ပ္ဍဲဒေသရးကီု ဒေသတိဍာ်ကောန်ဂကူဂမၠိုင်တံကီု ဒေသမုက်ပၞာန်သၠဲလးတိုန်ဒၟံင်ဂှ်တုဲ ပေါဲရုဲမာဲကံင်ဇြဳပၞာန် မချပ်ဇန်လဝ်ဂှ် ဂွံဒှ်ကၠောန်ဟွံလောဲရောင် သၟာပရေင်ဍုင်ကွာန်မန်လ္ရဵု သ္ၚဳဂၠိပ်ရ။
ပ္ဍဲသၞာံ ၂၀၂၅ မံက်ဗက်ဂှ် ဒေသအဒေါဝ်ဂြိုဟ်ဍုင်ကီု၊ ဒေသတိဍာ်ကောန်ဂကူကောန်ဍုင်အရင်ဗွဲမဂၠိုင်တံကီုဂှ် အသိင်ပေါဲပၞာန်ထတ်သ္ကာတ်ကၠုင်မံင်ဂှ်ကီု ဗွိုင်တိဍာ်ပေါဲပၞာန်သၠဲလးတိုန်ဂှ်ကီုတုဲ ပေါဲရုဲမာဲကံင်ဇြဳပၞာန်တံ ဂွံဒှ်ဟွံလောဲရောင် သၟာပရေင်ဍုင်ကွာန်မန်မွဲတၠ ဟီုရ။
“ရံင်အာပ္ဍဲကဵု ၂၀၂၅ မံက်ဏံဂှ် ဒေသမဂွေ၊ ဒေသမာန္တလေဝ်၊ ဒေသလဂုင်၊ ဒေသဗ္ဂော ကဵုဒေသဆက်စပ်လ္ၚဵုဂှ် ဒှ်အာမုက်ပၞာန်အိုတ်ရ၊ ဒေသတဂှ် ညံင်ဂွံဗဒှ်ပေါဲပၞာန်သီဍုင်ဂှ်လေဝ် ရဲပၠန်ဂတးတံ စဳဇန်မံင် နွံကၠုင်၊ ဒေသတိဍာ်ကောန်ဂကူကောန်ဍုင်အရင်တံပၠန်လေဝ် ရခေင်၊ ချေင်၊ ကချေင်၊ ကရေင်ဍာဲ၊ ကရေင်၊ မန် ဒေသတဏံလေဝ် ဗီုညးကဵု ညး ဂစာန်သၠုင်မံၚ်ပေါဲပၞာန်နွံမံင်တှ်ေ ရံင်သ္ၚဳဂၠိပ်ကေတ်ဖအိုတ်ဏံတုဲတှ်ေဗွိုင်တိဍာ်မုက်ပၞာန်ဂှ် ပ္ဍဲ ၂၀၂၅ ဏံ ဗွိုင်ဍေံသၠဲတိုန်နူကဵုတုဲကၠုင် ၂၀၂၄ တေံ တၟာဂလိုင်ဏောၚ်။ ဟိုတ်ဂှ်ရ ပေါဲရုဲမာဲကံင်ဇြဳပၞာန်တံ ရန်လဝ် သွက်ဂွံကၠောန်ဏောင်ဟီုဂှ် ၜိုတ်ဆရမျှာင်ဟီုရ ဟီုမာန်၊ နဇိုင်နတဲ ဂွံကၠောန်ကွေံကွေံဂှ် ရံင်ကဵုဗွိုင်မုက်ပၞာန်ဟီုလဝ်နူကၠင်ဏံတုဲတှ်ေ ဂွံဒှ်ဍေံဟွံလောဲ” သာ်ဝွံ သၟာပရေင်ဍုင်ကွာန် ဗွိုင်မ္ၚးဗော်ပရေင်ဍုင်ကွာန်မွဲတၠ ဟီုသ္ၚဳဂၠိပ်ထ္ၜးရ။
နကဵုကံင်ဇြဳပၞာန်တံဂှ် ပေါဲအခန်ကၞာမွဲမွဲကီု၊ အသေအဟာန် ကေင်ကာမွဲမွဲသာ်ကီု သွက်ဂွံကၠောန်ဗဒှ်အာပေါဲရုဲမာဲဂှ် ဖန်ဇန်ပလေဝ်ပလေတ်ဒၟံင်နွံတုဲ လၟေင်ပရေင်ကမၠောန်ပေါဲရုဲမာဲဂှ်လေဝ် မပတမ်ကဵုစရင်လၟိဟ်မၞိဟ်အခေါင်စုတ်မာဲကီု၊ ဒေသညးဍုင်ကွာန်ကဵုမာဲမာန်ကီု၊ စပ်ကဵုဏ္ဍပရေင်ဂီုကၠီုပေါဲရုဲမာဲကီု ဟီုထ္ၜးသဳကၠဳဇိင်တပ်ပညဳပညပ်ဒၟံင်ကုဗော်ပရေင်ဍုင်ကွာန်ဂမၠိုင်အဆက်က်နွံရ။
မွဲလ္ပာ်ဂှ် သၟာပရေင်ဍုင်ကွာန် အပ္ဍဲဗော်ပရေင်ဍုင်ကွာန်လ္ၚဵုတံကီု၊ သၟာပရေင်ဍုင်ကွာန်ဗွိုင်မ္ၚးဗော်လ္ၚဵုတံကီု ချပ်ဂၞန် သဳကၠဳတုဲ ပတိတ်ကၠုင်လညာတ် အခိင်ပေါဲပၞာန်သ္ကာတ်မြဟ်ကတဵုဒှ်ဒၟံင်တ္ၚဲဏံဂှ် စၞးဒးကၠောန်ပေါဲရုဲမာဲဂှ် ညးဒးပါလုပ် ထေက်တံသီုဖအိုတ် ကော်ဘိက်တုဲ ကၠောန်အာပေါဲသဳကၠဳပရေင်ဍုင်ကွာန်ကၠာမ္ဂး ဒှ်ဂၠံင်သောင်ကလးပဋိပက္ခ ပရေင်ဍုင်ကွာန်ဂၠံင်ခိုဟ်ရောင်ဂှ်လေဝ် ပတိတ်ကၠုင်လညာတ်ရ။
“ပေါဲရုဲမာဲဂှ် ကံင်ဇြဳပၞာန်တံ ဗီုလဵုဟီုဟီုရ ရံင်ကေတ်ကဵုဗွိုင်ဒေသမုက်ပၞာန်သၠဲလးတိုန်မံင် ဗီုတ္ၚဲဏံတှ်ေ ဟလဵုပလေဝ် ကၠောန်ဂွံဟွံသေင်၊ ယဝ်ဒှ်ကၠောန်ကေတ်အတေင်လေဝ် တုပ်ဗဂဵုပတိုန်ပဋိပက္ခရ အဲညာတ်၊ ဗီုကဵုရဲသွာင် ဂစာန်မံင်ပေါဲသဳကၠဳပရေင်ဍုင်ကွာန် မွဲစင်ဂွံဒှ်ကၠုင်မာန်ဟီုဂှ်လေဝ် အခိင်တ္ၚဲဏံ ဍေံဂွံဒှ်ဂှ် ဗီုဟီုလောဲဂှ် ကၠောန်နတဲ ဟွံလောဲပုဟ်၊ မုပရောတှ်ေ ဟိုတ်နူပေါဲပၞာန်သ္ကာတ်မြဟ်မံင်တုဲတှ်ေ ဓဝ်ပတှ်ေမွဲလ္ပာ်ကဵုမွဲလ္ပာ်ဂှ် လီုမံင်ဏောင်၊ ကံင်ဇြဳပၞာန်ဂှ်လေဝ် ကၠောန်သ္ပမံင်ကဵုညးဍုင်ကွာန်ဆဆဵုဏောင်၊ ထောံဗမ်ကဵုက္ၜင်ကျာဏောင် မုဂှ်ဏောင်တှ်ေ ဝိုင်သဳကၠဳပရေင်ဍုင်ကွာန် ရဲဂစာန်မံင်ဂှ်လေဝ် ဂွံဒှ်ဟွံလောဲပုဟ်၊ ပေါဲပၞာန်ဏံ ဍေံဆက်အာမံင် မွဲကာလဏီဏောင် အဲညာတ်” သာ်ဝွံ သၟာပရေၚ်ဍုၚ်ကွာန်ဂှ် ဆက်ဟီုရ။
အကာဲအရာကာလတ္ၚဲဏံဂှ် ဒေသအဒေါဝ်ဂြိုဟ်ဍုင်ဇၞော် ဍုင်ဗၟာဂှ် ဂကောံပၠန်ဂတးဂမၠိုင်တံ စဳဇန်ပကောံပလေဝ်ဒၟံင် သွက်ဂွံသီဍုင်နွံဂှ်တုဲ နကဵုကံင်ဇြဳပၞာန်ဂှ် ယဝ်ခါရ ဖျေံနင်ကိုန်စဳဇန်လၟေင်ကမၠောန်ပေါဲရုဲမာဲ လလောင်ပတိတ်ပရေင်ကမၠောန်ပေါဲရုဲမာဲတုဲ ဗော်ပရေင်ဍုင်ကွာန်ဂမၠိုင်တံ စချဳဒရာင်ကိစ္စရုဲမာဲဗက်ဂှ် ပေါဲပၞာန်သွက်ဂွံထပ်သ္ကာတ်မြဟ်တိုန်နူဏံလေဝ် ကတဵုဒှ်မာန်ရောင် သ္ဂးရ။
ပ္ဍဲသၞာံ ၂၀၂၅ ဏံ ဟွံဒှ် ညံင်ဂွံဒှ်ကၠောန်အာပေါဲရုဲမာဲတွဵုရောင် ကံင်ဇြဳပၞာန်တံ ဟီုလလောင်တြးကၠုင်လဝ် ထပ်ကဵုထပ်ကီုလေဝ် ပ္ဍဲကဵုဂျာန္နဝါရဳအိုတ်ဏံ ဟိုတ်နူပရေင်ကြေပ်ဂြတ်နာနာသာ်တုဲကံင်ဇြဳပၞာန်တံ သွက်ဂွံထပ်ဆက်အာယုက် ပွိုင် ၆ ဂိတုနွံပၠန်တုဲ ပေါဲရုဲမာဲဟီုမံင်ဂှ်လေဝ် သွက်ဂွံထပ်ပဆုဲဏာ ၂၀၂၆ တေံရောင် ဌာန်ပရိုင်လ္ၚဵုချူဓမံက်လဝ်နွံ ဂွံတီကေတ်ရ။
