မာံသုခ၊ အဝ်ဂါတ် ၁၀၊ ၂၀၂၁

ပ္ဍဲဒေသလှာဒကှ် ဒၞာဲဒေသဗော်ဍုၚ်မန်တၟိ ထိၚ်ဒဝ်လဝ်ဝွံ ပရေၚ်ကၠောံထၞာန်ယဲ သၠုၚ်တိုန်ကၠုၚ်မံၚ်တုဲ ပ္ဍဲကဏ္ဍပရေၚ်စဵုဒၞာယဲဏံဂှ် ဇြဟတ်အ္စာဂဥုဲ သွက်ဂွံဘိုၚ်စမ်ၜတ်ယဲကီု ဇြဟတ်ညးဘိုၚ်ရေၚ်တၠုၚ် ပ္ဍဲပရေၚ်စဵုဒၞာယဲဏံကီု အောန်မံၚ်တုဲ နွံပၟိက်မံၚ် ဇြဟတ်အ္စာဂဥုဲ ကေုာံ ညးဘိုၚ်ပူဗိုၚ်တအ်ရောၚ် ဂွံတီရ။
ပ္ဍဲဒေသလှာဒကှ်ဝွံ သွက်ဂွံဘိုၚ်ရေၚ်တၠုၚ်စဵုဒၞာစမ်ၜတ်ယဲဂှ် နူကဵုညးလျိုၚ်အ္စာဂဥုဲ အဆံၚ်ခရိုၚ်မတ်မလီုတအ် စှေ်ပွိုၚ်တိုက်တုဲ ၜိုန်ဒစးဒုၚ် ဒက်ပတိုန်ဂကောံအ္စာဂဥုဲ အဆံၚ်ပွိုၚ်တိုက်ညးကဵုညး မွဲပွိုၚ်တိုက်မ္ဂး (၆) တၠ စဵုကဵုထပှ်ဒ္စာံတၠ ကာလယဲမံက်ဒှ်ကၠုၚ်မ္ဂး သွက်ဂွံဘိုၚ်ပါလုပ်ကဵု အ္စာဂဥုဲအဆံၚ်ခရိုၚ်တအ်ကီု နွံကီုလေဝ် ကာလကၠောန်ဓမံက်ရုပ်ရဴဂှ် နူကဵုအ္စာဂဥုဲတအ် ဘိုၚ်ပါလုပ်အောန်မံၚ်ဂှ်ရ ပ္ဍဲပရေၚ်စဵုဒၞာစၟဳစၟတ်ယဲဂှ် ဒးလဇုဲလဇကၠုၚ်နွံရ။
“တၚ်ခက်ခုဲဂှ်တှေ် ဍေံနွံမံၚ်မာဟလိုၚ်ဏး၊ ရံၚ်ကဵုအကာဲအရာဒေသပိုဲဏံ အဓိကဂှ် ခက်မံၚ်ကဵုဇြဟတ်မၞိဟ် မၞိဟ်ဂွံဘိုၚ်ပူဗိုၚ် နကဵုစိုတ်ဓါတ်နွံနွံဂှ် အောန်မံၚ်၊ အ္စာဂဥုဲကီု ညးဍုၚ်ကွာန်တအ်ကီု တုဲကၠုၚ်ဏံ ပိုဲကဵုကွတ်နဲကဲ ဂွံစၟဳစၟတ်ယဲ Test kit လ္ၚဵုဂှ် ဒေါံဟွံဂွံတုဲ ဒးကၠုၚ်၊ ကာလဒးဓမံက်ရုပ်ရဴကွေံကွေံဂှ် မၞိဟ်ပါဲက္ဍိုပ်နွံဂၠိုၚ်” သာ်ဏံ အ္စာဂဥုဲနူကဵုခရိုၚ်မတ်မလီုမွဲတၠ နာဲနာၚ်ဥူ ဟီုရ
ဟိုတ်နူကပေါတ်သွက်ဂွံစၟဳစၟတ်ယဲကီု အ္စာဂဥုဲ ကေုာံ ညးဘိုၚ်ပူဗိုၚ်ပါလုပ်အောန်မံၚ်ကီု ညးဒေသတအ် ဒှ်မံၚ်သံသယ လ္တူယဲဏံ ဟွံဍာံဂှ်နွံကီုတုဲ ပ္ဍဲဒေသလှာဒကှ် ပရေၚ်ကၠောံထၞာန်ယဲ ပြးဇး အသိၚ်သၠုၚ် ဂၠိုၚ်တိုန်ကၠုၚ်နွံရ။
ပ္ဍဲဒေသလှာဒကှ်ဝွံ မ္ၚးနူကမ္မတဳစဵုဒၞာယဲကပ် ဗော်ဍုၚ်မန်တၟိ ဒက်ပတန်လဝ်တုဲ ကမ္မတဳရီုဗၚ် ပရေၚ်စဵုဒၞာယဲ Covid-19 ပွိုၚ်ဍုၚ်လှာဒကှ် ထပ်ဒက်ပ္တန်လဝ်နွံတုဲ နူကဵုကမ္မတအ်တအ်ဂှ် ရာန်ကပေါတ် မပ္တံကဵု Test Kit သွက်ဂွံစၟဳစၟတ်ယဲကီု ဂဥုဲသွက်ညးဒှ်သံသယယဲ ဂွံစကီု ပဠောံ PPE ကေုာံ ဂဥုဲဂစတ်စၟကီု အံက်ဇြဳဂျေန်ကီု ဘိုၚ်မံၚ်ကဵုအ္စာဂဥုဲတအ်နွံရ။
ပ္ဍဲဒေသလှာဒကှ် ကွာန်မန် အကြာၜဳၜါဝွံ ကွာန်ကြုခယာၚ်၊ ကွာန်ဝါဂၠိၚ်၊ ကွာန်ကုန်မိပ်ဇြိပ်၊ ကွာန်ကအ်ပှ်လှ်၊ ကွာန်ဒဵုထောၚ်၊ ကွာန်သၞေဟ်ဂဒေါံတအ် စၟယဲမံက်မံၚ်နွံတုဲ ဟိုတ်နူယဲ Covid 19 တုဲ မၞိဟ်ဗြဴနူကဵုကွာန်ဝါဂၠိၚ်မွဲတၠ ကဵု မၞိဟ်တြုံနူကွာန်သၞေဟ်ဂဒေါံမွဲတၠ၊ နူကဵုကွာန်ကြုၚ်ခယာၚ်မွဲတၠ ဒးချိုတ်အာလဝ် (၃) တၠနွံရ။