မာံသုခ၊ ဂျောန် ၂၂၊ ၂၀၂၁

ဘာကောန်ဂကူမန် မၞုံပ္ဍဲပွိုၚ်ဍုၚ်လှာဒကှ်ဝွံ လၟေၚ်သၞာံ ဟွံရံၚ်ကဵုလၟိဟ်ကွးဘာ ရံၚ်ကဵုလၟေၚ်တန်ကွးဘာနွံတုဲ စွံပ္တန်ကၠုၚ်အ္စာဘာတအ်နွံရ။
သၞာံဏံ ဟိုတ်နူရံၚ်ကဵု လၟိဟ်ကွးဘာတုဲ စွံပ္တန်အာအ္စာဘာဂှ်ရ အ္စာဘာ ပ္ဍဲပွိုၚ်ဍုၚ်လှာဒကှ်တအ် ဒးသ္ပကၠုၚ် ပရေၚ်ပြံၚ်လှာဲစၠောံဒၞာဲဘာညးသ္ကံ ဒးနုက်/ဒးထပ်နွံတုဲ အ္စာဘာဒးဒုၚ်ပြံၚ်လှာဲကီု ဘာဒးဒုၚ်နုက်ယှအ်ဖျေံအ္စာကီု ဟွံပြေပြံၚ် ဒှ်ကၠုၚ်နွံရ။
“အကာဲအရာ လှာဒကှ်ဂှ် လၟုဟ် ဒှ်မံၚ်ညးကေတ်ထောံကဵု (အချိုး) (တၟံကၠံ) တှေ် ဘာလ္ၚဵု ဗီုဝၚ်ဂွိ ဒှ်မံၚ် (၁ ချိုး ၁၀) ဓဝ်တှေ် ညးနုက်ထောံမွဲ အ္စာဘာပိုဲဂှ် ကျာတ်မံၚ် ကွးဘာအောန်ဂှ်ဒး၊ တန်ဂှ် နွံမံၚ်နူပန်တန် ဒဵုစိုပ် KG တှေ် အ္စာၝောံပိုဲတအ်ဂှ် ဍေံဇြိုၚ်အာနွံလေဝ်” သာ်ဏံ ဒုလျိုၚ်ဌာနပညာခရိုၚ်မတ်မလီု မိသိုက်ဂျိဆာန် ဟီုရ။
တော်ကဵုလၟိဟ်ကွးဘာ အကြာ (၁၅/၂၀) တၠ အ္စာမွဲတုဲ ဘာလ္ၚဵုကွးဘာ (၂၊ ၃) တၠဓဝ် နွံမွဲတန်ကီု ကွးဘာလေဝ် နွံမံၚ်တန်ဇဳတုဲ အ္စာဘာတအ် ဒးကဵုမံၚ်အခိၚ်တုပ်တုပ် ဗီုကွးဘာဂၠိုၚ်ဂၠိုၚ်ကီုဂှ်ရ သွက်အ္စာဘာ ဘာဒးဒုၚ်နုက်လဝ်အ္စာတအ်ဂှ် ဗ္ဂေတ်ဟွံကၠောံ ဒှ်မံၚ်ခက်ခုဲကဵု ဒးပါ်အခိၚ်ဗ္တောန်လိက်နွံရ။
“လၟုဟ် ကျာတ်မံၚ်ဖိုဟ် ဒးပါ်အခိၚ် သွက်ဂွံပဟွံမွဲ ညးတော်လဝ်ကဵု လၟိဟ်ကွးဘာ၊ လၟိဟ်တန်ဍေံနွံစုၚ်မံၚ် ညအ်ပါ်အခိၚ်တုဲ ညးမွဲဒးဗ္တောန်မံၚ် (၁၀) ဘာသာ ဗီုပိုဲဏံဍေံကျာတ်အာ ဒဵုကဵုစိုပ် (၈) တန် အ္စာနွံ (၆) တၠဓဝ်” သာ်ဏံ အ္စာၝောံနူဘာကွာန်ကအ်အၚ်ထဝ်မွဲတၠ ထပ်ဟီုရ။
ပ္ဍဲပွိုၚ်ဍုၚ်လှာဒကှ်ဝွံ ဘာနုက်လဝ်အ္စာ နွံ (၆) ဘာ ဘာဝၚ်ဂွိ၊ ဘာဝေသာလဳပလိုတ်၊ ဘာကအ်အၚ်ထဝ်၊ ဘာဖဴခပဵု၊ ဘာကၠအ်ဗြာတ်၊ ဘာတၟံဒတုံ၊ အ္စာဘာနုက်နူဘာတအ်ဏအ်ဂှ် ဒးဒုၚ်နုက်တိတ်နူတာလျိုၚ်ဟွံသေၚ် ဒးပြံၚ်ကၠောံ ဒၞာဲဘာလၟိဟ်ကွးဘာဂၠိုၚ်ဂှ်တုဲ အ္စာဘာဒးဒုၚ်ပြံၚ်ဒၞာဲလ္ၚဵု ဟွံပြေပြံၚ်ကဵု ပရေၚ်ပ္ဍဲသ္ၚိတုဲ ဒေါံဇူအာနွံရ။