ဝဏ္ဏမာန်၊ နဝ်ဝေမ်ဗာ ၁၂၊ ၂၀၂၁

ပ္ဍဲကဵုဗွိုၚ်ဂကောံလိက်ပတ်ယေန်သၞာၚ်မန်ဂမၠိုၚ် ပံၚ်ကောံတုဲ ချပ်စဳဇန်ဒၟံၚ် သွက်ဂွံဒက်ပတန် ဂကောံလိက်ပတ်ယေန်သၞာၚ်မန်ဗဟဵုနွံရောၚ် ဂွံတီကေတ်ရ။
“သွက်ဂွံဒှ် ဂကောံလိက်ပတ်ယေန်သၞာၚ်မန်ဇၞော်ဇၞော် ဗီုကဵုဂကောံဗဟဵုမွဲဂှ် အဃောပိုဲတအ် ချပ်ဇန်ပညဳဒၟံၚ်ဖိုဟ်ရ။ စှေ်စိုတ်ညးသ္ကံ ယဝ်သဒှ်တှေ် ဂကောံလိက်ပတ်ယေန်သၞာၚ်မန်ဖအိုတ်ဏံ ပိုဲပကောံတုဲ ဒးကၠောန်ကောံဓရီုမွဲရောၚ်၊ တုဲတှေ် ဖျေံအာဗီုပြၚ် ဂကောံလိက်ပတ် သ္ပစၞးဂကူမန် မွဲဇၞော်ဇၞော်မွဲရောၚ်” သာ်ဝွံ အ္စာကၞေဟ်နာဲအံၚ်ဇၞး (ဥက္ကဌဂကောံအ္စာကၞေဟ်မန်) ဟီုရ။
ပ္ဍဲကဵုဂကောံလိက်ပတ်ယေန်သၞာၚ်မန် ဗီုပြၚ်ဂကောံဗဟဵုမွဲဂှ် တုဲကၠုၚ်တေံလေဝ် ဂကောံလိက်ပတ်ပွိုၚ်ဍုၚ်ဂမၠိုၚ်၊ ဂကောံမဟာဇန်ဂမၠိုၚ်၊ ဂကောံသုခုမ ဇာတ် ဂဳတဂမၠိုၚ် ပံၚ်ကောံတုဲ ဒက်ပတန်လဝ် “ဂကောံပံၚ်ကောံလိက်ပတ် ယေန်သၞာၚ်မန်ဗဟဵု” လေဝ် နွံဒၟံၚ်ကီုရ။ ဆဂးဂှ် ပရေၚ်ကမၠောန် ဂကောံပံၚ်ကောံလိက်ပတ်ယေန်သၞာၚ်မန်ဗဟဵုဂှ် ပရေၚ်ချဳဓရာၚ် ဟွံမွဲရ။
“ပ္ဍဲမန်ဂှ် ဂကောံကမ္မတဳလိက်ပတ်ယေန်သၞာၚ်မန်ဗဟဵုမွဲ ဒးနွံထေက်၊ ဂကောံချဳဓရာၚ်ဒၟံၚ် သွာၚ်လိက်ပတ်သီုဖအိုတ် ပကောံတုဲတှေ် ဒးဒက်ပတန်ထေက်၊ ပမံၚ်ညိညိဟွံဂွံရ၊ ဂကောံဏံ ဒှ်တုဲတှေ် ဗီုပြၚ်ဂကောံစှေ်ကဵုသၞောတ်ဒးဒှ်၊ ဒးနွံကဵုရုၚ်ချိုတ်ချိုတ်ပၠိုတ်ပၠိုတ်ဏောၚ်၊ ဒးကၠောန်ကမၠောန် အခိၚ်ရုၚ်ပေၚ်ပေၚ် ဗီုကဵုရုၚ်ဌာနပရေၚ်ပညာကောန်ဂကူမန်ကီု ဍေံဒးဒှ်” ကမ္မတဳပရေၚ်ပညာကောန်ဂကူမန် နာဲရတ်ဂကူ (အ္စာဇြေ) ဟီုရ။
သွက်ဂွံစန်ပကောံ ဂကောံလိက်ပတ်ယေန်သၞာၚ်မန်ဗဟဵု (ဝါ) ကမ္မတဳလိက်ပတ်ယေန်သၞာၚ်မန်ဗဟဵု လမျီုဂွံလုပ်ဂှ် ညးအာက္ဍိုပ်သွာၚ်ဂကောံလိက်ပတ်လ္ၚဵု ချဳဓရာၚ်စန်ဒက်ဒၟံၚ် ညးအာက္ဍိုပ်သွာၚ်လိက်ပတ်တအ်နွံရ။
ပ္ဍဲမန်ဂှ် ကမ္မတဳလိက်ပတ်ယေန်သၞာၚ် ရးလ္ဂုၚ် ရးတၞဟ်တၞဟ်ကီု၊ ဗီုဂှ်ကီု ကမ္မတဳလိက်ပတ်ယေန်သၞာၚ်မန် တွဵုရးကရေၚ်၊ ကမ္မတဳလိက်ပတ်ယေန်သၞာၚ်မန် ပွိုၚ်ဍုၚ်ဂမၠိုၚ် ပံက်ဒက်ပတန်လဝ်နွံတုဲ ကမ္မတဳလိက်ပတ်ယေန်သၞာၚ်မန် သ္ပစၞးအလုံဂကူမန် ဗီုပြၚ်ဂကောံဇၞော်အိုတ်မွ္ပဲဂှ် ဟွံမွဲဏီရ။
ဗွိုၚ်ဂကောံလိက်ပတ်မန်ဂှ် စတံနူကဵု ဂကောံဗ္တောန်လိက်ပတ်ယေန်သၞာၚ်မန် အလုံဒေသရးမန် ရေၚ်တၠုၚ်ဒၟံၚ် ဘာဥတုကညၚ်၊ ကမ္မတဳပရေၚ်ပညာကောန်ဂကူမန် ရေၚ်တၠုၚ်ဒၟံၚ် ဘာကောန်ဂကူမန်၊ ဂကောံရေၚ်တၠုၚ်ဒၟံၚ် ပရေၚ် ဗ္တောန်လိက်မန် ပ္ဍဲဘာတန်အလဵုအသဳ၊ ဂကောံအ္စာကၞေဟ်မန်၊ ဂကောံတက်တြးပတိတ်ဒၟံၚ် လိက်မဂ္ဂဇြေန်၊ ဂျာနေဝ်၊ လိက်ပရိုၚ်ဂမၠိုၚ်၊ ဂကောံလိက်ပတ်ယေန်သၞာၚ် နူဂကောံခရေတ်ယှာန်မန်၊ ဂကောံရေၚ်တၠုၚ်လိက်မန် ပ္ဍဲ ကွတ်စက်ဂမၠိုၚ်၊ ဂကောံအာဲကၟာဲယေန်သၞာၚ်မန် ကေုာံ ဂကောံဂဳတ ပေဲါဇာတ်ဂမၠိုၚ် ဆေၚ်စပ်ကဵု ဂကောံရေၚ်တၠုၚ်ဒၟံၚ် ပရေၚ်လိက်ပတ်ယေန်သၞာၚ်မန်အိုတ်သီု ပံၚ်ပကောံတုဲ ညးအာက္ဍိုပ်သွာၚ်လိက်ပတ်လ္ၚဵု တအ် ချဳဓရာၚ်ဗက်ကေတ်ဒၟံၚ်လညာတ် သွက်ဂွံဒက်ပတန် ဂကောံလိက်ပတ်ယေန်သၞာၚ်မန်ဗဟဵု (ဝါ) ကမ္မတဳလိက်ပတ်ယေန်သၞာၚ်မန်ဗဟဵုနွံရ။