ညးတာလျိုၚ် ကေုာံ သ္ဂံၚ်ကံၚ်ဇြဳပၞာန် ပြဟ်လလုဲအာ ပ္ဍဲမုက်ပၞာန်တံဂှ် နူကဵုအဆံၚ်လတူတံ ကၟာတ်လဒဵု ဟွံကဵုအခေါၚ်သ္ပကုသဵုတုဲ သမ္ဘာညးတံ ဒးကၠတ်သ္ပဒၟံၚ်ကုသဵုသ္ၚိတ်သ္ၚိတ်ရောၚ် ညးကြပ်ကဵု သမ္ဘာညးတာလျိုၚ်ကံၚ်ဇြဳပၞာန် လတူဍုၚ်မတ်မလီုမွဲတၠ ဟီုလဴထ္ၜးရ။

“တြုံဂှ် ညးနွံကဵုအဆံၚ်တာလျိုၚ်မွဲမွဲကဵုဒှ် ကောန်သ္ဂံၚ်ဓမ္မတာမွဲမွဲကဵုဒှ် ချိုတ်အာပ္ဍဲမုက်ပၞာန်တုဲ ပ္ဍဲသ္ၚိဏံ သမ္ဘာညး မိက်ဂွံ သ္ပကုသဵုပ္ဍဲသ္ၚိညးတှ်ေ ဗီုပၟိက်စိုတ်မိက်ဂွံသ္ပဂှ် နူကဵုတမ်ဒပ်ညးတံတံ ဟွံကဵုအခေါၚ်သ္ပပုဟ်၊ သမ္ဘာဍေံ မိက်ဂွံသ္ပကုသဵုကဵု တြုံဍေံပ္ဍဲသ္ၚိတှ်ေ ဒးကၠတ်သ္ပ သ္ၚိတ်သ္ၚိတ် ဗီုဇကုကဵုဇကုရ သ္ပဂွံ” ရဂှ် ညးကြပ်ကဵု သမ္ဘာညးတာလျိုၚ်ကံၚ်ဇြဳပၞာန် အဆံၚ်ဗိုလ် လတူဍုၚ်မတ်မလီုမွဲတၠဂှ် ဟီုရ။

ညးတာလျိုၚ် ကေုာံ သ္ဂံၚ်ကံၚ်ဇြဳပၞာန် နူတွဵုရးဍုၚ်မန်ဗွဲမဂၠိုၚ်တံဂှ် အဓိက ဒးတိတ်တရဴမုက်ပၞာန် ဒေသတွဵုရးသေံသၟဝ်ကျာ၊ ဒေသရခေၚ်နွံဂၠိုၚ်တုဲ ပြဟ်လလုဲအာ ပ္ဍဲမုက်ပၞာန်တံဂှ် နွံဂၠိုၚ်ကွေံကွေံရောၚ်ဂှ်လေဝ် ညးကြပ်ကဵု သမ္ဘာညးတာလျိုၚ်ဗိုလ်ဂှ် ဆက်လဴကဵုရ။

“ဗွဲမဂၠိုၚ်ဂှ်တှေ် ဒးအာမုက်ပၞာန် ဒၞာဲပေါဲဗတိုက်ဒှ်မံၚ် ဒေသတွဵုရးသေံသၟဝ်ကျာကဵု ဒေသတွဵုရးရခေၚ်တေံရဂၠိုၚ်၊ ဒၟာနူဂှ်ရ ညးတာလျိုၚ်ဍောတ်ဍောတ်ကီု၊ အဆံၚ်ဗိုလ်ဇၞော်ဇၞော်ကီု ပြဟ်ချိုတ်အာ ပ္ဍဲမုက်ပၞာန်တေံနွံဂၠိုၚ်ကွေံကွေံ၊ လ္ၚဵုဂှ် အ ဆံၚ်ညးတာလျိုၚ်ဇၞော်ညိတှေ် ပရိုၚ်ကလေၚ်နွံ၊ သ္ဂံၚ်ပၞာန်ဍောတ်ဍောတ်တံဗွဲမဂၠိုၚ်ဂှ်တှ်ေ ပရိုၚ်ကလေၚ်လေဝ်နွံ၊ ပရိုၚ် ဟွံကလေၚ်လေဝ်နွံ၊ ရဲညးပရိုၚ်ကလေၚ် ချိုတ်အာ ပ္ဍဲမုက်ပၞာန်တေံတှ်ေ တီချိုတ်ပၠိုတ်တုဲ သမ္ဘာညးတံ ရန်တၟံ တြုံ တၠသ္ၚိညးတံ မိက်ဂွံကဵုခိုဟ်စတုဲတှေ် ဗြဴဂှ် မိက်ဂွံသ္ပကဵုကုသဵု၊ ဆဂးတှ်ေ နူကဵုဒပ်မဆေၚ်စပ်လတူတေံဂှ် ဗီုပၟိက်စိုတ်ဂှ် သ္ပကုသဵုပ္ဍဲသ္ၚိဇကုဟွံဂွံပုဟ်၊ ပ္ဍဲတမ်ဒပ်တေံရ အခိၚ်ညးသ္ပကဵုတှ်ေ ညးသ္ပကဵု၊ နကဵုဗြဴသမ္ဘာတံ ပ္ဍဲသ္ၚိဇကု မိက်ဂွံသ္ပဗီုဒးစိုတ်ဂှ် ဟွံဂွံအခေါၚ်သ္ပပုဟ်” သ္ဂးရ။

ပ္ဍဲတွဵုရးဍုၚ်မန်ဝွံ ညးတာလျိုၚ် ကေုာံ သ္ဂံၚ်ကံၚ်ဇြဳပၞာန်တံ ပြဟ်လလုဲအာ ပ္ဍဲမုက်ပၞာန် ပ္ဍဲဒေသတွဵုရးသေံသၟဝ်ကျာကီု၊ ပ္ဍဲဒေသတွဵုရးရခေၚ်ကီု နွံဗွဲမဂၠိုၚ်တုဲ သွက်သ္ဂံၚ်ပြဟ်လလုဲ အာလဝ်တံဂှ် သမ္ဘာသှ်ေမံၚ်ဏံ မပ္တံကဵု ဇွောံမကီု၊ ဩန်ထံက်ပၚ်ကီု၊ ဩန်ဂိတုကီု၊ အခေါၚ်အရာ ထေက်ကဵုဒးကလိဂွံကီုဂှ် ဟွံဂွံဒုၚ်စသိုၚ် နွံဟွံအောန်ဂှ်လေဝ် ဂွံတီကေတ်ရ။