မိလတိုပ်၊ အံက်တဝ်ဗာ ၁၁၊ ၂၀၂၁
ကောံဓရီုဇၞော်သၟတ်မန် အလန်ဒုတိယဂှ် ဟိုတ်နူအကာဲအရာယဲကပ် ပဆုဲလဝ်အခိၚ်ဂှ် ကမ္မတဳကၠောန်ဗဒှ်တံ ကလေၚ်သ္ၚဳဂၠိပ် အကာဲအရာတုဲ သွက်ဂွံကၠောန်ဗဒှ်အာ ပ္ဍဲကဵုဂိတုဒဳဇြေမ်ဗာ သတ္တဟပထမဂှ်နွံရောၚ် ညးတာလျိုၚ်ကမ္မတဳကၠောန်ဗဒှ်မွဲတၠ ဟီုထ္ၜးရ။
“ကောံဓရီုဇၞော်သၟတ်မန် အလန်ဒုတိယ တဲကၠာဂှ် နူကဵုဂိတုတုဲကၠုၚ်တေံရ ပိုဲကၠောန်ဏောၚ် ဟီုလဝ်ဟဂှ်၊ ဆဂးတှေ် ဟိုတ်နူကဵု အကာဲအရာယဲတုဲတှေ် ပိုဲပဆုဲလဝ်သီုပတိတ်ထောံလိက်၊ ဇှ်တှေ် တုဲကၠုၚ်ကောံဓရီု ကမ္မတဳကၠောန်ဗဒှ်ပိုဲ မုဟွံလအ်ဏံဂှ်တှေ် ပိုဲကလေၚ်ချိၚ်ထောံတ္ၚဲယျ၊ ပိုဲရန်လဝ်ဂှ်တှေ် ဂိတုဒဳဇြေမ်ဗာ (၃-၄-၅) ပွိုၚ် (၃) တ္ၚဲ ကၠောန်အာဏောၚ်” သာ်ဝွံ နာဲဉာဏ်သိုက်ရာမာဉ် နူကဵုကမ္မတဳကၠောန်ဗဒှ်လေဝ်ဒှ် နကဵုညးကဵုကသပ်ဌာန်ကောံသၟတ်မန်လေဝ်ဒှ်ဂှ် ဟီုရ။
ကောံဓရီုဇၞော်သၟတ်မန် အလန်ဒုတိယဂှ် နူကဵုကမ္မတဳကၠောန်ဗဒှ်တအ် ကၠောန်ဗဒှ်အာ ပ္ဍဲကဵုဌာန်ဂအုပ်ခရိုၚ်သဓီု ဗော်ဍုၚ်မန်တၟိရောၚ်။
“အဓိက တၚ်ရန်တၟံ ကၠောန်ကောံဓရီုဇၞော်သၟတ် အလန်ဒုတိယဏံဂှ်တှေ် တၚ်အဓိကအိုတ်ဂှ် ပိုဲသ္ပဒတန် မူဝါဒသၟတ် ပိုဲချူဓဇက်လဝ်ဂှ်ရ၊ အဵုပ္ဍဲဏံတှေ် သၟတ်ကဵု ပရေၚ်ဍုၚ်ကွာန်၊ သၟတ်ကဵု ပရေၚ်ပညာ၊ သၟတ်ကဵု ပရေၚ်ပိုန်ဒြပ် ဒုၚ်သ္ဇိုၚ်မူဝါဒဂှ်တုဲတှေ် သဳကၠဳအာဏောၚ်၊ သ္ပအာဒတန် လတူမူဝါဒဂှ်ဏောၚ်” သာ်ဏံ နာဲဉာဏ်သိုက်ရာမာဉ် ထပ်ဟီုရ။
ကောံဓရီုဇၞော်သၟတ်မန် အလန်ဒုတိယဝွံ ရန်လဝ်နူတဲကၠာဂှ် ပ္ဍဲဂိတုဂျူလာၚ် (၂၇/၂၈/၂၉ -၂၀၂၁) ဏံဂှ် ရန်လဝ် သွက်ဂွံကၠောန်အာ ကောံဓရီုဇၞော် ဂကောံသၟတ်မန် ပ္ဍဲခရိုၚ်သဓီု ပွိုၚ် (၃) တ္ၚဲရ။ ဆဂးဂှ် ဗွဲကြဴဏံ ဟိုတ်နူအကာဲအရာယဲကပ် အသိၚ်အလိုန်လပှ်တတိယဂှ် အဃောသ္ကာတ်မြဟ်တုဲ ကမ္မတဳကၠောန်ဗဒှ်တအ် လလောၚ်တြးပဆုဲလဝ်ရ။
ကောံဓရီုဇၞော်ဂကောံသၟတ်မန်ဝွံ ဗော်ဍုၚ်မန်တၟိ၊ ဂကောံသၚ်၊ ဂကောံသၟတ် ပ္ဍဲကဵုတွဵုရးဍုၚ်မန်၊ ဒေသပယျဵု ညးစၞးတအ် ဗၞတ် (၁၅၀) တၠ ကော်ဘိက်အာတုဲ သီုကမ္မတဳကၠောန်ဗဒှ်မ္ဂး မၞိဟ်ၜိုတ် (၂၀၀) တၠ သွက်ဂွံ တိုန်စိုပ်မာန်ဂှ် ကမ္မတဳကၠောန်ဗဒှ်တံ ဖန်ဇန်လဝ်ရ။
ပ္ဍဲကဵုကောံဓရီုဇၞော်သၟတ်မန် အလန်ဒုတိယဏံဝွံ စပ်ကဵုအကာဲအရာ ပရေၚ်ဍုၚ်ကွာန် ကတဵုဒှ်ဒၟံၚ်တ္ၚဲဏံဂှ် သဳကၠဳ သ္ၚဳဂၠိပ်အာ ကုညးစၞးဗော်ပရေၚ်ဍုၚ်ကွာန်တအ်တုဲ လစွံစိုတ်သၟတ်တအ် လတူအကာဲအရာ ပရေၚ်ဍုၚ်ကွာန်ဂှ်လေဝ် သွက်ဂွံသဳကၠဳအာနွံရောၚ် သ္ဂးရ။
ဂကောံသၟတ်မန်ဝွံ နူကဵုသၞာံ (၂၀၁၄) ဂှ် ကၠောန်ကၠုၚ်လဝ် ကောံဓရီုဇၞော် ဂကောံသၟတ်မန် အလန်ပထမ ပ္ဍဲသာသနာ (၂၅၀၀)၊ လ္တူဍုၚ်မတ်မလီုရ။
