သၞံၚ်တိုၚ်၊ ဂိတုမာတ် ၁၄၊ ၂၀၂၁

ပါၚ်လုပ်ဍုၚ်၊ တိတ်ဍုၚ်တံ ပရေၚ်စၟဳစၟတ်ဂၠိုၚ်ကၠုၚ်
သၞံၚ်တိုၚ်၊ ဂိတုမာတ် ၁၄၊ ၂၀၂၁
အသိၚ်ပေဲါထ္ၜးဆန္ဒ ဒစဵုဒစး အလဵုအသဳကံၚ်သဳပၞာန်ဂှ် ဆက်ကတဵုဒှ်ဒၟံၚ်ဟွံယအ်ဏီတုဲ ပါၚ်လုပ်ဍုၚ်၊ တိတ်ဍုၚ်ဗွဲမဂၠိုၚ် ပရေၚ်စၟဳစၟတ်ဂၠိုၚ်ကၠုၚ်ရ။
ပ္ဍဲတွဵုရးဍုၚ်မန်မ္ဂး လတူဍုၚ်ဗွဲမဂၠိုၚ်ဂှ် ပါၚ်လုပ်ဍုၚ်ကီု၊ လ္ပာ်တိတ်ဍုၚ်ကီုဂှ် ဒပ်ပၞာန်တံ စၟဳစၟတ်ဒၟံၚ် မၞိဟ်အာတရဴ နကဵု ကွဳစက်ကီု ကွဳလိုန်ဓာတ်တံကီုရ။
ပရေၚ်စၟဳစၟတ်ဂှ် နူတံကၠာဂှ် နွံဆမွဲၜါဍုၚ်ဟေၚ် ကတဵုဒှ်တုဲ ကြဴနူကဵု ပေဲါထ္ၜးဆန္ဒသ္ကာတ်မြဟ်ကၠုၚ်၊ ပရေၚ်ရပ်စပ် ကေတ်အရေဝ်သ္ကာတ်ကၠုၚ်ကီု၊ ပရေၚ်စၟဳစၟတ် လတူဍုၚ်တံလေဝ် ဂၠိုၚ်ကၠုၚ်ရ။
လတူရဲအာတရဴဂမၠိုၚ်ဂှ် ဒပ်ပၞာန်တံ သၟာန်သၟုက်တၚ်နၚ်ပူဂဵု ယၟု၊ အလဵုအာ၊ အလဵုကၠုၚ်တုဲ လဆောဝ်ဒှ်သံသယမ္ဂး စၟဳစၟတ်ပံက်ဗုၚ်ကွဳ၊ ဗုၚ်ကွဳစက်ကီု၊ ပံက်ဗဵုဖုၚ် ပ္ဍဲမုက်လိက် Social media ပတိုန်လဝ်ဂှ်ကီုနွံရ။
လဆောဝ်မ္ဂး အခိၚ်ပယျာံသဝ်တ္ၚဲ အခိၚ်ဗတံဂှ် ဒၞာဲဒှ်သံသယ၊ ဆေၚ်ဖျာဒှ်သံသယမ္ဂး လုပ်စၟဳစၟတ် သီုကဵုသ္ၚိ၊ ဆေၚ်ဖျာတံလေဝ်နွံရ။
ကြဴနူကဵု ပေဲါထ္ၜးဆန္ဒ ဒစဵုဒစး ကံၚ်သဳပၞာန် ပ္ဍဲဍုၚ်ဇၞော်ဗွဲမဂၠိုၚ် ဂိတုဖေဖဝ်ဝါရဳ (၂၈) ဂှ်တုဲ ဒှ်ပဋိပက္ခချိုတ်ဂျိုၚ်၊ ပရေၚ်ရပ်စပ် ကေတ်အရဝ်သ္ကာတ်မြဟ်ကၠုၚ် ပရေၚ်စၟဳစၟတ်လုပ်ဍုၚ်၊ တိတ်ဍုၚ်တံလေဝ် ဂၠိုၚ်ကၠုၚ်ရ။
“မွဲၜါတ္ၚဲဏံ လုပ်ကီု တိတ်ကီု ပၞာန်တံ (စစ်) မံၚ် ဖုၚ်ဇကု၊ မုဗီုနွံရော? မုပတိုန်လဝ်ဗီု ပ္ဍဲ fackbook နွံရော? ညးတံပသတိ စၟဳစၟတ်မံၚ် ရဲထ္ၜးဆန္ဒတံ၊ တုဲတှေ် ပံက်မံၚ်ဗုၚ်ကွဳ၊ ပံက်ထိုၚ်နှာံ ညးတံ (စစ်) မံၚ်ဂွံဆဵု” သာ်ဝွံ သၟတ်နူကွာန်ဖံၚ်စိၚ်၊ ပွိုၚ်ဍုၚ်ဇြပ်ဗုမွဲတၠ ဟီုရ။