မိလတိုပ်ဗု၊ ဖေဖဝ်ဝါရဳ ၂၇၊ ၂၀၂၁
ရုၚ်ဂဥုဲဇၞော်လတူဍုၚ်တံ ဟွံဒုၚ်တဲမၞိဟ်ယဲတုဲ ညးလွဳယဲ ဒှ်ခက်ခုဲကဵု ပရေၚ်လွဳယဲ
မိလတိုပ်ဗု၊ ဖေဖဝ်ဝါရဳ ၂၇၊ ၂၀၂၁
အ္စာဂဥုဲသဝ်ဝန်ဂမၠိုၚ် ဟိုတ်နူချဳဓရာၚ်ပါလုပ်ဒၟံၚ် ပ္ဍဲပရေၚ်ချဳဓရာၚ်ဒစဵုဒစး ကံၚ်ဇြဳပၞာန်ထိၚ်ဒဝ်လဝ် အဝဵုဍုၚ်ဂှ်တုဲ ရုၚ်ဂဥုဲလတူဍုၚ် တံကၟာတ်၊ ဟွံဒုၚ်တဲမၞိဟ်ယဲဂှ်ရ မၞိဟ်တၠယဲဝေဒနာတံ ဒှ်ခက်ခုဲကဵု ပရေၚ်လွဳယဲရ။
သ္ပဟိုတ်နူရုၚ်ဂဥုဲဇၞော်လတူဍုၚ်တံ ဟွံဒုၚ်တဲမၞိဟ်ယဲဂှ်တုဲ မၞိဟ်ဗြဴပရေၚ်သၠးဂဝ်ဂၞဴကီု၊ ပရေၚ်ဂွံလွဳလွတ်ယဲတၞဟ် တၞဟ်သာ်ကီု ဒှ်ခက်ခုဲအိုတ်ရ။
“အဲဂှ် ချိၚ်လဝ် သၠဂဝ်ဂၞဴ ပ္ဍဲရုၚ်ဂဥုဲဇၞော် ဇြပ်ဗုဏံရ အပ်လဝ်တုဲမံၚ်ရ၊ ပတှေ်ရုၚ်ဂဥုဲရ ဂွံအာဒၞာဲတၞဟ်ဂှ် ခရိတ်အောန်မံၚ်တုဲ ပတှေ်ရုၚ်ဂဥုဲဇြပ်ဗုရ ဖျေံလဝ်စိုတ်၊ ဆဂး ရုၚ်ဂဥုဲဂှ် ဟွံဒုၚ်တဲပုဟ် ဂးတုဲ ဒးအာ (ဆေးခန်း) လှုဲအိုတ်ဂၠိုၚ်၊ ဒှ်အာခက်ခုဲကဵုလှုဲ” ဗီုဏံ ညးမိၚိုဲယျဳ နူပွိုၚ်ဍုၚ်ဇြပ်ဗု ဟီုရ။
ရုၚ်ဂဥုဲဇၞော်ဂှ် ဟွံဒုၚ်တဲမၞိဟ်ယဲတုဲ ညးတၠခန္ဓယဲဝေဒနာတံ အကြာတၚ်ဝါတ်ဂါတ်ကဵု ပရေၚ်စသုၚ်မံၚ်စံၚ်ဂှ် ဒး သ္ပပဓာန်ကဵု ရုၚ်ဂဥုဲပုဂ္ဂလိကတံအိုတ်ရ။
“စိုပ်အခိၚ်တ္ၚဲထ္ၜးဗုၚ် ဂွံကလေၚ်ထ္ၜးပၠန်ဂှ် ရုၚ်ဂဥုဲကၟာတ်လဝ် ဟွံဂွံထ္ၜးဟဂှ်၊ သောၚ်ပိုဲဏံ ကၠောန်မွဲတ္ၚဲ စမွဲတ္ၚဲရတှေ် ဂွံအာသၠဂဝ်ဂၞဴကီု ဝဳယဲကီုဂှ်၊ ဒၞာဲ (ဆေးခန်း) ရုၚ်ဂဥုဲပုဂ္ဂလိကဂှ် ဇြိုၚ်စိုတ်ကဵုခရိတ်ဟဂှ်ရ ဠ အပ်ဗုၚ်ဂှ် အပ်လဝ်ကဵု ရုၚ်ဂဥုဲဇၞော် (ဆေးရုံ)၊ လၟုဟ် (ဆေးရုံ) ဂှ် ကၟာတ်လဝ်တှေ် ဒးပြံၚ်အာ (ဆေးခန်း) တှေ် ဒးဟီုကဵုလှုဲပၠန်ရ” သာ်ဝွံ ညးတၠယဲဝေဒနာဂှ် ဆက်ဟီုရိုဟ်ရေၚ်ရ။
လၟုဟ်မ္ဂး ဟိုတ်နူအကာဲအရာ ပရေၚ်ဍုၚ်ကွာန်တုဲ အ္စာဂဥုဲသဝ်ဝန်ဂမၠိုၚ်တံ ပါလုပ်ချဳဓရာၚ်ဒၟံၚ် ပ္ဍဲကရောံ (CDM) ဒစဵုဒစး ကံၚ်ဇြဳအလဵုအသဳပၞာန်ဂှ်တုဲ ရုၚ်ဂဥုဲတံ ဆလအ်ဂွံပံက်ဂှ်လေဝ် ဟီုဟွံမာန်ဏီရောၚ် သဝ်ဝန်မွဲတၠ ဟီုရ။
“ရုၚ်ဂဥုဲဂှ် ကၟာတ်လဝ်လအ်မံၚ်ရ၊ ဆလအ်ပံက်ဂှ် ဟီုဟွံဒးဏီပုဟ်၊ ပြဟ်ဟ်ဏံ (ဆရာဝန်) ဇၞော် ပံက်လဝ် (ဆေးခန်း) နွံ” သာ်ဝွံ သဝ်ဝန် nurse ကေတ်လဝ်တာလျိုၚ် ပ္ဍဲရုၚ်ဂဥုဲဇၞော်ဍုၚ်ဇြပ်ဗုမွဲတၠ ဟီုရ။
ဟိုတ်နူရုၚ်ဂဥုဲဇၞော်လတူဍုၚ်တံ ဟွံဒုၚ်မၞိဟ်ယဲတၠဝေဒနာတံဂှ်တုဲ မၞိဟ်ဒးအာထ္ၜးယဲကီု၊ မၞိဟ်ဒးလွဳလွတ်ယဲ နာနာသာ်တံကီု လ္ၚဵုအာရုၚ်ဂဥုဲဒပ်ပၞာန်နွံ၊ လ္ၚဵုအာရုၚ်ဂဥုဲပုဂ္ဂလိက နွံဂၠိုၚ်ကၠုၚ်ရ။
