မာံသုခ၊ ဂိတုအေဗရဴ ၁၁၊ ၂၀၂၂

ပ္ဍဲစၟတ်တ္ၚဲ (10.4.2022) ဂိတုစဲ (၁၀) မံက်ဂှ် နူကဵုဂကောံသၟတ်ပၠတရဴဂကူမန် ကွာန်ကုန်ဗ္ဒဝ် ပွိုၚ်ဍုၚ်လှာဒကှ် က္ဍိုက်ပ်တုဲ ကၠောန်ဗဒှ်ဏာ သ္ဘၚ်မ္ၚဵု (၃) ပြကာ ထံက်ပၚ်ပရေၚ်ပညာ၊ ထံက်ပၚ်သၟတ်စှ်ဒၞောဲအိန်ထံၚ်၊ ထံက်ပၚ်ကောန်ၚာ်ဒှ်မၞိဟ်တၚ်ယၟုမန်တအ်နွံရ။
မ္ၚဵု (၃) ပြကာဏံဝွံ ရန်တၟအ်ကဵု သွက်ဂွံသၠုၚ်ပတိုန်အသိၚ် ပရေၚ်ပညာသၟတ်တအ်ကီု ဂွံမၚ်မွဲအာယၟုကောန်ၚာ်မန် ဇၟာပ်ကောန်မန် ဂွံတၚ်ယၟုမန်ဖအိုတ်ကီုတုဲ ကၠောန်ဗဒှ်ကၠုၚ်ရ။
“ရန်တၟအ်ပိုဲဂှ်တှေ် အလုံဂကူ အလုံမွဲပွိုၚ်ဍုၚ် ဟွံဒှ်လေဝ် သ္ဇိုၚ်နူစကွာန်ပိုဲ ကောန်ၚာ်မန် ညံၚ်ဂွံဒှ်ယၟုမန်ဖအိုတ်ကီု တုဲညိ ကောန်ကွးဘာ ကတ်မံၚ်ပညာတအ် ဂွံဂွံအာဇြဟတ်စိုတ်၊ ၜိုတ်မာန်ကဵုမာန် ပိုဲတအ်ထံက်ပၚ်အာနွံ၊ တုဲညိ သၟတ်စှေ်ဒၞာဲအိန်ထံၚ် ဗီုဏံ၊ လၟုဟ်တှေ် ပေၚ်ဒ္စာံဝါရ” သာ်ဏံ ညးက္ဍိုက်ပ်သၟတ် ကွာန်ကုန်ဗ္ဒဝ် မာံသုခုမ ဟီုရ။
ပ္ဍဲထံက်ပၚ်မ္ၚဵု (၃) ပြကာဏံဝွံ သၟတ်ကောန်ၚာ်ဒှ်မၞိဟ် တၚ်လဝ်ယၟုမန်ဂှ် လၟိဟ် (၃၇) တၠ၊ ကွးဘာကတ်ပညာဂှ် (၂၅) တၠ၊ သၚ်ကတ်ပညာဂှ် (၁) ဇကုကဵု သၟတ်စှ်ဒၞောဲအိန်ထံၚ်ဂှ် (၂၁) တောဲ ထံက်ပၚ်ဏာလဝ်ရ။
ဗီုပြၚ်အစဳဇန်ထံက်ပၚ်ဏံဂှ် ပ္ဍဲအကြာပွိုၚ်မွဲသၞာံ ကောန်ၚာ်ဒှ်မၞိဟ် တၚ်လဝ်ယၟုမန် နွံမူစိတၠ၊ သၟတ်ကွးဘာကတ်ပညာနူ (၈) တန် စဵုစိုပ်တက္ကသဵု နွံမူစိတၠ၊ သၟတ်စှ်ဒၞောဲအိန်ထံၚ် နွံမူစိတောဲ နူကဵုဂကောံသၟတ်ကွာန်ကုန်ဗ္ဒဝ်တအ် ဗက်ကံက်စရၚ်တုဲ ထံက်ပၚ်ကဵုအာနွံရ။
အစဳဇန်ထံက်ပၚ်ဗီုဏံဂှ်ဝွံ မွဲသၞာံမွဲဝါ ကၠောန်ဗဒှ်ကၠုၚ်နွံတုဲ ဟိုတ်နူအကာဲအရာယဲကိုဝ်ဝေဒ်တုဲ ဒးဒေါံဇူလဝ်ပွိုၚ် (၂) သၞာံ၊ သၞာံဏံ စထံက်ပၚ်အာပၠန်တုဲ လၟုဟ်မ္ဂး ပေၚ်ကၠုၚ်မရနုက်ကဵု (၈) ဝါကီုရ။
ပ္ဍဲပွိုၚ်ဍုၚ်လှာဒကှ်ဝွံ အစဳဇန်ထံက်ပၚ် ပတိုန်စရာကွးဘာ ပ္ဍဲအခိၚ်သ္ဘၚ်စှေ်ဘာ၊ ထံက်ပၚ်သၟတ်စှေ်ဒၞာဲအိန်ထံၚ် ပ္ဍဲအခိၚ်သ္ပမ္ၚဵုထပ်တဲတအ်ဂှ်နွံတုဲ နကဵုအစဳဇန်ပ္ကောံတုဲထံက်ပၚ် နကဵုဗီုပြၚ်အသေအဟာန်ဂှ် ဟွံမွဲဏီတုဲ အစဳဇန်ထံက်ပၚ် ကောန်ၚာ်တၚ်ယၟုမန်ဏံဂှ် နွံဆကွာန်ကုန်ဗ္ဒဝ်ဏံမွဲဟေၚ် ဂွံတီကေတ်ရ။