မာံသုခ၊ ဂိတုမာတ် ၂၉၊ ၂၀၂၁
ပ္ဍဲစၟတ်တ္ၚဲ 29.March.2021 ဂှ် နူကဵုတရဴအအာ ကၠုၚ်စိုပ် ဘာတန်သၠုၚ်ကောန်ဂကူမန် (ဝၚ်သ္ပဝ်) တုဲ ထံက်ပၚ်ကဵုဏာဒါန် ပ္ဍဲဘာတန်သၠုၚ်(ဝၚ်သ္ပဝ်) ကမ်ပျူတာ (၂၀) မရောၚ် ဂွံတီကေတ်ရ။
ပ္ဍဲကဵုခေတ် IT တဴတက်မံၚ်ဏံ ဇၟာပ်ကောန်ကွးဘာမန်၊ အ္စာဘာမန်တအ် ဒးလေပ်လဝ် ကွတ်ကမ်ပျူတာထေက်မံၚ်တုဲ ညံၚ်ဂွံဗ္တောန်အာ ကွတ်ကမ်ပျူတာဏံလောဲသွာမာန် ရန်တၟံတုဲ ကၠုၚ်ထံက်ပၚ်ဏာကဵု ကမ်ပျူတာဏံရောၚ် တၠဂုဏ်အ္စာအဇ္ဇ ဟီုမြော်ရ။
“ပညာဂတာပ်ခေတ်တ္ၚဲဏံ ကွတ်ဗ္တောန်ကမ်ပျူတာဏံဂှ် ပ္ဍဲကဵုကွးဘာမန်ပိုဲ ဟွံလေပ်ဂှ် ဟွံဂွံရပုဟ်၊ ပ္ဍဲဂကောံအ္စာၝောံ အ္စာဘာမန်ပိုဲ ဟွံလေပ်ဟွံဂွံရပုဟ်၊ ကောန်ပၞာန်မန်လေဝ် ဒးလေပ်ကမ်ပျူတာဏောၚ်၊ အ္စာဂဥုဲမန်လေဝ် ဒးလေပ်ကမ်ပျူတာဏောၚ်၊ က္ဍိုပ်သ္ကိုပ်မန်ပိုဲကဆံကဆံၚ် ဒးလေပ်ကမ်ပျုတာဏောၚ်၊ မုဟိုတ်ရောဟီုတှေ် ခေတ်ဏံဂှ် ဒှ်အာခေတ် IT ယျ၊ ကွတ်တအ်ဏအ်ဂှ် ယဝ်ပိုဲဟွံလေပ်လဝ်ပုဟ်တှေ် ပရေၚ်မၞိဟ် ပရေၚ်ဖောအ်ဗြေဝ် နာနာသာ်ဂှ် ဍေံလဇုဲလဇအာမာန်ဏောၚ်” သာ်ဏံ ထပ်ဟီုမြော်ရ။
နူကဵုမဒါန်ကောန်ဂကူဂမၠိုၚ် ပ္ကောံပ္ကေဝ်တုဲ ကမ်ပျူတာ (၁၆၀) မ နူတရဴအအာသ္ပဒဒန်တုဲ ဘာတန်သၠုၚ်ညဳသာ (၄၀) မ၊ ဘာတန်သၠုၚ်ဝၚ်သ္ပဝ် (၂၀) မ၊ ဘာတန်သၠုၚ်အၚ်ဒၚ် (၂၀) မ၊ ဗဟဵု (၂၀) မ၊ ဂိုၚ်စွံပ္ဍဲတရဴအအာ (၂၀) မ တုဲ ပ္ဍဲဘာစၟဳ ကေုာံ သွက်ဂွံစကာကမၠောန်ရုၚ်ဂှ် ပ္ဍဲဘာကောန်ဂကူမန်တန်လ္ဒောဝ်လေဝ် သွက်ဂွံပါ်ပရအ်အာနွံကီုရ။
သၟတ်မန်နူဒေသနာနာတအ် နွံပၟိက်ကဵု ဗ္တောန်ကွတ်ကမ်ပျူတာမွဲကာလ နွံပၟိက်ကဵု ကပေါတ်ကမ်ပျူတာမ္ဂး သွက်ဂွံကဵုအရီုဗၚ်နွံကီုရ။
ပ္ဍဲဘာတန်သၠုၚ်ကောန်ဂကူမန် (ဝၚ်သ္ပဝ်) ဂှ် ပြဟ်ပြဟ်ဏံ ကွးဘာတအ် သွဟ်လဝ်လိက်တုဲတၟိတၟိတုဲ အတးတုဲမ္ဂး သွက်ဂွံဆက်ပံက်အာ တန်ဗ္တောန်ကမ်ပျူတာ ကုကွးဘာတအ်နွံရ။
