ဝဏ္ဏမာန်၊ မေ ၂၉၊ ၂၀၂၁
ပ္ဍဲကဵုအခိၚ်ပံက်ဘာဏံဝွံ ဒၞာဲဘာဒေသသောၚ်ၜး ပဋိပက္ခဟွံမွဲဂှ် ဆက်ပံက်အာဘာ အတိုၚ်လၟေၚ်ဍာံတုဲ ဒၞာဲဘာဒှ်ခက်ခုဲ ကွာန်လ္ၚဵုဂှ် ဗ္တောန်အာလိက် ကုကွးဘာတံ ပ္ဍဲသ္ၚိကၠာရောၚ် နာဲရတ်ဂကူ (အ္စာဇြေ) ကမ္မတဳပရေၚ် ပညာဗဟဵု (လျိုၚ်ဆက်စၠောံ ကေုာံ သုတေသန) ဟီုရ။
ဘာကောန်ဂကူမန်ကီု ဘာတန်အလဵုအသဳကီု ဂိတုဂျောန်မံက်မ္ဂး စပံက်ဘာတုဲ ဍုၚ်/ကွာန်လ္ၚဵုဂှ် ဟိုတ်နူပဋိပက္ခ အကာဲအရာ ပရေၚ်ဍုၚ်ကွာန်တုဲ ဒၞာဲဍုၚ်-ကွာန် ဘာလ္ၚဵုဂှ် ဗ္တောန်ပံက်အာ ပ္ဍဲသ္ၚိကၠာရောၚ် သ္ဂးရ။
“ဒၞာဲဍေံဗၠးၜးမံၚ်ဂှ်ရဏောၚ်တှေ် ပံက်အာအတိုၚ်ဓမ္မတာ လၟေၚ်သၞာံဂှ်ရ၊ ဘာလ္ၚဵု ခက်ခုဲနွံတံဂှ်ဏောၚ်တှေ် ဟွံပံက်ဏီမွဲသာ် ပရေၚ်ဗ္တောန်လိက်ဂှ်တှေ် ပိုဲဖန်လဝ် ဗ္တောန်ကေတ်ပ္ဍဲသ္ၚိဏောၚ်၊ ဥပမာ ဗီုကဵုကွာန်ဇၞော်ဇၞော်လ္ၚဵုဂှ် တှေ် ဘာအလဵုအသဳ ဂွံပံက်ဂှ်လေဝ် မိမကွးဘာတံ ဒှ်မံၚ်ဂဝိၚ်နွံမံၚ်၊ ဘာကောန်ဂကူပိုဲလေဝ် ဒးမၚ်ရံၚ်အကာဲ အရာ အဵုသာ်ဂှ်ဍေံနွံ၊ ဆဂးတှေ် ပရေၚ်ဗ္တောန်လိက် ညံၚ်ဟွံဂွံလီုဂှ်တှေ် ပိုဲကဵုအ္စာဘာပိုဲ ဗ္တောန်ကေတ်ပ္ဍဲသ္ၚိ အဵုပိုဲ ဖန်လဝ်ဗီုဂှ်ဍေံနွံ” သာ်ဏံ နာဲရတ်ဂကူ (အ္စာဇြေ) ဟီုထ္ၜးရ။
ဟိုတ်နူအကာဲအရာ ပရေၚ်ဍုၚ်ကွာန်တ္ၚဲဏံတုဲ ဘာအလဵုအသဳကီု၊ ဘာကောန်ဂကူကီု ဍုၚ်-ကွာန်လ္ၚဵုဂှ် ပအပ်ဘာ လေဝ်နွံ၊ ဍုၚ်-ကွာန်လ္ၚဵု ဒှ်ဂဝိၚ်ကဵု ပရေၚ်ဍုၚ်ကွာန်ဟွံၜိုဟ်သိုဟ်တုဲ မိမကွးဘာလ္ၚဵု မၚ်ရံၚ်မံၚ် အကာဲအရာလေဝ် နွံရ။
“နူဘာတန် ယဝ်မိက်ကၠောံဘာကောန်ဂကူမန်ပိုဲမ္ဂး ပိုဲဟွံတးပဲါပုဟ်၊ ဒုၚ်မံၚ်တဲရ ဆဂး ဗၞတ်ဗ္ၜတ်ဘာဂှ် လၟိဟ်ကွး ဘာ ဗၞတ်ဗ္ၜတ်မံၚ်ဂွံၜိုတ်လဵုရောတှေ် ဂအုပ်ဘာတံဂှ် ဒးပညဳကဵုညးတံ၊ ပြံၚ်ကၠောံဘာကောန်ဂကူဂှ် အတိုၚ်လၟေၚ်တုဲ ကၠုၚ်တေံလေဝ် ပိုဲဒုၚ်မံၚ်တဲရ၊ လၟုဟ်လေဝ် ဒုၚ်မံၚ်တဲရ” နာဲရတ်ဂကူ (အ္စာဇြေ) ဆက်ဟီုထ္ၜးရ။
ဘာကောန်ဂကူမန်ဂှ် သ္ပဟိုတ်ကဵု အကာဲအရာယဲကိုဝ်ဝေဒ် သၞာံတုဲကၠုၚ်ဏံတုဲ ဗွိုၚ်တိဍာ်ဗော်ဍုၚ်မန်တၟိကဵု တိ ဍာ်သောၚ်ၜးသ္ၚောဲကဵုဍုၚ်မ္ဂး ပံက်ဗ္တောန်ဒၟံၚ်နွံတုဲ ဗွိုၚ်ပ္ဍဲဍုၚ်မ္ဂး ပံက်ဗ္တောန်ဒၟံၚ်ဗီုပြၚ် အကာဲအရာညးကဵုညးနွံရ။
ဘာကောန်ဂကူမန် ဗွိုၚ်ပ္ဍဲဍုၚ်ဂှ် ပွိုၚ်ဍုၚ်ဍာ်ဗု (၉) ဘာ၊ ပွိုၚ်ဍုၚ်ရေဝ်သၠုၚ်ကျာ (၂၂) ဘာ၊ ပွိုၚ်ဍုၚ်ရေဝ်သၟဝ်ကျာ (၂၇) ဘာ၊ ပွိုၚ်ဍုၚ်ဇြပ်ဗု (၁၂) ဘာ၊ ပွိုၚ်ဍုၚ်မုဟ်ဍုၚ် (၁၂) ဘာ၊ ပွိုၚ်ဍုၚ်ကျာ်မြဟ် (၄) ဘာ၊ ပွိုၚ်ဍုၚ်ကျာ်ပိ (၈) ဘာတုဲ သီုဗွိုၚ်တိဍာ်ဗော်ဍုၚ်မန်တၟိ ပံၚ်ဖအိုတ် လၟိဟ်ဘာကောန်ဂကူ နွံ (၁၃၁) ဘာရ။
