မိလတိုပ်၊ ဒဳဇြေမ်ဗာ ရ၊ ၂၀၂၁

ရန်တၟံသွက်ဂွံဝဳၜံၚ်ပတိုန် အ္စာကၞေဟ်ညးဗြဴမန်တုဲ နူဂျာနေဝ်အမာတ်ဒိန် ပံက်တန်ဗ္တောန် ချူပရိုၚ်၊ ချူလိက်ပရေၚ် ပ္ဍဲၝောံခန်ပိုၚ်ခေတ် ဍုၚ်မတ်မလီု ပွိုၚ်မွဲသတ္တဟရ။
တန်ဗ္တောန်ဝွံ စတံနူဂိတုဒဳဇြေမ်ဗာ (၄) တုဲ ပွိုၚ်မွဲသတ္တဟ မပတံကဵု ကွတ်ချူပရိုၚ်ကီု၊ ကွတ်ချူလိက်ပရေၚ်ကီုတုဲ အ္စာမစိုန်သကီုကဵု ကွတ်ပရိုၚ်၊ ကွတ်လိက်ပရေၚ်တံ ဗ္တောန်ထ္ၜးအာရ။
“နကဵုဂျာနေဝ်အမာတ်ဒိန်ဂှ် ရန်တၟံလဝ်ပါမံၚ်မွဲဍောတ်ကီုတုဲတှေ် အ္စာကၞေဟ်ညးဗြဴမန် ညံၚ်သ္ဂောံဂၠိုၚ်တိုန်ဂှ် ဗီုလဵုဂွံသ္ပထေက်ရောဂှ် ဂၠိုက်ဂၠာဲဖျေံဗီုဂှ်တှေ် ပံက်တန်ဗ္တောန်အ္စာကၞေဟ်ညးဗြဴမန်ဂှ် ဍေံဒှ်ထေက်မွဲဟီုဂှ် အကာဲအရာ ဏံဂှ် ပံက်ဂွံ ဟွံဂွိုအ်ဂှ် ဂၠာဲစမ်ရံၚ်နဲကဲတုဲတှေ် ပံက်ထေက်ဏောၚ်ဂးတုဲ ဒှ်ပံက်ကၠုၚ်” သာ်ဝွံ (သ္ကိုပ်အေဝ်ဒဳတာ – ဂျာနေဝ်အမာတ်ဒိန်) နာဲမန်သိုဝ်နဲ လဴထ္ၜးရ။
“တၚ်ရန်တၟံပိုဲဂှ် အ္စာကၞေဟ်ညးဗြဴမန် ညံၚ်ဂွံဂၠိုၚ်တိုန် အ္စာကၞေဟ်ညးဗြဴမန်တအ်ဂၠိုၚ်ဏောၚ်တှေ် ဘဝညးဗြဴမန်တအ် ဒုၚ်စသိုၚ်ချူပတိုန်နကဵုပရိုၚ်၊ လိက်ပရေၚ် နကဵုဝတ္ထုတအ် ဍေံဒှ်ကၠုၚ်မာန်ဏောၚ်၊ ဘဝညးဗြဴမန်တအ် ချူပတိုန် မာန်တှေ် ရဲဗှ်လိက်တအ် တီကၠုၚ်ဂၠိုၚ်ဏောၚ်၊ ပြာကတ်ဂၠိုၚ်ဏောၚ်တှေ် သွက်သ္ဂောံသၠုၚ်ထ္ၜလဘာ် ဘဝညးဗြဴမန် တအ်ဂှ်တှေ် ဒှ်ကၠုၚ်အထံက်အရီုဏောၚ်ဂှ်ရ တန်ဗ္တောန်ဏံဍေံဒှ်ကၠုၚ်” ညးဆက်လဴထ္ၜးလဝ်ရ။
ပရေၚ်ကတ်လ္ၚတ် ကွတ်ချူလိက်ဏံ အ္စာကၞေဟ်ညးဗြဴမန်ညံၚ်ဂွံဂၠိုၚ် ညံၚ်ဂွံချူလိက်ပရိုၚ်ကီု လိက်ပရေၚ် ကီုဒှ်ကၠုၚ်မ္ဂး ဘဝညးဗြဴတအ် ညံၚ်ရဴဘိုၚ်ထ္ၜလဘာ်ပ္တိုန်ကုညးဗြဴတအ် ကဆံၚ်ဂွံသၠုၚ်တိုန်ဂှ် ဒှ်အထံက်ဓရီု မွဲနဲ မွဲဗီုကီုရ။
ပ္ဍဲတန်ဗ္တောန်ဝွံ သ္ဇိုၚ်ချူလိက်မ္ဂး တၚ်နၚ်ပရိုၚ်ညံၚ်ဂွံပါဂှ် ဒှ်အဓိကတုဲ တ္ၚဲကၠာ(၂)တ္ၚဲဂှ်မ္ဂး ဗ္တောန်အာနဲကဲ ကွတ်ချူ ပရိုၚ် ဗီုပြၚ်ရဲချူလိက်တအ်ဂွံကၠိုဟ်လောဲ ကဵုချူအာနတဲကၠာတုဲ တ္ၚဲလက္တရဴ(၂)တ္ၚဲဂှ်မ္ဂး သ္ၚဳဂၠိပ်အာ ပရိုၚ်ချူလဝ်တုဲ တုဲဂှ်တုဲ ညံၚ်ဂွံပကေၚ်ချူအာ လိက်ပရေၚ်မာန်ဂှ်ဖျေံဗီုတုဲ ဆက်ကဵုအာတန်ဗ္တောန်ပၠန်ရောၚ် (သ္ကိုပ်အေဝ်ဒဳတာ – ဂျာနေဝ်အမာတ်ဒိန်) နာဲမန်သိုဝ်နဲ ဟီုထ္ၜးကၠုၚ်သာ်ဝွံရ။
“အဓိကတၚ်စၟဳစ အ္စာကၞေဟ်ညးဗြဴမန် ညံၚ်သ္ဂောံမံက်တိုန်တန်န်ကြန်န်ဂှ်နွံ၊ ဆမွဲတဲဓရ်ဂှ် ဍေံဒှ်ဟွံမာန်ပုဟ်၊ ရဲတိုန် ကတ်လ္ၚတ်လဝ်ဏံ ညံၚ်ဍေံဟွံဂွိုအ်ဗလးထောံ ညံၚ်ဍေံစိုတ်ဂွံလုပ်စ ကွတ်ချူလိက်ဂှ်တှေ် ဖျေံအာဗီုဏောၚ် ရန်တၟံ လဝ်ဗီုဂှ်နွံ” သာ်ဏံ ညးဟီုထ္ၜးရ။
အ္စာကၞေဟ်ညးဗြဴမန် ပြဟ်ဟ်ဏံ မွဲတဲဓရ် ၜိုန်မံက်ဂတဝ်တိုန် ဟွံမာန်ဏီကၠာလေဝ် အ္စာကၞေဟ်ညးဗြဴမန် ညံၚ် ဂွံမံက်တိုန်ကၠုၚ်ဂှ် တၚ်စၟဳစလဝ်နွံ၊ ကတ်လ္ၚတ်လဝ်တန်ဗ္တောန်ဏံ ညံၚ်ဟွံဗလးထောံ ညံၚ်စိုတ်ဂွံလုပ်စကဵု ကွတ်ချူလိက်ဂှ် ရန်တၟံဖျေံလဝ်ဗီုဂှ်နွံတုဲ နကဵုဍေံတအ် ဗီုလဵုပါလုပ်ချူဇန်မာန်ရော ကေတ်ဆန္ဒဍေံတအ်တုဲ ဆက်ဓမံက်အာရုပ်ရဴဏောၚ် ညးဂးရ။
ဟိုတ်အ္စာကၞေဟ်ညးဗြဴအောန်ဂှ်မ္ဂး ပ္ဍဲဝိုၚ်မၞိဟ်ဗြဴတအ် သ္ဂောံဒတောဲကဝါ် သ္ဂောံကၠောံက္ဍဂှ်အောန်မံၚ် ဟွံကၠောံက္ဍတုဲ ကွတ်ချူလိက်မ္ဂးဂှ် အဆံၚ်သၠုၚ်မံၚ်တုဲ ဒးပ္ကတ်ပ္ကေၚ် ချူဇန်ကေတ်တ်ဂှ် ချူဝါတ်မံၚ်ကီု၊ ဟိုတ်ဂှ်ရ အ္စာကၞေဟ်ညးဗြဴဂှ် အောန်မံၚ်ရ။
ပ္ဍဲကွတ်တန်ဗ္တောန်ချူလိက်ဏံဝွံ ဒုၚ်အာသ္ဇိုၚ် နူကဵုဂကောံဘာတက္ကသဵု၊ နူဌာနပညာဗဟဵု၊ နူဂကောံညးဗြဴမန်၊ နူဂကောံနာနာ ဂကောံရေၚ်တၠုၚ်ကၠောန်မံၚ်ကဵုမန်တအ်ဂှ်ကီု ကော်ဘိက်တုဲ ကဵုကၠုၚ်မံၚ်တန်ဗ္တောန် ကွတ်ချူပရိုၚ်၊ ကွတ်ချူလိက်ပရေၚ် ပ္ဍဲကဵုၝောံခန်ပိုၚ်ခေတ် ဍုၚ်မတ်မလီုရ။