မိလတိုပ်၊ ဂျူလာၚ် ၂၉၊ ၂၀၂၁
ဂဥုဲဇြဟတ်လ္ၚဵု စဵုဒၞာဆက်စပ်ယဲကိုဝ်ဝေဒ် (၁၉) ဂှ်ဝွံ ဂကူဂဥုဲဇြဟတ်လ္ၚဵု မၞိဟ်တအ်သုၚ်စောဲဂၠိုၚ်တုဲ ရာန်ဟွံဂွံရရောၚ် တၠဆေၚ်ဂဥုဲ လ္တူဍုၚ်ဇြပ်ဗုကီု ဆေၚ်ဂဥုဲလတူဍုၚ်မုဟ်ဍုၚ်တအ်ကီု ဟီုရ။
“ဂဥုဲဇြဟတ် မၞိဟ်တံတီဂၠိုၚ် ယၟုပြာကတ်ဒယှ်ယှ်တံဂှ်တှေ် ဗကန်ရာန်ဟွံဂွံရ၊ ပိုတ်အာရ၊ အလဵုလေဝ် ဗကန် ဟွံဂွံရ” သာ်ဝွံ တၠဆေၚ်သွံဂဥုဲ ဍုၚ်ဇြပ်ဗုမွဲတၠ ဟီုရ။
“ဂဥုဲဇြဟတ်လဵုလေဝ် ဟွံမွဲရပုဟ် ဆေၚ်ကဵုဂဥုဲဇြဟတ် မၞိဟ်တအ်တီဂၠိုၚ်ဂှ်တှေ် မၞိဟ်တအ်ဗက်ရာန်မံၚ် ဂလိုၚ်လဵု လေဝ် ကေတ်ဟွံဂွံရပုဟ်” သာ်ဝွံ တၠဆေၚ်သွံဂဥုဲ (ဆေးမှူး) ပွိုၚ်ဍုၚ်မုဟ်ဍုၚ်မွဲတၠ ဟီုရ။
ပ္ဍဲကဵုဂကူဂဥုဲဇြဟတ် ဆက်စပ်စဵုဒၞာယဲကိုဝ်ဝေဒ်ဂမၠိုၚ်ဂှ် စတံနူဂဥုဲဇြဳဝေတ် (Ceovit)၊ ဂဥုဲအေန်ဏာဗောန်ဇြဳ (Envervon – C)၊ ဂဥုဲဗိုၚ်အိုဝ်ဂျက်သေတ် (Biogesic) ၊ ဂဥုဲ Vicee ၊ ဂဥုဲဇြဟတ် ဆက်စပ်ကဵု (Vitamin – C) ဂမၠိုၚ်တအ်ဂှ် ရာန်ဗကန်ကေတ်ဟွံဂွံတုဲ ဂဥုဲပိုတ်အာနွံရ။
“လၟုဟ်ဂှ် ဒှ်ယဲဂၠိုၚ်တိုန်တုဲ မၞိဟ်တံ ဖေက်လကိုတ် ပကောံရာန်တိုန်ဂဥုဲ၊ မၞိဟ်ဒှ်ယဲတအ်လေဝ် ဒးလွဳကေတ် ပ္ဍဲသ္ၚိ ဇကုကဵုဇကုရတှေ် ဒးရာန်စဂဥုဲမ္ၚး ဒးလွဳစကေတ်ကေတ်ရတှေ် ဟိုတ်နူဂှ် မၞိဟ်ရာန်စဂဥုဲဂၠိုၚ်၊ မၞိဟ်ရာန်ပကောံ စွံလဝ် ဂဥုဲဂၠိုၚ်၊ ဒၟာနူဂှ်ရ ဂဥုဲဇြဟတ်ဂကူမၞိဟ်တီဂၠိုၚ်ဂှ်တှေ် ပိုတ်အာ ရာန်ဟွံဂွံဒှ်အာ” တၠဆေၚ်သွံဂဥုဲဂှ် ဆက်ဟီုထ္ၜးရ။
ၚုဟ်ဂဥုဲဇြဟတ်တံဂှ် စတံနူ (Envervon – C) ဂှ် ကၠာတဲဂှ် မွဲကာတ် (၄ မ) မ္ဂး (၈၀၀) ဒကေဝ်ဂှ် ဒှ်အာ (၁၈၀၀) ဒကေဝ်၊ (Biogesic) ဂှ် ကၠာတဲ မွဲကာတ် (၂၀ မ) (၁၀၀၀) ဂှ် ဒှ်အာ (၃၅၀၀) ဒကေဝ်၊ ဂဥုဲ (Ceovit) ဂှ် နူကၠာဂှ် မွဲကာတ် (၇၀၀) ဂှ် ဒှ်အာ (၁၅၀၀) ဒကေဝ်၊ သီုဖအိုတ်ဂှ် တိုန်အာ (၂-၃) ဆရ။ ၜိုန်ဂှ်လေဝ် လၟုဟ်မ္ဂး သာ်လဵုလေဝ် ရာန်ဟွံဂွံ ဒှ်အာရ။
ကပေါတ်မဆေၚ်စမ်ကဵု စဵုဒၞာယဲကိုဝ်ဝေဒ် စၞဒှ်ဇြဟတ် မပတံကဵု (ၚှက်သိုက်၊ ကြက်ပေါၚ်ရည်) တအ်ဂှ်မ္ဂး ၚုဟ်သၠုၚ်တိုန်ဒၟံၚ်တုဲ ဗကန်ဂၠာဲရာန် ဟွံလောဲရရောၚ် ဂွံတီကေတ် နူကဵုတၠဆေၚ် သွံဒၟံၚ် (ၚှက်သိုက်) မွဲတၠရ။
“(ၚှက်သိုက်) ပ္ဍဲဖျာပိုဲ ပိုဲတြးကဵုဒၟံၚ် ဖံက်သေဝ်တအ်ဂှ်တှေ် ကေတ်ဟွံလောဲ ဗကန်ဂှ် ဗကန်ဒၟံၚ်ရ၊ ဆဂး လၟုဟ်ပိုဲ ဗကန်လဝ်ဂှ် ဟွံစိုပ်ဏီပုဟ်၊ ကပေါတ်ဟွံစိုပ်ဒၟံၚ် ၜိုတ် (၃) သတ္တဟဒှ်ယျလေဝ်၊ ၚုဟ်လေဝ် ဟီုကဵုဟွံမာန်ဏီ” သာ်ဝွံ ဆေၚ်သွံတြးဒၟံၚ် (ၚှက်သိုက်) လ္တူဍုၚ်ဇြပ်ဗုဂှ် ဟီုရ။
(ၚှက်သိုက်ဂမၠိုၚ် Brands) ဗူဇၞော်ဂှ် တုဲကၠုၚ်ဂှ် မွဲဖာ (၆) ပုလၚ်မ္ဂး ၚုဟ် (၂၃၀၀၀) ဒကေဝ်၊ လၟုဟ်ၚုဟ် (၄၉၀၀၀) ဒကေဝ်၊ Gold ဗူဍောတ်ဂှ် ၚုဟ်တုဲကၠုၚ် (၂၁၀၀၀) ဒကေဝ်ဂှ် လၟုဟ် ၚုဟ်တိုန်ဒှ်အာ (၃၂၀၀၀) ဒကေဝ်ဂှ်လေဝ်ရာန်ဟွံလောဲတုဲ Bird’s Nest တအ်ဂှ် ၚုဟ်ဍေံဒဵုဟီုဟွံမာန် ကေတ်ဟွံဂွံ ဒှ်ကၠုၚ်ရ။
