က္တဵုဒှ်ကၠုၚ်မံၚ်တုဲ ဟိုတ်ဂှ်ရ ပရေၚ်ခက်ခုဲနာနာသာ် က္တဵုဒှ်ကၠုၚ်မံၚ်အိုတ်ရ။
ဥက္ကဋ္ဌဂကောံဂဳတမန် အဗ္ဘဏ်ဂှ် “လၟုဟ်ဂှ် ယဲဏံလေဝ် ဍေံဒှ်မံၚ်ဖိုဟ်၊ ရဲသၟာဂဳတဗွဲမဂၠိုၚ်ဂှ်တှေ် ဒှ်မံၚ်အခက်အခုဲလေဝ်၊ စပ်ကဵုပရေၚ်ချဳဒရာၚ်ဂှ် ချဳဒရာၚ်ဟွံဂွံပုဟ် ဍေံဒှ်မံၚ်ဗီုဂှ်၊ တုဲပၠန် မွဲတရဴကာလ ကိုဝ်ဝေဒ်ဏံဂှ်တှေ် ပ္တိတ်မံၚ်ဒွက်ကဵုပညာယဲကိုဝ်ဝေဒ်တံ တုဲတှေ် ကောန်ဂကောံဂဳတဂမၠိုၚ်တံဂှ်တှေ် ကၠောန်အာမံၚ်ဒွက်တံနွံရ” သာ်ဝွံ ဂးရ။
စနူကဵုသၞာံ (၂၀၂၀) ဂိတုမာတ် (၂၈) ဂှ်တုဲ စဵုကဵုစိုပ် သၞာံ (၂၀၂၁) ဂိတုဂျာန္နဝါရဳ (၃၁) ဏံ အခေါၚ်ကၠောန်ပေါဲသ္ဘၚ်ကီု၊ အခေါၚ်ပ္ကောံပ္ကေဝ်မၞိဟ်ကီုဂှ် နူကဵုဂကောံအလဵုအသဳ တွဵုရးဍုၚ်မန်တံ ဟွံကဵုအာအခေါၚ်ဏီရောၚ် ဂွံတီကေတ်ရ။
ဂကောံဂဳတမန် သၟာဒယှေ်ဒွက် သြန်ဆာဲဂှ် “လၟုဟ်ဂှ် ကၠောန်လဝ်ကဝး အလန်တတိယ နွံမံၚ်ဖိုဟ်ရ၊ ဆဂး ရံၚ်အာကဵုယဲဏံတုဲတှေ် အာကၠုၚ်စလေဝ် ကျာတ်မံၚ်တုဲတှေ် ဟွံဃရေက်ကၠောန်ဏီရ။ တုဲပၠန် ပိုဲရဲသၟာဒယှေ်ဒွက်ဂှ် ဒယှေ်ဒွက်မွဲရ စိုန်သ္ကီုမံၚ်တှေ် ပါဲနူဂှ် မုကမၠောန်လေဝ် ဟွံမွဲတှေ် ခက်ခုဲဍေံဂၠိုၚ်ရ” သာ်ဝွံ ညးဟီုရ။
သၞာံ (၂၀၂၁) ဂိတုဂျာန္နဝါရဳ (၁) ဏံဂှ် နူကဵုဂကောံဂဳတမန်တံ က္ဍိုက်ပ်တုဲ ကၠောန်ကၠုၚ်ဍဝ် ပေါဲဒယှေ်ဒွက် နကဵုအောန်လာၚ် Online ရ။
ပ္ဍဲကဵုအလုံဂၠးတိဂှ် ယဲကိုဝ်ဝေဒ်က္တဵုဒှ်မံၚ် ဟွံအောန်စှေ်ကၠုၚ်ဏီတုဲ ပရေၚ်ကၠောံထၞာန်လေဝ် အသိၚ်သၠုၚ်တိုန်မံၚ်ဂှ်ရ ညးဍုၚ်ကွာန်တံလေဝ် အတိုၚ်ဌာနပရေၚ်ထတ်ယုက်ကၟိန်ဍုၚ်တံ ပ္တိတ်လဝ်စၞောန်ဂှ် ဒးမံၚ်စံၚ်အာကၠုၚ်မံၚ်တုဲ အ ခေါၚ်ကၠောန်ပေါဲသ္ဘၚ်လေဝ် ဟွံမွဲကၠုၚ်ဂှ်ရ သွက်ဂကောံဂဳတဂမၠိုၚ်တံ ဒှ်ကၠုၚ်ပရေၚ်ကော်ဆော ဇၞော်ကဵုဇြဟတ်မွဲရ။
