မိလတိုပ်၊ ဖေဖဝ်ဝါရဳ ၂၈၊ ၂၀၂၂

အကြာဏံ ဟိုတ်နူၚုဟ်ကၠေၚ်ဓာတ်က္ဍၚ်တိုန်ဂှ်တုဲ ညးတၠကွဳစက် ပလံၚ်မၞိဟ်အာတရဴတအ် တော်ဟွံကိတ်ရရောၚ် တၠကွဳစက်မွဲတၠဟီုတုဲ ဂွံတီကေတ်ရ။
ၚုဟ်ကၠေၚ်ဓာတ် သၞာံတုဲကၠုၚ်တေံကဵု သၞာံဏံဂှ် ၚုဟ်က္ဍၚ်တိုန်အာ ကဝက်ဟွံကရဒှ်တုဲ ဂွံဗက်တိုန်ၚုဟ်ခရိတ်လိၚ် ကွဳစက်ကဝက်ကီုဂှ် ဟွံဒှ်တုဲ သွက်တၠကွဳစက်လိၚ်မၞိဟ်ပလံၚ်အာတရဴတအ် တော်ဟွံကိတ်ဒှ်ဒၟံၚ်ခက်ခုဲရောၚ် ညးတၠ ကွဳစက်မွဲတၠ ဟီုသာ်ဝွံရ။
“ခက်ခုဲမံၚ်လေဝ် ၚုဟ်ကၠေၚ်ဂှ် က္ဍၚ်တိုန်အာ နူသၞာံတုဲကၠုၚ်တေံ ကဝက်ဟွံကပုဟ်၊ ဟိုတ်နူၚုဟ်ကၠေၚ်ကွဳစက် က္ဍၚ် တိုန်ဗက်အာ ကဝက်ပြၚ်ဂှ် ဂွံထပ်ဗပဵုပတိုန်ၚုဟ်လိၚ်ကွဳစက်ကဝက်ပြၚ်ကီုဂှ် ဍေံဟွံဂွံ၊ ယဝ်ဗက်တိုန်တှေ် မၞိဟ်လိၚ် ကွဳစက်ဂှ် ညးတံဟွံမိက်လိၚ်ရ၊ ဒှ်သာ်ဂှ်ရ တၠကွဳစက်တံဒးချိၚ်တုဲ ဒးပတိုန်မံၚ်ၚုဟ်လိၚ်ကာ ဒးချိၚ်ပတိုန်ဆဗၞတ်ရတှေ် သွက်ရဲတၠကွဳစက်တံ သှေ်အောန်အာ” သာ်ဝွံ တၠကွဳစက်လိၚ်ဖ္ဍိုက်မၞိဟ်အာတရဴ နူပွိုၚ်ဍုၚ်ရေဝ် နာဲအံက်သာ ဟီုရ။
အကြာမွဲၜါတ္ၚဲဏံဂှ် ၚုဟ်ကၠေၚ်ပ္ဍေန်၊ ကၠေၚ်ဓာတ်ဂၠးတိတံလေဝ် ချဳထလာ်တိုန်ကီုတုဲ ၚုဟ်ကၠေၚ်ပ္ဍေန် ကၠေၚ်ဓာတ် ပ္ဍဲဍုၚ် (ကၟိန်ဍုၚ်ဗၟာ) လေဝ် ၚုဟ်က္ဍၚ်တိုန်အာ ဟွံသက်သာရ။
“ၚုဟ်ကာဂှ်တှေ် လတေံ နူ ပွိုၚ်ဍုၚ်ရေဝ် (ကွာန်တံၚ်ပရၚ်) မွဲလတုန်တှေ် (၅) လက်၊ လၟုဟ်တှေ် အာမတ်မလီုမွဲလ တုန်တှေ် (၈) လက်၊ အဵုဇှ်ဂှ်တှေ် ၚုဟ်ခရိတ်ကၠေၚ်သၟးဂှ် အိုတ်မံၚ် ၜိုတ် (၄) လက်ဘာ်မွဲတဲတှေ် သွက်တၠကွဳစက်တံ ကဝက်ဟွံသှေ်ပုဟ်၊ ၚုဟ်ဍေံဍာံဍာံတှေ် ခရိတ်ကၠေၚ်ကဝက် သှေ်သွက်တၠကာကဝက်ဂွံတှေ် ဍေံကိတ်ညိ” နာဲအံက်သာ ဆက်လဴထ္ၜးရ။
လၟုဟ်ဝွံ ၚုဟ်ကၠေၚ်ဓာတ် 92 1 Liter (လဳတာ) မ္ဂး ၚုဟ်နွံအကြာ (၁၈၀၀) ဒကေဝ်ပြၚ်၊ 95 1 Liter (လဳတာ) မ္ဂး ၚုဟ်နွံအကြာ (၁၉၀၀) ပြၚ်၊ ကၠေၚ်ဒဳဇြေဝ် 1 Liter မ္ဂး နွံအကြာ (၁၇၀၀) ပြၚ်၊ ကၠေၚ်ဒဳဇြေဝ်သၟး 1 Liter မ္ဂး နွံအ ကြာ (၁၈၀၀) ပြၚ်တုဲ ၚုဟ်ကၠေၚ်ဂှ် ထလာ်တိုန်ဒၟံၚ်ဖိုဟ်ရောၚ် တၠဆေၚ်သွံကၠေၚ်တံ သ္ဂးရ။