ဝဏ္ဏမာန်၊ ဖေဖဝ်ဝါရဳ ၁၃၊ ၂၀၂၁
ဗော်ညဳသၟဟ်မန် ဒုၚ်တဲပါလုပ်ကေတ်လျိုၚ် ပ္ဍဲ ‘ကံၚ်ဇြဳအုပ်ဓုပ်ကၟိန်ဍုၚ်’ ဂှ် ပ္ဍဲဗော်ကီု၊ အကြာဂကူမန်ကီုလညာတ် ဟွံပေၚ်စိုတ် ကတဵုဒှ်ကၠုၚ်နွံတုဲ ညံၚ်ဂွံကလေၚ်ဂၠာဲသွဟ် ပ္ဍဲကောံဓရီုကမ္မတဳဗဟဵုဂှ် ဗော်ဍုၚ်မန်တၟိ ဟီုဖတိုက်ဖၟောဝ် ရ။
လတူအကာဲအရာ ပရေၚ်ဍုၚ်ကွာန်ကၟိန်ဍုၚ် ကတဵုဒှ်ဒၟံၚ်တ္ၚဲဏံကီု၊ လတူအကာဲအရာ ပရေၚ်ဍုၚ်ကွာန်မန် ဆက်စပ် ဗော်ညဳသၟဟ်ကီု ဗော်ဍုၚ်မန်တၟိ ကၠောန်ကောံဓရီု ကမ္မတဳရေၚ်တၠုၚ်ကေၚ်ကာ ပ္ဍဲဌာန်ဂအုပ်ဗဟဵုတုဲ နကဵု ဗော်ညဳသၟဟ်မန် ဖျေံဏာလဝ်သ္ဂုတ်သွာတ် သွက်ဂွံပါလုပ်ကေတ်လျိုၚ် ပ္ဍဲ ‘ကံၚ်ဇြဳအုပ်ဓုပ်ကၟိန်ဍုၚ်’ ဂှ် ညံၚ်ဂွံကလေၚ်သ္ၚဳဂၠိပ်အာ ပ္ဍဲကောံဓရီု ကမ္မတဳဗဟဵုဂှ် ပ္ဍဲဂိတုဖေဖဝ်ဝါရဳ (၁၃) ပတိတ်လိက်လစွံစိုတ်တုဲ ဖတိုက်ဖၟောဝ်လဝ်ရ။
“နူဒပ်ပၞာန်သီအဝဵုတုဲ ပံက်ဏာ ကံၚ်ဇြဳအုပ်ဓုပ်ကၟိန်ဍုၚ် SAC တုဲ ကော်ဘိက်မံၚ် ဗော်ညဳသၟဟ်မန် ဂွံပါလုပ် အပ္ဍဲ ကံၚ်ဇြဳဂှ်နွံရ။ လတူကော်ဘိက်ကၠုၚ်ဂှ် နူကောံဓရီု ကမ္မတဳရေၚ်တၠုၚ်ကေၚ်ကာဗဟဵု ဗော်ညဳသၟဟ်မန် ဒုၚ်တဲစှေ်စိုတ် သွက်ဂွံပါလုပ်တုဲ အပ္ဍဲဗော် MUP ကီု၊ အပ္ဍဲဂကူမန်ကီု လညာတ်ဟွံစှေ်စိုတ် မံက်တိတ်ကၠုၚ် ဇၞော်ကဵုဇြဟတ်ရ။ ဟိုတ်ဂှ်တုဲ ပရေၚ်ကိစ္စဏံဂှ် သွက်ဂွံကလေၚ်သဳကၠဳဂၠာဲသွဟ် အပ္ဍဲကောံဓရီုကမ္မတဳဗဟဵု ဗော် MUP မ္ဒးဖတိုက် ဖၟောဝ်ဏာရ” သာ်ဝွံ ချူလဝ်ရ။
ကြဴနူဗော်ညဳသၟဟ်မန် ဖျေံဏာသ္ဂုတ်သွာတ် သွက်ဂွံပါလုပ် ပ္ဍဲ ‘ကံၚ်ဇြဳအုပ်ဓုပ်ကၟိန်ဍုၚ်’ (နိုၚ်ၚံတော်စီမံအုပ် ချုပ်ရေးကောၚ်စီ) ဂှ်တုဲ ဗွိုၚ်ပ္ဍဲဗော်ကီု၊ ဗွိုၚ်ညးဍုၚ်ကွာန် ခမဳသၚ်ဂမၠိုၚ်ကီု ဒစဵုဒစး၊ ထံက်ထ္ၜးကၠုၚ်၊ ဟီုဂးပါ်ပဲါကၠုၚ် လတူဗော်ညဳသၟဟ်မန် နာနာသာ်ရ။
“ပ္ဍဲအရာကိစ္စပါလုပ် အပ္ဍဲကံၚ်ဇြဳအုပ်ဓုပ်ကၟိန်ဍုၚ်ဂှ်တုဲ မိက်ဂွံကဵု ကလေၚ်သဳကၠဳပညဳပညပ် ဖျေံသ္ဂုတ်သွာတ် အပ္ဍဲ ကောံဓရီုကမ္မတဳဗဟဵု နနဲဒဳမဝ်ကရေဇြဳ ပ္ဍဲဗော်စှေ်စှေ်တုဲ လတူသွဟ်မကလိဂွံဂှ် ညံၚ်ဂွံယဵုဒုၚ်မၚ်မွဲအာ ဗွဲမရှေ်သှေ် ညိဂှ် ရန်ကဵုဓဝ်ညဳသာ ပ္ဍဲဗော်၊ ပ္ဍဲဂကူတုဲ မ္ဒးကဵုဏာကသပ်ရ” သာ်ဝွံ လိက်လစွံစိုတ် (ဗော်ဍုၚ်မန်တၟိ) ဂှ် ထံက်ထ္ၜး လဝ်ရ။
နူကဵုဒပ်ပၞာန် ထိၚ်သီလဝ်အဝဵု နူသၟဝ်တဲပရေၚ်အုပ်ဓုပ် အလဵုအသဳ အေန်အေဝ်ဒဳ ဖေဖဝ်ဝါရဳ (၁) ဂှ်တုဲ နကဵုဗော် ညဳသၟဟ်မန် ညးစၞးမွဲတၠ သွက်ဂွံပါလုပ် ပ္ဍဲ ‘ကံၚ်ဇြဳအုပ်ဓုပ်ကၟိန်ဍုၚ်’ (နိုၚ်ၚံတော်စီမံအုပ်ချုပ်ရေးကောၚ်စီ) ဂှ် နူကဵု ကမ္မယှေန်ပေဲါရုဲမာဲကၟိန်ဍုၚ် (တၟိ) တံ လၟိၚ်လၟဟ်ကၠုၚ် ကုဗော်ညဳသၟဟ်မန်တုဲ ဖေဖဝ်ဝါရဳ (၆) ဂှ် ဗော်ညဳသၟဟ်မန် ဒုၚ်တဲပါလုပ် နကဵုသ္ဂုတ်သွာတ် ကောံဓရီုကမ္မတဳကေၚ်ကာဗဟဵုရ။
