သၞံၚ်တိုၚ်၊ ဂိတုမေ ၁၁၊ သၞာံ ၂၀၂၀
ပ္ဍဲကဵုပွိုၚ်ဍုၚ်ရေဝ် ကွာန်ပုပ္ဖဝတဳ ဒၞာဲရုၚ်ဂဥုဲမသက္ကၚုဟ်မး ဗဒဲါကျာ်ဒဵုတၟံဗြာတ်ဂှ် လွဳပရာကဵုလဝ် မၞိဟ်ယဲ (၅၀၀၀) ပြၚ်တုဲ မၞိဟ်ယဲသၠးဂဝ်ဂၞဴလေဝ် ပါမံၚ်ကီုရောၚ် ညးတာလျိုၚ်မွဲတၠ လဴထ္ၜးကဵု သၞံၚ်တိုၚ်ရ။
ပရေၚ်ချဳဓရာၚ် CDM အသိၚ်သ္ကာတ်ကၠုၚ်ဂှ်တုဲ ရုၚ်ဂဥုဲဍုၚ်ရေဝ်လေဝ် ဒေံါဇူထောံဂှ်ရ ဂွံရံၚ်စံၚ်အာ ပရေၚ်ထတ်ယုက်ညးဒေသတံဂှ် ကျာ်ဇၞော်အ္စာဒဵုတၟံဗြာတ် က္ဍိုက်ပ်တုဲ နူကဵုဂိတုဖေဖဝ်ဝါရဳ (၁၈) တေံ ပံက်ကၠုၚ်လဝ် ဗဒမ်လွဳယဲမသက္ကုၚုဟ်မးဂှ်ရောၚ်။
ညးရေၚ်တၠုၚ်ဖဵု ကောပ်ကာဲ နာဲလောန်ဂှ် “စပ်ကဵုပရေၚ်ထတ်ယုက်တုဲ ညးဒေသတံ ဒှ်မံၚ်ဒဒိုက်ဏောၚ် ကၠုၚ်ဟီုကဵု ဂုဏ်အ္စာ (ကျာ်ဇၞော်ဒဵုတၟံဗြာတ်)၊ တုဲတှေ် ညးလ္ၚဵု ဒးအဝပ် ဒးလွဳပြဟ်ဟ်တံဂှ် ဟိုတ်နူကဵုဆီတိတ်လောန်အာတုဲ ဒးအိုတ်အာလမျီုလေဝ် နွံမံၚ်ဂှ်ရ မၞိဟ်လညာတ်တုပ်ကဵုဂုဏ်အ္စာတံဂှ် ပံၚ်ကောံတုဲ စုတ်ကဵုမသြန်ဗွဝ်၊ ညးတၠဒါန်တံလေဝ် ကဵုလဝ်ဒါန်နွံကီုတုဲ စဒှ်ပံက်ကၠုၚ်လဝ်” သာ်ဝွံ ညးဟီုရ။
အတိုၚ်ကျာ်ဇၞော်အ္စာ ပၠတရဴကီု ဒုၚ်သ္ဇိုၚ်ကဵုသြန်ဒါန် နူကဵုတၠဒါန်နာနာတံဂှ်ကီု လွဳပရာကဵုမံၚ်မးမး မသက္ကုၚုဟ်မးတုဲ စဵုကဵုလၟုဟ် ပရေၚ်မၚ်မွဲရံၚ်စံၚ် မၞိဟ်ဗြဴနွံကဵုယဲဒိုက် (၁၀၀) တၠပြၚ်ကဵု လွဳၜံၚ်ဏာကောန်ၚာ် (၇၅) တၠတုဲဣရရောၚ် ကမ္မတဳကောပ်ကာဲ ဗဒမ်ဂဥုဲ ဥုအံၚ်နာၚ်ဝေန် ဂးရ။
ဥုအံၚ်နာၚ်ဝေန်ဂှ် “ဒဵုကဵုပွိုၚ်ၜါဂိတုဂှ် မၞိဟ်ယဲနူမ္ၚး ရံၚ်ကဵုမံၚ် အရိုဟ်တ္ၚဲရ။ ဟိုတ်နူကဵုခက်ခုဲကဵု တၠပညာအ္စာဂဥုဲတုဲ စနူကဵုဂိတုမေဂှ် တ္ၚဲစန်၊ တ္ၚဲဗုဒ္ဓဝါကဵု တ္ၚဲသိုက်တှေ် ရံၚ်ကဵုမံၚ်မၞိဟ်ယဲမ္ၚးတံကီု မၞိဟ်ယဲဒးအဝပ်၊ မၞိဟ်ယဲက္ဍၚ်တံဂှ်တှေ် ဒုၚ်မံၚ်တဲ ပွိုၚ် (၂၄) နာဍဳရ။ မၞိဟ်ယဲဒးပ္တိုန် မတ်မလီုတှေ်လေဝ် ပိုဲပလံၚ်ကဵုဏာရုၚ်ဂဥုဲပၞာန် (ကုတၚ်-၃၀၀) တေံရ’’ သာ်ဝွံ ညးဟီုရ။
ရဲဍုၚ်ရေဝ် ညးကၠုၚ်လွဳယဲ ဥုအံၚ်ခိုၚ်ဂှ် “ဒၞာဲရုၚ်ဂဥုဲ ဟွံမွဲပုဟ်တှေ် သွက်ရဲဒေသရေဝ်ဂှ် ယီုဂြက်မံၚ်ဏောၚ်။ လၟုဟ်မှ ဂွံစပံက်ရုၚ်ဂဥုဲအလဵုအသဳကီုလေဝ် အ္စာသဝ်ဝန် ဟွံပေၚ်ဏီပုဟ်။ စဵုကဵုလၟုဟ် ဒးပတှေ်မံၚ် အဏံရ။ စနူဂဥုဲဇဗ ပရေၚ်လွဳပရာကီု ပရေၚ်စသုၚ်ကီု တုဲတှေ် သွက်ရဲဝါတ်ကျာတ်လေဝ် နကဵုမဒါန်ညးတၞဟ်ဂှ် ဗဒဗဒဲါအာ ဂွံမံၚ်ဏောၚ်” သာ်ဝွံ ညးဟီုရ။
တုပ်သာ်ဝွံကီု ပ္ဍဲကဵုပွိုၚ်ဍုၚ်ၜါသွာၚ် ကွာန်မုဟ်ဒုန်ဂှ်လေဝ် ကျာ်ဇၞော်အ္စာတံ ပၠတရဴတုဲ ပံက်ရုၚ်ဗဒမ်ဂဥုဲစေတနာတုဲ တ္ၚဲအၚာ၊ သိုက် ကေုာံ သ္ၚိသဝ်တံကဵု လွဳပရာကဵုမံၚ်ကီုရောၚ် ညးစၞးကၠတ်ထဝ်တြေံ ဒံက်တာအံၚ်နာၚ်ဥု ဂးရ။
“လၟုဟ် နူကဵုဂိတုမေမံက်ဂှ် ရုၚ်ဂဥုဲအလဵုအသဳတံ ပံက်ကၠုၚ်မံၚ်ယျတှေ် ရုၚ်ဂဥုဲစေတနာ ကွာန်မုဟ်ဒုန်ပိုဲဂှ် ဇၟာပ်တ္ၚဲ အၚာ၊ သိုက်ကဵု သ္ၚိသဝ်ဂှ် ပံက်အာ မွဲသတ္တဟ (၃) တ္ၚဲဏောၚ်။ သွက်မၞိဟ်ဗုၚ်ၚ် တ္ၚဲအၚာ အကြာ (၃) နာဍဳကဝါ်ကဵု (၄) နာဍဳကဝါ်တှေ် ညံၚ်ဂွံထ္ၜးကဵု အ္စာသဝ် (အထူးကု) မာန်ဂှ်လေဝ် စဳဇန်မံၚ်ဖိုဟ်ရ” သာ်ဝွံ ညးဟီုရ။
နူကဵုဂိတုဖေဖဝ်ဝါရဳ (၁၁) တေံ အတိုၚ်ကျာ်ဇၞော်အ္စာတံ ပၠတရဴဂှ် မၞိဟ်ယဲဓမ္မတာကီု မၞိဟ်ယဲဒးအဝပ်ကီု လွဳပရာကၠုၚ်မံၚ်ကဵု မသက္ကုၚုဟ်မး လၟေၚ်တ္ၚဲရောၚ် ဂွံတီကေတ်လဝ်ရ။
0 Comments