မိလတိုပ်၊ အံက်တဝ်ဗာ ၁၁၊ ၂၀၂၁
သ္ဘၚ်ကျာ်ခမဳသၞာံဏံဝွံ ဟိုတ်နူအသိၚ်အကာဲအရာ ယဲကိုဝ်ဝေဒ် (၁၉) ဖျေံလဝ်စေဝ်ပၞောန်နွံတုဲ ကၠောန်အာ ဆၜိုတ်ပရေၚ်အခိုက်ကၞာ ပရေၚ်ဘာသာရရောၚ် ညးတာလျိုၚ်ဂေါပက ကျာ်ခမဳမွဲတၠ ဟီုထ္ၜးရ။
သ္ဘၚ်ပရေၚ်အခိုက်ကၞာ ပရေၚ်ဘာသာဟီုဂှ် ဖ္ဍောတ်ပူဇဴပဌာန်ကီု၊ ကၠောန်ဗဒှ်အာ အစဳဇန် တ္ၚဲအဘိဓမ္မာ ဖ္ဍောတ်ဓရ်ကီု ညးထိၚ်ဘဏ္ဍာ (ဘဏ္ဍာထိန်းဂေါပကအဖွဲ႕-ရုံးအဖွဲ႕မှူး) ဥုဖျဵုညုၚ် ဟီုသာ်ဝွံရ။
“သၞာံဏံလေဝ် ကၠောန်သ္ဘၚ်ဗီုသၞာံတုဲကၠုၚ်တေံပၠန်ရ၊ သ္ဘၚ်ဖ္ဍောတ်ပူဇဴပဌာန်ကဵု သ္ဘၚ်တ္ၚဲအဘိမ္မာဖ္ဍောတ်ဓရ်၊ ကၠောန်သ္ဘၚ်ၜါဏံရ၊ ပ္ဍဲအခန်ကၞာသၞာံဏံတှေ် ကၟုဲပလုၚ် ကဆံၚ်တွဵုရး၊ ကဆံၚ်ခရိုၚ်၊ ကဆံၚ်ပွိုၚ်ဍုၚ်တအ် သွက်ဂွံတိုန်စိုပ်နွံ၊ အစဳဇန်ပံက်အခန်ကၞာတှေ် ပ္ဍဲဂိတုဝှ်ပေၚ် အခိၚ်နူဂယး (၅) နာဍဳဂှ် ကဵုဒါန်ဖါပ်သၚ် ကုခမဳသၚ် ဘာလ္တူဍုၚ်ကျာ်ခမဳ (၁၇) ဘာဂှ်ရ၊ တုဲဂှ် ကၠောံအာ အစဳဇန် တ္ၚဲအဘိဓမ္မာဖ္ဍောတ်ဓရ်ရ၊ တ္ၚဲအဘိဓမ္မာ ဖ္ဍောတ်ဓရ်ဂှ်တှေ် အခိၚ်ဗ္တံ ၜိုတ် (၉) နာဍဳတှေ် အစဳဇန်တုဲဒှ်အိုတ်ရောၚ်” သာ်ဏံ နာဲဖျဵုညုၚ် ဟီုထ္ၜးရ။
သ္ဘၚ်ကျာ်ခမဳဂှ် သၞာံတုဲကၠုၚ်တေံလေဝ် ဟိုတ်နူအကာဲအရာ ယဲကိုဝ်ဝေဒ် (၁၉) တုဲ ကၠောန်လဝ် ဆၜိုတ်သ္ဘၚ်ပရေၚ်ဘာသာကီုရ။
ကၟုဲပလုၚ် နူဌာန်သ္ၚောဲ ဒေသစုၚ် ကၠုၚ်စိုပ် လ္ၚောဝ်ကျာ်ခမဳ ဝေၚ်သ္ဘၚ်ကျာ် မိပ်ဇြိပ်ကၠာလေဝ် သၞာံဏံဂှ် ပ္ဍဲတ္ၚဲအဒိုတ်၊ တ္ၚဲသ္ၚိသဝ်၊ တ္ၚဲကၟာတ်ရုၚ်ဂှ်မ္ဂး ကၟုဲဒေသတအ် ကၠုၚ်ဝေၚ်နွံမံၚ်ညိည၊ ရာန်ဏာဖျာ သွက်ပရေၚ်တဲ ညိညနွံရောၚ် တၠဆေၚ်ဖျာသၟဝ် မိခေန်မျဝေန် ဟီုရ။
“စပံက်ဂွံဖျာ (၅) တ္ၚဲဂှ် ဂွံအာ ဆၜိုတ်ခရိတ်စ ညိညဇြိုၚ်သာရ၊ ပေဲါဇါတ်ဟွံမွဲတှေ် ကၟုဲအောန်ဏောၚ်လေဝ် ဖျာဂှ် ဂွံသွံညိညလေဝ်၊ ဇၟာပ်တ္ၚဲတိၚ် တ္ၚဲသဳ တ္ၚဲကၟာတ်ရုၚ်ကီုဂှ် ရဲဒေသအကြာကွာန်တအ်ဂှ် ကၠုၚ်လ္ၚောဝ်မံၚ် ကျာ်ခမဳဟဂှ်ရ၊ သ္ဘၚ်ကျာ်ခမဳ သၞာံဏံဂှ် ဗီုအရိုဟ်ဟ်သၞာံတုဲကၠုၚ်တေံဂှ် ဟွံဂံၚ်စၟဳလဝ်ပုဟ်လေဝ်” သာ်ဝွံ တၠဖျာသၟဝ် မိခေန်မျဝေန်ဟီု ဆက်ဟီုပၠန်ရ။
နူကဵုအသိၚ်ယဲကိုဝ်ဝေဒ် (၁၉) ကၠောံထၞာန်ဂၠိုၚ်ကၠုၚ်ဂှ်ရ စနူဂိတုဂျူလာၚ်မံက်ဂှ် စကၟာတ်ကၠုၚ်လဝ် ဟွံကဵုကၟုဲတအ် ကၠုၚ်လ္ၚောဝ်ကျာ်ခမဳတုဲ ပ္ဍဲဂိတုအဝ်ဂါတ် (၁၄) ဂှ်မ္ဂး က္လေၚ်ပံက်ကဵု အခေါၚ်ကၟုဲတအ် ကၠုၚ်လ္ၚောဝ်ကျာ်ခမဳရ။
သ္ဘၚ်ကျာ်ခမဳတုဲကၠုၚ်ရိုဟ်ဟ်သၞာံတေံမ္ဂး သ္ဘၚ်ပူဇဴဖ္ဍောတ်ပဌာန်၊ တ္ၚဲအဘိဓမ္မာဖ္ဍောတ်ဓရ် (အဘိဓမ္မာအခါ တော်နေ႕)၊ ဗလးဖံၚ်မှာထေရ်ဂုတ်(ရှၚ်ဥပဂုတ္တမထေရ် ဆွမ်းအိုးမျှော်ပွဲ) တအ်ဂှ် စနူဂိတုဝှ် (၁၄) မံက် စဵုကဵုစိုပ် ဂိတုဝှ် (၅) စွေက်တေံဂှ်မ္ဂး ပွိုၚ်(၇) တ္ၚဲပေၚ်ၚ် ကၠောန်ဗဒှ်ကၠုၚ် သ္ဘၚ်ကျာ်ခမဳ သာ်ဝွံနွံရ။
ပ္ဍဲကဵုတွဵုရးဍုၚ်မန်ဂှ် သ္ဘၚ်ကျာ်ခမဳဝွံ ပြာကတ်မြဟ်တမ္ညဝ်ကၠုၚ် အလုံမွဲကၟိန်ဍုၚ်ဗၟာမွဲတုဲ ကၟုဲနူရးဇၞော်တအ်ကီု၊ ကၟုဲနူကဵုတွဵုရးဂမၠိုၚ်တအ်ကီု ဇၟာပ်စိုပ်အခိၚ်သ္ဘၚ်ကျာ်ခမဳဂှ် ကၠုၚ်လ္ၚောဝ်တဴ ကျာ်လဒေါဝ်ၜဳကျာ်ခမဳ ဂြုဂြုဂြီုဂြီု လၟေၚ်သၞာံနွံရ။
