ကျာ်ဇၞော်အ္စာကျာ်ဒဵုတၟံဗြာတ် သိုၚ်ခၞံဌာန်ဇၞူ “အာယုကရုဏာ” ပ္ဍဲပွိုၚ်ဍုၚ်ရေဝ်

by | Dec 23, 2021 | ပရိုၚ် | 0 comments

အံက်သာ၊ မြေက္ကသဵု (၁၁) မံက်၊ ဒဳဇြေမ်ဗာ ၁၄၊ ၂၀၂၁

ပ္ဍဲပွိုၚ်ဍုၚ်ရေဝ်သၟဝ်ကျာ ဗဒါဲဂၠံၚ်ကွဳစက်ဇၞော် ရေဝ်မတ်မလီု သၚ်ဂၠံၚ်မွဲလ္ပာ်ကဵု သၞေဟ်က္ၜၚ်ကျာတြေံဍုၚ်ရေဝ် ပွဳပွူတိဍာ် ကွာန်လာမ်ထုၚ်ဂှ် ကျာ်ဇၞော်အ္စာကျာ်ဒဵုတၟံဗြာတ် အာဂတပၠတရဴတုဲ သိုၚ်ခၞံဌာန်ဇၞူ “အာယုကရုဏာ” သွက်အပါဇၞော် မိဇၞော်(ဘိုးဘွားရိပ်သာ) ဟၟဲကဵုညးရံၚ်စံၚ်မၚ်မွဲတံရ။
ကျာ်ဇၞော်အ္စာဂွံဒှ်သိုၚ်ခၞံ ဗဒိုပ်ဇၞူအာယုကရုဏာဏံဂှ် “တၚ်ရန်တၟံ မွဲဂှ် မိဇၞော် အပါဇၞော် မၞုံဒၟံၚ် ပ္ဍဲပွိုၚ်ဍုၚ်ဏံ ဟၟဲကဵုညးရီုဗၚ်မၚ်မွဲရံၚ်စံၚ်တံ သွက်ဂွံတန်တဴအာ ၜိုဟ်ဟ်သိုဟ်ဟ်မာန်ကီု၊ ရန်တၟံ ၜါဂှ် အလုံတွဵုရးဍုၚ်မန်ဏံ ဇၟာပ်ပွိုၚ်ဍုၚ် နွံကဵုဌာန်ဇၞူ မၞိဟ်ဗျုဗျုဖအိုတ် ပွိုၚ်ဍုၚ်ရေဝ်ပိုဲဏံမွဲဓဝ်ဟၟဲတုဲ ညံၚ်ဂွံနွံအာကီု၊ ရန်တၟံ တၚ်ပိဂှ်တှေ် ဗဒိုပ်ဇၞူဏံ ဂကူ၊ ဘာသာဟွံရုဲ သွက်သ္ဂောံရီုဗၚ်မၚ်မွဲအာ ရန်တၟံလဝ်ပိတၚ်ဏံတုဲ ဒှ်သိုၚ်ခၞံအာ ဗဒိုပ်ဇၞူဏံရ” သာ်ဏံ ကျာ်ဇၞော်အ္ဒ္စာ မြော်ဟီုရ။
ဂအာၚ်တိသိုၚ်ခၞံဂှ် လောန်ကၠုၚ်ပိသၞာံတေံ ဂကောံသ္ၚိကၟိန် နာဲသာန်မုၚ် ကေုာံ ကောန် Dr.ညိၚ်ဆာန် (စုတိ) ဇာတိနူဍုၚ်ရေဝ်၊ လၟုဟ်တန်တဴဒၟံၚ်ဍၚ်လ္ဂုၚ်ဂှ် ကဵုလဝ်ဒါန် မၞုံသၠဲပန်ဨကပြၚ်ၚ်တုဲ ၚုဟ်မးတိအခိၚ်ကာလဂှ် နွံအကြာပိလ္ၚီကိုဋ်ပြၚ်ၚ်ရ၊ အခိၚ်လၟုဟ် စဓမံက်မံၚ်ရုပ်ရဴ စကၠောန်ဒၟံၚ်တုဲ အခိၚ်လဵုတုဲဒှ်ဂှ် တန်တဴကဵုညးတၠသဒ္ဓါ တၠစေတနာဒကာဒါန်တံ ဘိုၚ်ပူဗိုၚ်ထံက်ပၚ်ဂၠိုၚ်မ္ဂး တုဲဒှ်ပြဟ်ရ၊ ဂွံတုဲဒှ်အာစိုပ်ဒတုဲ ပြဟ်ဟ်ဂှ်တှေ် ဂကူ၊ ဘာသာလဵုဟွံဟီု ဘိုၚ်ပူဗိုၚ်ထံက်ပၚ်ကဵုဒါန်အိုတ်ညိ သာ်ဏံ ကျာ်ဇၞော်အ္စာဟီုဆဝ်မ္ၚုဟ်လဝ်ရ၊ ပရေၚ်သိုၚ်ခၞံဂှ် မာံကြက်ထဝ်(ကော်)ညိၚ်ဆာန်ဂိုဝ်ဝ် ဒဳဇြာၚ်ဏာ မာံလွဳတၠမန် နူကွာန်တံၚ်မောံတံ ကေတ်တာလျိုၚ်တုဲ သိုၚ်ခၞံအာရ၊ ၚုဟ်မးရန်လဝ် တုဲဒှ်အိုတ်တှေ် အကြာကိုဋ်ပိလက်ဒ္ကေဝ်ရောၚ်။
ပွိုၚ်ဍုၚ်ရေဝ်ဂှ် ကၠာတေံ ရန်လဝ်သွက်ဂွံသိုၚ်အာ ဌာန်ဇၞူမၞိဟ်ဗျုဗျုဂှ် ဂွံလဝ်တိဂအာၚ် ဗဒါဲကျာ်သ္ကိုပ်ဍုၚ်(မြို.တော်ဦးဘုရား) တုဲ အခိၚ်လၟုဟ် ဂကောံသံဃနာယကပွိုၚ်ဍုၚ်တံ ဒှ်သိုၚ်ခၞံအာ တိုက်လွဳမာန်သာသနာရ၊ ကျာ်ဇၞော်အ္စာကျာ်ဒဵုတၟံဗြာတ် ညာတ်တီအာဟိုတ်သာ်ဏံတုဲ ဒှ်သိုၚ်အာဌာန်ဇၞူဏံရ၊ ဌာန်ဇၞူဏံတုဲမ္ဂး မိမကောန်ထောံလသာလဝ် ဟၟဲကဵုညးမၚ်မွဲရံၚ်စံၚ်တံကီု ရဲညးအိန်ထံၚ်ဟွံပြေပြံၚ် ဒၞါဲမံၚ်ဟၟဲ ဟွံပြေပြံၚ်တံလေဝ် မံၚ်တန်တဴဂွံရ၊ လၟုဟ်ဂှ် ကျာ်ဇၞော်အ္စာ ဒက်ပတ်လဝ် ကမ္မတဳသိုၚ်ခၞံယာယဳတုဲ ကာလကမၠောန်အာစိုပ်ဒတုဲ တုဲဒှ်အာတေံမ္ဂး အလုံပွိုၚ်ဍုၚ်ရေဝ်မွဲ ညးပါလုပ်ထေက်တံဂှ် ဒက်ပတန်ကမ္မတဳမၚ်မွဲဌာန်ဇၞူ အာယုကရုဏာ ဝွံရောၚ် ဂွံတီကေတ် နူညးနွံကြပ်ကဵုကျာ်ဇၞော်အ္စာ ဥုအံၚ်နာၚ်ဝေန် ကေုာံ အ္စာဂဥုဲ နာဲဟံၚ်မန်တံရ။

Written by

Related Posts

ပ္ဍဲမဟာၛာဲ ဟိုတ်နူကွဳစက်ပၟတ်လိုန်ဒးတုဲ သၟာကမၠောန်ကောန်ဍုင်မန်ဗၟာမွဲတၠ ဒးချိုတ်

ပ္ဍဲမဟာၛာဲ ဟိုတ်နူကွဳစက်ပၟတ်လိုန်ဒးတုဲ သၟာကမၠောန်ကောန်ဍုင်မန်ဗၟာမွဲတၠ ဒးချိုတ်

ပ္ဍဲခရိုင်သမုတ်သဃန် ကၟိန်ဍုင်သေံ၊ ဍုင်မဟာၛာဲဂှ် ဟိုတ်နူကွဳစက်ပၟတ်လိုန်ဒးတုဲ သၟာကမၠောန်ကောန်ဍုင်မန်ဗၟာ မၞိဟ်ဗြဴမွဲတၠ ဒးချိုတ်အာလဝ်ရောင် ပရိုင်သေံဂမၠိုင် ချူဓမံက်လဝ်ရ။

ဒေသဍုၚ်မန်သ္ကုတ်လ္တူ ဒပ်ကံၚ်သဳပၞာန်ထ္ပက်ပၞာန်တုဲ ရဲကၠောန်ကၠအ် နူဒေသသ္ကုတ်သၠုၚ်ကျာတအ် ဒးက္လေၚ်စဴ

ဒေသဍုၚ်မန်သ္ကုတ်လ္တူ ဒပ်ကံၚ်သဳပၞာန်ထ္ပက်ပၞာန်တုဲ ရဲကၠောန်ကၠအ် နူဒေသသ္ကုတ်သၠုၚ်ကျာတအ် ဒးက္လေၚ်စဴ

ဒေသဍုၚ်မန်သကုတ်လ္တူ ပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ် ဒၟာနူဒပ်ကံၚ်သဳပၞာန်တအ် ထ္ပက်လုပ်ကၠုၚ်နကဵုဇြဟတ်ဂၠိုၚ်ဂၠိုၚ်တုဲ ရဲနူကဵုမတ်မလီု၊ မုဟ်ဍုၚ်၊ ဇြပ်ဗု အာကၠောန်မံၚ်ကၠအ်ဒေသဂှ်ဝွံ ဒးကလေၚ်စဴကၠုၚ်အိုတ်ရောၚ် ညးမကၠောန်မံၚ်ကၠအ်မွဲတၠ ဟီုထ္ၜးရ။

ညးမပြာပ်အာစိုပ်ဌာနစှ်ေဘာဥတုကညၚ် အလုံဒေသရးမန်တအ် သ္ဂောံဂီုကၠီုမာန်ဂှ် ဂကောံဗ္တောန်လိက်ပတ်မန်ကေုာံယေန်သၞာၚ်ဗုဒ္ဓဘာသာအလုံဒေသရးမန်တအ် ဖန်ဇန်ဒၟံၚ်နွံ

ညးမပြာပ်အာစိုပ်ဌာနစှ်ေဘာဥတုကညၚ် အလုံဒေသရးမန်တအ် သ္ဂောံဂီုကၠီုမာန်ဂှ် ဂကောံဗ္တောန်လိက်ပတ်မန်ကေုာံယေန်သၞာၚ်ဗုဒ္ဓဘာသာအလုံဒေသရးမန်တအ် ဖန်ဇန်ဒၟံၚ်နွံ

တၠဳပိုန်သၚ်တၠပညာဂမၠိုၚ်၊ ကွးဘာဂမၠိၚ် ကေုာံ မိမညးဍုၚ်ကွာန်မန်တအ် သ္ဂောံအာစိုပ်သဘၚ်စှ်ေဘာဥတုကညၚ် အလုံဒေသရးမန် ပ္ဍဲဘာသာံလှေဝ်တေံမာန်ဂှ် နကဵုညးတာလျိုၚ်ဂကောံဗ္တောန်လိက်ပတ်မန်ကေုာံယေန်သၞာၚ်ဗုဒ္ဓဘာသာအလုံဒေသရးမန်တအ် ဖန်ဇန်ဒၟံၚ်ရောၚ် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.