မာံသုခ၊ ဂိတုဂျူလာၚ် ၁၄၊ ၂၀၂၂

ပ္ဍဲအခိၚ်ကာလဏံ ညးကၠောန်သ္ပတ္ၚဲကတဵုဒှ်မၞိဟ် (Birthday) တအ်ဂၠိုၚ်တုဲ သုၚ်စောဲကၠုၚ်ကွာၚ် Cake ဂၠိုၚ်ဂှ်ရ သၟတ်ညးကၠောန်ကွာၚ် Cake တအ် ဒှ်ပရေၚ်ပိုန် ဂြပ်ဩန်လုပ်ခိုဟ်ကၠုၚ်မွဲရောၚ် ဂွံတီကေတ်ရ။
ကွာၚ် Cake ဏံဝွံ ပ္ဍဲအရာ မိမကၠောန်တ္ၚဲဒှ်မၞိဟ်ကဵုကောန်၊ ကောန်ကၠောန်တ္ၚဲဒှ်မၞိဟ်ကဵုမိမ၊
ဝုတ်ဗၠာဲ၊ ဒကာဘာ ကၠောန်တ္ၚဲဒှ်မၞိဟ်ကဵု ကျာ်ဇၞော်အ္စာ / တၠဂုဏ်အ္စာ လၟေၚ်တ္ၚဲ အခိၚ်ညးဒှ်မၞိဟ် နွံမံၚ်လၟိုန်တုဲ ဟွံရုဲကသီု / ကညၚ် ပွိုၚ်(၁၂) ရာသဳဂှ် ဂွံကၠောန်မံၚ်လၟိုန်ရ။
“ဒေသပိုဲဂှ်တှေ် ကၠာတေံ ညးသုၚ်စောဲကွာၚ်ဏံအောန်မံၚ်၊ လၟုဟ် အရိုဟ်တ္ၚဲရ ကောန်ၚာ် ညးဇၞော်ဇၞော် ညးကၠောန်တ္ၚဲဒှ်မၞိဟ်ဂၠိုၚ်၊ ဂွံကၠောန်အရိုဟ်တ္ၚဲရ၊ တ္ၚဲဒှ်မၞိဟ်ဂှ် ကသီုကညၚ်ဟွံရုဲ နွံမံၚ်လၟိုန်၊ မွဲတ္ၚဲ ဟွံဂွံရဂှ်တှေ် (၂၊ ၃) မ ဂွံကၠောန်မံၚ်ဏီ” သာ်ဏံ သၟတ်ကၠောန်ကွာၚ် Cake မွဲတၠ မိလှိုၚ် ဟီုရ။
ကွာၚ် Cake ဏံဝွံ မွဲမ နူမွဲဠက် စဵုကဵုၜါဠက် တန်တဴကဵုဇၞော်ဍောတ် ဗီုပြၚ်ညးကေတ်တအ် နွံပၟိက် စုတ်ဗီုရုပ် ဓဇက်ပ္ကဴတအ် ခုတ်ၚုဟ်ကၠောန်ကဵုမံၚ်တုဲ မွဲတ္ၚဲမ္ဂး ပိဠက် စဵုကဵုမသုန်ဠက် မွဲကိုဋ် ညးကၠောန်ကွာၚ် Cake တအ် ဩန်လုပ်မံၚ်လၟေၚ်လၟေၚ်တုဲ ပွိုၚ်မွဲဂိတု ဩန်အကြာ (၁၀၊ ၁၅) ကိုဋ် ဂွံမံၚ်နွံရ။
ပ္ဍဲဒေသလှာဒကှ်ဝွံ ကၠာတေံ ညးကၠောန်ကွာၚ် Cake တ္ၚဲဒှ်မၞိဟ်ဟွံမွဲတုဲ ကၠောန်တ္ၚဲဒှ်မၞိဟ် ကေတ်ကွာၚ်မ္ဂး ဒးဗ္ကန်မံၚ်မုဟ်ဍုၚ်တုဲ လၟုဟ် ကုသၟတ်ညးဂတာပ်တဲတအ်ဂှ် ဒှ်ပရေၚ်ပိုန်ဂြပ်ခိုဟ်မွဲရ။