သၟဟ်သၟန်၊ ဂိတုဖေဖဝ်ဝါရဳ ၂၆၊ သၞာံ ၂၀၂၁
ဂကောံအလဵုအသဳ တွဵုရးဍုၚ်မန် ညးကေၚ်ကေတ်လဝ်တာလျိုၚ် ဝန်ဇၞော်သယံဇာတ ကေုာံ ထိၚ်ဒဝ်ပွဳပွူသဘာဝ ဒံက်တာမေန်ကျဳဝေန်ကီု ဝန်ဇၞော်တံကီု ဥက္ကဋ္ဌကၠတ်ထဝ်တွဵုရးဍုၚ်မန်တံကီု ပ္ဍဲကဵုဂိတုဖေဖဝ်ဝါရဳ (၂၆) အခိၚ်တ္ၚဲစေၚ်ဂှ် နူကဵုထိၚ်ဒဝ်လဝ် ပ္ဍဲကဵုသ္ၚိဌာန်ဝန်ဇၞော် အလဵုအသဳဂှ် ဗလးပ္တိတ်ကၠုၚ်ယျရောၚ် ဂွံတီကေတ်ရ။
ၜိုန်ဂှ်လေဝ် သ္ကိုပ်ဝန်ဇၞော်တွဵုရးဍုၚ်မန်ဂှ် ထိၚ်ဒဝ်လဝ် ဒၞာဲတၞဟ်ခြာမွဲဒၞာဲတုဲ ဆက်ထိၚ်ဒဝ်လဝ်ဖိုဟ်ရောၚ် ဒံက်တာမေန်ကျဳဝေန် ဂးရ။
“ဍေံကဵုထပက်စၟတ်တဲဒုၚ်ဝန် ညိညကီု။ အဓိပ္ပါဲဍေံ ချဳဓရာၚ်ပရေၚ်ဍုၚ်ကွာန်၊ ဆဝ်ဗ္ၚုဟ်ပကောံမၞိဟ်၊ ထ္ၜးဆန္ဒတံဂှ်တှေ် ကၠောန်ဟွံဂွံပုဟ်။ ထပက်လဝ်စၟတ်တဲတုဲ ဆက်ကၠောန်မံၚ်ဖိုဟ်တှေ် ဍေံကေတ်အရေဝ် အတိုၚ်သၞောဝ်တံဏောၚ်။ အေညအ်ဂှ် လၟေၚ်ကမၠောန်ဍေံတံရဏောၚ်။ မုဟွံတၟေၚ်မံၚ်ရ။ ဂွံပအပ်ကဵုသ္ၚိဂှ်လေဝ် ဍေံစကာကဵု ထပက်စၟတ်တဲကီု” သာ်ဝွံ ညးဆက်ဟီုရ။
စပ်ကဵုကိစ္စဏံတုဲ လပါ်ညးတာလျိုၚ်မဆေၚ်စပ် ကံၚ်ဇြဳပရေၚ်အုပ်ဓုပ်တွဵုရးဂှ် ပိုဲတံကေတ်အဆက် ဟွံဂွံကီု လပါ်ကံၚ်ဇြဳလေဝ် လလောၚ်ပ္တိတ်လဝ်ပရိုၚ် ဟွံမွဲကီုရ။
ၜိုန်ဂှ်လေဝ် ပ္ဍဲကဵုဂိတုဖေဖဝ်ဝါရဳ (၁) အလဵုအသဳထိၚ်သီအဝဵုဂှ် ညးကေတ်လဝ်တာလျိုၚ် ဝန်ဇၞော် ပရေၚ်ကောပ်ကာဲဇြဟတ်မၞိဟ် ကေုာံ တမ်ရိုဟ်မၞိဟ် (လဝက) ဥုထောန်မေန်အံၚ်ဝွံ အခိၚ်ရပ်စပ်ထိၚ်ဒဝ်ဂှ် နွံမံၚ်မ္ၚးသ္ၚိဝန်ဇၞော်ဂှ်ရ ဟွံဒးဒုၚ်ထိၚ်ဒဝ်မွဲသာ် ဗလးမံၚ်ဖိုဟ်ရောၚ် ဂွံတီကေတ်ရ။
“ဟိုတ်နူကဵု CDM တုဲ သၞာဲဒဴအလဵုအသဳညးဍုၚ်ကွာန်တံ ပရေၚ်ဇီုကပိုက် နွံကၠုၚ်မ္ဂး အခိၚ်ကာလ ကလေၚ်ဒက်ပ္တန် အလဵုအသဳညးဍုၚ်ကွာန်မ္ဂး ကလေၚ်ကေတ်ကဵုတာလျိုၚ်ရောၚ်” သာ်ဝွံ ဥုထောန်မေန်အံၚ် ပ္တိတ်လိက်လလောၚ်တြးဂှ်ရ ဌာနအုပ်ဓုပ်ပွိုၚ်ဍုၚ်မတ်မလီုတံ ပံက်လဝ်အမှုကဵု ၝောံပိုဒ် (၅၀၅) တုဲ ရေၚ်တၠုၚ်မံၚ် သွက်ဂွံရပ်ထိၚ်အာရောၚ် ဂွံတီကေတ်ရ။
တုပ်သာ်ဝွံကီု ပ္ဍဲကဵုဂိတုဖေဖဝ်ဝါရဳ (၈) ဂှ် ဒံက်တာအေဇြာန် ပ္တိုန်လဝ်ဗဳဒဳယော ပ္ဍဲကဵုမုက်လိက်ပရေၚ်မၞိဟ် ဂလာန်ဖတိုက်ဖအောဝ်ညးဍုၚ်ကွာန် ပွိုၚ်မွဲမိနေတ်ဂှ် ပရေၚ်ရှေ်သှေ်ကၟိန်ဍုၚ် လီုလာ်ဂးတုဲ ဒးဒုၚ်ပံက်လဝ်အမှု နကဵုၝောံပိုဒ် ၅၀၅ (က) ကီု ဂွံတီကေတ်ရ။
0 Comments