ဝဏ္ဏမာန်၊ မေ ၁၀၊ ၂၀၂၂

သွက်ဂွံတပ်ဇန် စပ်ကဵုသၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာကီု သၞောဝ်ဥပဒေ ဒက်ပ္တန်ဍုၚ်မန်ကီုဂှ် ပံက်လဝ်ဂ ကောံမွဲဂကောံရ။
ဂကောံတပ်ဇန် သၞောဝ်ဥပဒေဒက်ပ္တန်ကၟိန်ဍုၚ် ကေုာံ ဍုၚ်မန်ဂှ် စၞးခမဳသၚ် (၃) ဇကု၊ စၞးဗော်ဍုၚ်မန်တၟိ (၃) တၠ၊ စၞး ဗော်ညဳသၟဟ်မန် (၃) တၠကဵု စၞးသွာၚ်ဂကောံမဟာဇန် (၃) တၠ၊ ပံၚ် (၁၂) ဇကု-တၠရ။
“သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာကဵု သၞောဝ်ဥပဒေဍုၚ်မန်ဂှ် ချူတၟိဟွံသေၚ်ပုဟ်၊ သၞောဝ်ကၟိန်ဍုၚ်ဂှ်တှေ် ဒုၚ် သ္ဇိုၚ်ကဵု တၚ်နၚ်မူဖေဝ်ဒရာ နူပေဲါသဳကၠဳပရေၚ်ဍုၚ်ကွာန် ကၠောန်လဝ်ပ္ဍဲရေဝ်၊ သၞောဝ်ဥပဒေဍုၚ်မန်ဂှ် ဒုၚ်သ္ဇိုၚ်သၞောဝ် ဥပဒေ ဍုၚ်မန်ရာမည နူကောံဓရီုဏံ ညးစၞးဗွိုၚ်ဇဳတံ နိဿဲလဝ် နူလိက်ကၞပ်တေံ၊ လိက်စံၚ်ဏံနွံမံၚ်၊ အတိုၚ်ညးစၞး တံ သဳကၠဳပတိုန်ထ္ၜး ကံက်နုက်ကဵုလဝ်ကသပ်ဂှ်ရ ဇန်တပ်အာ” သာ်ဏံ ညးဂွံအခေါၚ်ဟီုဂး နာဲအံၚ်မ္ၚဵု ဟီုထ္ၜးရ။
သွက်ဂွံတပ်ဇန် သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာကဵု သၞောဝ်ဥပဒေ ဒက်ပ္တန်ဍုၚ်မန်ဂှ် ပွိုၚ် (၆) ဂိတု ညံၚ်ဂွံ တပ်ဇန်တုဲဒှ်တုဲ ယဝ်အကာဲအရာကဵုမ္ဂး ကၠောန်ဗဒှ်အာ ကောံဓရီုပရေၚ်ဂကူမန် မွဲဒၞာဲတုဲ သ္ပအာဒတန်ရ။ ဆဂး ယဝ် အကာဲအရာဟွံကဵုမ္ဂး ကော်ဘိက်အာညးစၞးဗွိုၚ်ဇဳ ကၠောန်သ္ပကောံဓရီုမွဲတုဲ သွက်ဂွံသ္ပအာဒတန်နွံရ။
“ပိုဲရန်လဝ်ဂှ် သၞောဝ်ကၟိန်ဍုၚ်ဂှ်ကီု သၞောဝ်ဍုၚ်မန်ဂှ်ကီု ပွိုၚ် (၆) ဂိတု ပကောံပကေဝ်ညံၚ်ဂွံတုဲ နူဂှ်တုဲတှေ် ဒးကၠောန် ကောံဓရီု ညးစၞးဗွိုၚ်ဇဳ ညံၚ်ဂွံတိုန်စိုပ်တုဲတှေ် သ္ပအာဒတန်ဏောၚ် ရန်လဝ်ဗီုဂှ်နွံ” သာ်ဏံ နာဲအံၚ်မ္ၚဵု ဆက်ဟီုရ။
စပ်ကဵုသၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာဂှ်ကီု သၞောဝ်ဥပဒေဒက်ပ္တန်ဍုၚ်ဂှ်ကီု နကဵုသ္ပစၞးဂကူမန်မွဲဂှ်တုဲ တုဲကၠုၚ်ဂိတုမေ (၂-၃-၄-၅) ဂှ် ဗော်ဍုၚ်မန်တၟိ သ္ပသ္ကိုပ်သ္ကတုဲ ညးစၞးသွာၚ်ခမဳသၚ်၊ ညးစၞးဗော်ညဳသၟဟ်မန်၊ ညးစၞး သွာၚ်ဂကောံမဟာဇန်နာနာ၊ ညးစၞးဂကောံဘိက်ထေက်၊ ညးစၞးပူဂဵုဘိက်ထေက် လၟိဟ် (၂၅၀) တၠပြၚ် သဳကၠဳလး ဖျေံဏာ ပရေၚ်ကမၠောန် စပ်ကဵုသၞောဝ်ဥပဒေကၟိန်ဍုၚ် ကေုာံ သၞောဝ်ဍုၚ်မန်ကီု၊ လၟေၚ်ကမၠောန်ကိုန်စဳ ဇန်ပရေၚ်ဂကူမန်ကီု၊ စပ်ကဵုဂကောံပံၚ်ကောံဂကူမန်ကီုရ။