မာံသုခ၊ ဂိတုသေပ်တေမ်ဗာ ၂၆၊ ၂၀၂၂
အခိၚ်ဏံဝွံ ဒှ်အခိၚ်ကၠောန်လ္ၚဴတုဲ ဟိုတ်နူအသိၚ်ၚုဟ်ဗွဝ်ဖျာ ဝဲါဓါတ်၊ ဂဥုဲဂစိုတ်ချောဲ၊ ဂဥုဲဂစိုတ်စၟ၊ ၚုဟ်ကၠေၚ်ဓါတ်၊ ၚုဟ်လိၚ်ညးဗာ်ချောဲ သၠုၚ်တိုန်မံၚ်ဖအိုတ်ကီု ဗြဲကၞောတ်သၞာံ ဆက်ဂူမံၚ်ဖိုဟ်ကီုတုဲ ညးကၠောန်လ္ၚဴတအ် လ္ၚဴဒးစၟ ဒးလွဳလွတ်ဂၠိုၚ် ခရိတ်ကၠောန်လ္ၚဴ အိုတ်ဂၠိုၚ်နူလၟေၚ်သၞာံ ၜါဆရောၚ် ညးကၠောန်လ္ၚဴတအ် ဟီုရ။
“သၞာံဏံ ကျာတ်လေဝ် ဝဲါဣဍၚ် ဂဥုဲဂစိုတ်ချောဲဂှ်ဣဍၚ် ကၠေၚ်ဓါတ်ဂှ်ဣဍၚ် ဍၚ်သဗ္ဗအိုဿီု ဒှ်မံၚ်တိဇကုတှေ် ဒေံါဟွံဂွံ ဒးကၠောန်အာဟဂှ်၊ ဒေံါဂွံမံၚ် အလဵုဂွံကၠောန်ရော၊ ယဝ်ဂွံၚုဟ်သၞာံအာဏံတှေ် အလဵုကေတ်ဏီအရၚ်ရဲလ္ၚဴ ယဝ်ဂွံၚုဟ်ဟလိုၚ်ဂှ်ပၠန် ဇက်လဝ်သီုလှုနူညးတၞဟ်ပၠန်တှေ် ဒးကၟာဲၜိုက်ရ” သာ်ဏံ ညးကၠောန်လ္ၚဴမွဲတၠ နူကွာန်ဝေသာလဳဗၟံက် နာဲတုၚ်တာန် ဟီုရ။
ဒေသလှာဒကှ် လောန်ကၠုၚ်ပန်မသုန်သၞာံဂှ် ညးကၠောန်လ္ၚဴတအ် တော်ကိတ် ကၠောန်ကၠုၚ်လ္ၚဴဂၠိုၚ်မံၚ်ကီုလေဝ် သၞာံဏံ ဟိုတ်နူအသိၚ်ၚုဟ်ဗွဝ်ဖျာနာနာ သၠုၚ်တိုန်ဂၠိုၚ်လောန်ဂှ်ရ တိကၠောန်လ္ၚဴတအ်သၠးဂၠိုၚ်တုဲ ညးကၠောန်လဝ်လ္ၚဴတအ်လေဝ် ၚုဟ်မးလ္ၚဴ ယဝ်ဂွံၜိုတ်သၞာံတုဲဏံရမ္ဂး သွက်ညးကၠောန်လ္ၚဴတအ် ဒးစေက် ကျခရိတ်ဂၠိုၚ်မံၚ်ရောၚ်ဂှ် ညးကၠောန်လ္ၚဴတအ် ဟီုဂးမံၚ်အိုတ်ရ။
ညးကၠောန်လ္ၚဴမွဲတၠမ္ဂး ဂဥုဲဂစိုတ်ချောဲ ဝါဲဓါတ် ဂဥုဲဂစိုတ်စၟ ဂဥုဲပယျာတၞး ဝါဲပခိုဟ်သတ် ၚုဟ်လိၚ်ၚးချောဲ ၚုဟ်လိၚ်မၞိဟ်ဂစတ်ချောဲ သီုဖအိုတ် တန်တဴကဵုကၠောန်လဝ်အောန်ဂၠိုၚ်တုဲ ညးမွဲတၠမ္ဂး အကြာ (၁၅) ကိုဋ်ကဵု (၂၅) ကိုဋ် စဵုကဵု (၃၀) ကိုဋ်လေဝ် ပ္တိတ်တမ်တုဲ ဒးအိုတ်မံၚ်နွံရ။
သၞာံတုဲဏံ ဝဲါဓါတ်တဆိပ်ချေံ မွဲရိုက် အကြာပန်ဠက်ပြၚ် မသုန်ဠက်နွံတုဲ သၞာံဏံ မွဲရိုက်ဒှ်အာ မွဲကိုဋ်မသုန်ဠက် ၜါဆၚုဟ်တိုန်တုဲ ဂဥုဲဂစိုတ်ချောဲ သၞာံတုဲဏံ မွဲဂလန် ၚုဟ်နွံအကြာပိဠက်တုဲ သၞာံဏံ မွဲဂလန် ဒ္စါံဠက်တိုန်အာတုဲ ဂဥုဲပယျာတၞးလ္ၚဴ ဂဥုဲဂစိုတ်စၟ နာနာတအ်လေဝ် ၜါဆတိုန်အာကီုရ။
လၟေၚ်သၞာံ ညးကၠောန်လ္ၚဴမွဲတၠမ္ဂး နူ (၄၀) န စဵုစိုပ် (၁၄၀) န ကလိဂွံမံၚ်လ္ၚဴနွံတုဲ ၚုဟ်မးလ္ၚဴ သၞာံလောန်ကၠုၚ်တုဲတုဲတေံ မွဲသၞာံကဵုမွဲသၞာံ ၚုဟ်မးလ္ၚဴယအ်စှေ်မံၚ်လၟေၚ်သၞာံတုဲ ကၠာတေံ မွဲန (၇၅၀၀၀) ကလိဂွံမံၚ်တုဲ နူဂှ် (၇၀၀၀၀ ၊ ၆၅၀၀၀)၊ သၞာံတုဲဏံ ၚုဟ်မးလ္ၚဴမွဲန နွံအကြာ (၄၅၀၀၀ ကဵု ၅၀၀၀၀) ဓဝ်ရ။
ပ္ဍဲဒေသလှာဒကှ်ဝွံ မွဲဒမြိပ်ၜဳဇမိတ် နူစဍုၚ်လှာဒကှ် စဵုစိုပ်ဗ္ဒာဲကျာ်ပိ ဗၟံက်ၜဳကီု ပလိုတ်ၜဳကီု ဂကူမန်၊ ဂကူကရေၚ်တအ် ဗွဲမဂၠိုၚ် ဒှ်ညးကၠောန်တဵုမံၚ်လ္ၚဴရ။
