ဝဏ္ဏမာန်၊ မေ ၁၀၊ ၂၀၂၂

ကောံဓရီုပရေၚ်ဂကူမန် (သၞာံ-၂၀၂၂) ဝွံ ဂိတုမေ (၂-၃-၄-၅) ဂှ် ဗွိုၚ်ဂကောံခမဳသၚ်၊ ဗွိုၚ်ဗော်ဍုၚ်မန်တၟိ၊ ဗွိုၚ်ဗော်ညဳသၟဟ်မန်၊ ဗွိုၚ်ဂကောံမဟာဇန်၊ ဗွိုၚ်ဂကောံဘိက်ထေက်၊ ဗွိုၚ်ပူဂဵုဘိက်ထေက် ညးစၞး ကေုာံ သီုညးလ္ၚတ် (၂၅၉) တၠ က္ည-တိုန်စိုပ်ရ။
ပ္ဍဲကောံဓရီုပရေၚ်ဂကူမန် (သၞာံ-၂၀၂၂)၊ ပွိုၚ် (၄) တ္ၚဲဂှ် ဗွိုၚ်ညးကုညး သဳကၠဳပ္တိုန်ထ္ၜး သ္ၚဳဂၠိပ်လ္တူအကာဲအရာ ပရေၚ်ဍုၚ်ကွာန်ကီု၊ သွက်ဂွံချူခၞံအာ သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာ ကေုာံ သၞောဝ်ဥပဒေ ဒက်ပ္တန်ဍုၚ်မန်ရာမည (တွဵုရးဍုၚ်မန်) ကီု၊ သဳကၠဳကိစ္စသ္ဂောံဒက်ပ္တန် ဂကောံပံၚ်ကောံဂကူမန်ဂှ်ကီု၊ စပ်ကဵုအလာံဍုၚ်မန်ကီု၊ စပ်ကဵုယာတ်ထၟိၚ်က္ဍိုပ်ညံၚ်ဂွံဒှ်မွဲကီု၊ စပ်ကဵုသြန်နုၚ်နိဓိ သြန်ဂအုံကောန်ဂကူဂှ်ကီု သဳကၠဳညးသ္ကံ သၠဲသၠဲလးလးတုဲ ကလိဂွံတၚ်တုပ်စိုတ် ဖျေံဏာတၚ်သ္ဂုတ်သွာတ် လၟေၚ်ကမၠောန်အတိုၚ်ဗွဲသၟဝ်ရ။
တၚ်နၚ်ကလိဂွံသွဟ် ကောံဓရီုပရေၚ်ဂကူမန် (သၞာံ-၂၀၂၂) (ဗွဲသရောပ်)
(လၟေၚ်ကမၠောန်ပစ္စုပ္ပန်)
(၁) ဂကောံတပ်ဇန် သၞောဝ်ဥပဒေဒက် ဒက်ပ္တန်ကၟိန်ဍုၚ်ဖေဝ်ဒရာ ကေုာံ သၞောဝ်ဥပဒေ ဒက်ပ္တန်ဍုၚ်မန်ရာမည (တွဵုရးဍုၚ်မန်)
စၞးခမဳသၚ် (၃) ဇကု
စၞးဗော်ဍုၚ်မန်တၟိ (၃) တၠ
စၞးဗော်ညဳသၟဟ်မန် (၃) တၠ
စၞးမဟာဇန် (၃) တၠ
ဗွိုၚ်ညးဘိက်ထေက် (၅) တၠ
ပံၚ် (၁၇) ဇကု-တၠ။
သၞောဝ်ဥပဒေ ဒက်ပ္တန်ကၟိန်ဍုၚ်ဖေဝ်ဒရာ ကေုာံ သၞောဝ်ဥပဒေ ဒက်ပ္တန်ဍုၚ်မန်ဝွံ ပွိုၚ် (၆) ဂိတု အကာဲအရာကဵုမ္ဂး ကၠောန်သ္ပအာ ကောံဓရီုဇၞော်ပရေၚ်ဂကူမန်မွဲတုဲ သ္ပအာဒတန် (မူဂမျိုၚ်) ရောၚ်။
ယဝ်အကာဲအရာဟွံကဵုမ္ဂး ကၠောန်သ္ပအာ ကောံဓရီုညးစၞးဗွိုၚ်ဇဳမွဲ သ္ပအာဒတန်တုဲ အခါကၠောန်ကောံဓရီုဇၞော်ပ ရေၚ်ဂကူမန်မ္ဂး ထပ်သ္ပအာဒတန် ပ္ဍဲကောံဓရီုဇၞော်တေံပၠန်ရောၚ်။

(၂) ဂကောံဆက်စၠောံ သွက်ဂွံဒက်ပ္တန် “ဂကောံပံၚ်ကောံဂကူမန်”
ဂကောံပံၚ်ကောံဂကူမန် ဘာသာဗၟာ (ပေါၚ်းစည်းညီညွတ်သော မွန်အစည်းအရုံး) (Mon Solidarity Association) ဝွံ လလအ်ဂွံဒက်ပ္တန် ဂကောံပံၚ်ကောံဂကူမန်ဂှ် သွက်ဂွံကၠောန်ရေၚ်တၠုၚ်အာ စပ်ကဵုပရေၚ်ဂကူမ္ဂး ပံက်ဏာဂကောံဆက်စၠောံ (ပညဳပညပ်) မွဲဂကောံရ။
စၞးဗော်ဍုၚ်မန်တၟိ (၃) တၠ
စၞးဗော်ညဳသၟဟ်မန် (၃) တၠ
စၞးမဟာဇန်+ဗွိုၚ်ဘိက်ထေက် (၅) တၠ
ပံၚ် (၁၁) တၠ။
(၃) ကိုန်အစဳဇန်ပရေၚ်ဂကူမန် (ကဏ္ဍပရေၚ်ဍုၚ်ကွာန်၊ ကဏ္ဍပရေၚ်ဂီုကၠီု၊ ကဏ္ဍပရေၚ်ပိုန်ဒြပ်၊ ကဏ္ဍပရေၚ်မၞိဟ်၊ ကဏ္ဍပရေၚ်ပွဳပွူသဘာဝ ကေုာံ တိဍာ်) ဂှ် ကဏ္ဍချူဟွံတုဲတံဂှ် ဂစာန်ချူညံၚ်ဂွံတုဲဒှ်တုဲ ညံၚ်ဂွံရေၚ်တၠုၚ်ဗၟံက်အာရုပ် ရဴမာန်။
(၄) စပ်ကဵုမူဝါဒတိဍာ်ဒေသမန် နူကဵုကမ္မတဳကေၚ်ကာမူဝါဒ တိဍာ်ဒေသမန်တံချူခၞံတုဲ သ္ပဏာဒတန် ပ္ဍဲကောံဓရီု ပ္ဍဲပေဲါသၠာဲဂတးလညာတ် မူဝါဒတိဍာ်မန် (Mon Region Land Seminar) ခရိုၚ်သဓီုဂှ် နူကောံဓရီုပရေၚ်ဂကူမန် (သၞာံ ၂၀၂၂) ထပ်သ္ပဏာဒတန်ရ။
(၅) တ္ၚဲကောန်ဂကူမန်ဗွဲမလုပ်သၞောဝ် ညံၚ်ဂွံကၟာတ်ရုၚ် ပ္ဍဲဒေသဂကူမန်တံမာန်ဂှ် အလုံဂကူမန် သွာၚ်ညးကုညး ညံၚ်ဂွံဂိုတ်ဂစာန်လွဳပရာအာကီု၊ ပ္ဍဲတ္ၚဲကောန်ဂကူမန် ညးဍုၚ်ကွာန်ဂကူမန်တံ နကဵုအလဵုဆန္ဒဇကု ကၟာတ်ရုၚ် ကၟာတ်ကမၠောန်တုဲ ထ္ၜးစိုတ်ဓာတ် ဆီဇာတိ မာန်ဇာတိ အလုံဂကူမာန်ကီု။
အသေအဟာန်တ္ၚဲကောန်ဂကူမန် မၞုံအလုံဂၠးကဝ်တံ ညံၚ်ဂွံကၠောန်အာ ပ္ဍဲတ္ၚဲမာ်မွဲစွေက်ဟေၚ်တုဲ အကာဲအရာဟွံကဵု ယဝ်ဒးကၠောန်ကၠာမာ်မွဲစွေက်မ္ဂး ညံၚ်ဂွံသုၚ်စောဲအာဝေါဟာ “ဒစးဒုၚ်တ္ၚဲကောန်ဂကူမန်” ယဝ်ဒးကၠောန်မာ်မွဲစွေက် လောန်တုဲမ္ဂး ညံၚ်ဂွံသုၚ်စောဲအာ ဝေါဟာ “ပ္တိုန်စရာဲတ္ၚဲဂကူမန်” ဂှ် ဖျေံဏာသ္ဂုတ်သွာတ်ရ။
(လၟေၚ်ကမၠောန်အနာဂတ်)
(၁) ကိစ္စနုၚ်နိဓိ (သြန်ဂအုံကောန်ဂကူ) ဂှ် ဒးဓမံက်အာရုပ်ရဴရောၚ်။
(၂) ဆေၚ်စပ်ကဵုအလာံဍုၚ်မန် ညံၚ်ဂွံဒှ်မွဲကီု၊ ယာတ်ထၟိၚ်ဍိုပ် (ယာတ်ဖေၚ်ပူဍိုပ်) ညံၚ်ဂွံဒှ်မွဲကီုဂှ် ဒးချပ်ဇန်အာ ရောၚ် သာ်ဝွံ လးဖျေံလဝ် ပ္ဍဲကောံဓရီုပရေၚ်ဂကူမန် (သၞာံ- ၂၀၂၂) ရ။
လၟေၚ်ကမၠောန်လးဖျေံဏာလဝ်ဂမၠိုၚ်တံဂှ် ခမဳသၚ်၊ သွာၚ်ဗော်ဍုၚ်မန်တၟိ၊ သွာၚ်ဗော်ညဳသၟဟ်မန်၊ သွာၚ်ဂကောံမ ဟာဇန်ဂမၠိုၚ် ဒးရေၚ်တၠုၚ်ကၠောန်ၜိုတ်တဴရ။
ကောံဓရီုပရေၚ်ဂကူမန် ကၠောန်ကၠုၚ်လဝ် နူသၞာံ (၂၀၁၆) တေံတုဲ လၟုဟ်စိုပ်သၞာံ (၂၀၂၂) ဏံမှ ဗော်ဇဳ၊ ဗွိုၚ်ဇဳ ဗွဲမညဳသာသၟဟ်သၟန်ကောံကလောံတုဲ ချပ်ဇန်လးဏာလဝ် လၟေၚ်ကမၠောန်ဂကူနာနာမာန်ကၠုၚ်ရ။