သၞံၚ်တိုၚ်၊ ဂိတုမေ ၁၈၊ ၂၀၂၁
သၟတ်ဗြဴပြိုၚ်ကျေဝ် ပ္ဍဲစၚ်ဂၠးကဝ် (Miss Universe) နူကဵုကၟိန်ဍုၚ်ဗၟာ ＂သူဇာဝၚ့်လွၚ်＂ ဂှ် အဃော ကၠောန်သ္ပပေဲါပြိုၚ်ကျေဝ် ပ္ဍဲတွဵုရးဖလဝ်ရဳဒါ (Florida) ကၟိန်ဍုၚ်အမေရိကာန်ဂှ် ကေတ်အခေါၚ် အရာတၟေၚ်တုဲ ပတိုန်ထ္ၜးတၞးလိက် ရာဒၞာကဵုဍုၚ်ဗၟာ (Pray for Myanmar) ဂးတုဲ ပရူပရာဂှ် ဍေံတမ္ညဝ်အာတုဲ ညးကဵုဇြဟတ်ဂၠိုၚ်ရ။
ညးဗြဴပြိုၚ်ကျေဝ်ဂၠးကဝ် နူကဵုဍုၚ်ဗၟာ (Miss Universe Myanmar) “သူဇာဝၚ့်လွၚ်” ဂှ် ညးတေံ ကျိုၚ်လဝ်ကယျိုၚ်ဂကူချေၚ်တုဲ တိုန်ပြိုၚ်ပကာန်ရ။ အဃောကွာ်တိတ်ကၠုၚ် နကဵုကယျိုၚ်ချေၚ်ဂှ် ညးတေံ ရပ်နၚ်လိက်မွဲတၞးတုဲ ကာလစိုပ်ဂတမုက်မၞိဟ်ဂှ် ပၠးပတိတ်ရ။
ဟိုတ်နူပၠးပတိတ်လိက် Pray for Myanmar တုဲ ညးဂၠးကဝ်တံ အရီုစိုပ်အာ လ္ပာ်ဍုၚ်ဗၟာ ဗွဲမဂၠိုၚ်ရ။ လျိုၚ်သဘၚ်ကၞာဂှ် ဟီုအရေဝ်သရုပ် ပရူဍုၚ်ဗၟာညိညတုဲ နူကဵုပၞာန်ထိၚ်အဝဵုတုဲ ညးဍုၚ်ကွာန်တံ သာ်လဵု ဒးဒုၚ်စသိုၚ်ဂှ်လေဝ် ဟီုညိရ။
နကဵုညးဗြဴပြိုၚ်ကျေဝ် “သူဇာဝၚ့်လွၚ်” ဂှ်တှေ် ကြဴနူကဵု ပၞာန်ဗၟာတံ ထိၚ်အဝဵုတုဲ နူကဵုစၟတ်တ္ၚဲ (၁) ဂိတုဖေဖဝ်ဝါရဳတေံဂှ် ညးတေံဂှ် ပါလုပ်ချဳဒရာၚ် ထ္ၜးဆန္ဒကဵု ရဲသကအ်မွဲစွံရ။ သွက်ဂွံပြိုၚ်ကျေဝ်ဂှ် အခိၚ်ညးတေံနွံညိညဓဝ်တုဲ ဒးဃရေက်ကၠုၚ် အမေရိကာန်ရ။
စိုပ်အမေရိကာန်ဂှ် ဂကူချေၚ်တံ ဗိုၚ်ရံၚ်စံၚ် ကုညးတေံတုဲ ဗိုၚ်ပလေဝ်ကဵုကယျိုၚ် သွက်ဂွံတိုန်ပြိုၚ် လတူစၚ်ဂၠးကဝ်ဂှ် ညးတေံ တၚ်ဂုန်ဗွဲမလောန်ရောၚ် ဂးရ။ ကယျိုၚ်ချေၚ် တိုန်ပြိုၚ်ဂှ်လေဝ် ဂွံအာလာပ် ＂ကယျိုၚ်ကျေဝ်အိုတ်＂The Best Costume တုဲ သီုကဵုပါလုပ် ပ္ဍဲလၟိဟ်မၞိဟ်ကျေဝ်အိုတ် (၂၁) တၠရ။
