မိလတိုပ်၊ အဝ်ဂါတ် ၁၁၊ ၂၀၂၁
အသိၚ်ယဲကိုဝ်ဝေဒ် (၁၉) အလန်တတိယဏံဝွံ ဟိုတ်ကၟာတ်လဝ် ဟွံကဵုအာကၠုၚ် ဒးမံၚ် stay at home တုဲ တိုက်လိက်သဳလလ္ၚဵု ဒှ်ကၠုၚ်အခက်ခုဲကဵု ပိဏ္ဍပါတ်ရ။
အခိၚ်ကာလလၟုဟ်ဝွံ သ္ပဟိုတ်ကဵု ပရေၚ်စဵုဒၞာယဲ ကၟာတ်စဵုဒၞာလဝ် သၞောတ်ဒၟံၚ်ပ္ဍဲသ္ၚိတုဲ ခမဳသၚ်တံကီု၊ သဳလတံကီု စှေ်ဒုၚ်ဒါန်ဟွံဂွံတုဲ ဒှ်အခက်ခုဲကဵု သွက်ပိဏ္ဍပါတ်ရ။ အပ္ဍဲဂှ်မ္ဂး တိုက်လိက်သဳလ ဓမ္မရာမိက ဍုၚ်ဇြပ်ဗုလေဝ်
“သဳလတအ်ဂှ် နူကညၚ်တေံရ ဟွံဂွံစှေ်မံၚ်ဒါန်တုဲ စနူဂိတုဇှေ်ဂှ်လေဝ် ယဲကိုဝ်ဝေဒ်ဂၠိုၚ်တိုန်တုဲ ပိုဲသဳလတအ် ဒှ် ခက်ခုဲနွံမံၚ်ညိ” သာ်ဝွံ အာစာသဳလ မိဓမ္မာစာရဳဂှ် ဟီုရ။
တိုက်လိက်ခမဳသၚ်လ္ၚဵုတံကီု၊ တိုက်လိက်သဳလလ္ၚဵုတံကီု သွက်စၞအာဟာရ ပိဏ္ဍပါတ်ဂှ် သ္ဒးသ္ပပဓာန်ကဵု စှေ်ပိဏ္ဍပါတ်၊ ဒုၚ်ဒါန်ရ။ နူကဵုစှေ်ပိဏ္ဍပါတ် ဟွံဂွံ၊ စှေ်ဒုၚ်ဒါန် ဟွံဂွံတုဲဂှ် သွက်တိုက်လိက်ခမဳသၚ်ကီု၊ တိုက်လိက် သဳလကီု ဒးစၟဳကၠုၚ်ကဵု ဒါယကာတၠဒါန်တအ်ရ။
“ဂွံဆက်အာဌာန်ဂတဟီုဂှ် ပြဟ်ဟ်ဏံ ဒးဟီုလ္ပါ်ပရေၚ်စသုၚ်ကၠာ လ္ပါ်သိုၚ်ခၞံဂှ် လက္ကရဴဟီုပၠန်၊ သဳလတအ်ဂှ် နွံပၟိက်မိက်ဂွံသ္ဂောံသ္ၚု၊ ကၠေၚ်၊ စၞစ စွံဂွံလအ်အ် ၜိုတ် (၁၅) တ္ၚဲ၊ မွဲဂိတုတအ်ဂှ်တှေ် ဂွံဆက်စအာ နွံပၟိက်ဗီုဂှ်လေဝ်” သာ်ဝွံ အာစာသဳလဂှ် ဆက်ဟီုထ္ၜးပၠန်ရ။
တိုက်လိက်သဳလ ဓမ္မာရာမိကဝွံ စနူသၞာံ (၁၃၇၀) သၞာံဂှ် စသိုၚ်ခၞံကၠုၚ်လဝ်တုဲ စိုပ်ကၠုၚ် သၞာံ (၁၃၇၅) သၞာံဂှ် စပံက်ကၠုၚ်တိုက်လိက်သဳလ ပ္ဍဲကဵုအရာပ်အံၚ်ကုသိုလ်၊ ဂၠံၚ်လ္ဂန်အိန်၊ လ္တူဍုၚ်ဇြပ်ဗုဂှ်ရ။
