ပ္ဍဲကာလပၠန်ဂတးတ္ရဲဏံဂှ် ညးဒေသရေဝ်သၟဝ်ကျာတံ သွက်ဂွံအာကမၠောန်ကီု သွက်ကၠအ်သွဝ်ကီု ဒးဒုင်ကဵုမံင်အကံက် ခေါန်ကဵုဂကောံရပ်လွဟ်တံ ဂကောံဗွဲမဂၠိုင်ရောင် သ္ဂးမံင်အိုတ်ရ။
ညးဍုင်ကွာန်တံ သွက်ဂွံအာကၠအ် အာကၠောန်ကၠအ် အာခွါတ်ထၜိုတ်ဂွံဂှ် ဒးကၠောန်လိက်တၞးကာတ် သီုလ္ပာ်ပ္ဍဲ၊ သီုလ္ပာ် မ္ၚးနွံတုဲ အကံက်ခေါန်ကၠောန်ကာဒ်ဂှ် ဒးကဵုမံင်အကံက်ဩန် ဗၞတ်ဗ္ၜတ်ညးကဵုညး နွံရ။
“ဒေသပိုဲဏံဂှ် ဂွံအာကၠအ် အာခွါတ်ထၜိုတ်ဂွံဂှ် လ္ပာ်ဂကောံပၠန်ဂတးတံလေဝ် ဍေံကဵုကၠောန်ကာဒ်နွံ၊ ကၠောန်လဝ်ကာဒ် မှ အာကၠအ် အာခွါတ်ထၜိုတ်ဂွံ၊ လ္ပာ်ဒပ်ပၞာန်ဗၟာတံလေဝ် ဒးကၠောန်လဝ်ကာဒ်နွံ၊ တိတ်နူကွာန်တှ်ေ ပၞာန်ဗၟာ ကဵု ဒပ်မင် ကင်ကွာန်တံ စၟဳစၟတ်၊ စိုပ်ကၠအ်တေံပၠန်တှ်ေ ရဲမ္ၚးတံ ရဲပၠန်ဂတးတံ စၟဳစၟတ် ဒးကၠောန်လဝ်ကာဒ် သီုၜါလ္ပာ်” သာ်ဝွံ ညးဒေသမွဲတၠ ဟီုထ္ၜးရ။
တုဲကၠုင်တေံမ္ဂး ကာဒ်အာကၠအ် အာထၜိုတ်ဂှ် လ္ပာ်ဂကောံရပ်လွဟ်ပၠန်ဂတးတံသၟးဟေင် ဒးကၠောန်တုဲ လၟုဟ်မ္ဂး ဗွဲကြဴ နူကဵု ဂကောံပၠန်ဂတးတံ လုပ်ပန်ဗတိုက် ဒပ်ပၞာန်ဗၟာ ကေုာံ ဒပ်မင်ကင်ကွာန်တံ မွဲဏှမွဲဏှကတဵုဒှ်ကၠုၚ်တုဲ လ္ပာ်ဒပ်ပၞာန်ဗၟာ ဒပ်မင်ကင်ကွာန်တံလေဝ် စကာကဵုကၠောန်ကၠုင်ကာဒ်အာကၠအ် အာကမၠောန်နွံကၠင်ကီုရ။
ဒေသရေဝ်သၟဝ်ကျာဂှ် ဂကောံရပ်လွဟ်ပၠန်ဂတးတံ ဂကောံဗွဲမဂၠိုင် ချဳဒရင်ဖျေံလဝ်သဇိုင်တုဲ မပ္တံကဵု အကံက်ခေါန်ကီု၊ ကာဒ်သွက်ကၠောန်ကမၠောန်ကီု ညးဒေသတံ ဒးဒုင်ကဵုမံင်အကံက်သီုလ္ပာ်ဂကောံပၠန်ဂတးရပ်လွဟ်တံ၊ သီုလ္ပာ်ဒပ် ပၞာန်ဗၟာ ကဵု ဒပ်မင်ကင်ကွာန်တံရ။
“ကာဒ်မွဲတၞးဂှ်တှ်ေ လ္ပာ်ဂကောံပၠန်ဂတးတံဂှ်တှ်ေ ၅၀၀၀ နွံ ၇၀၀၀ နွံ ဂကောံမွဲကဵုမွဲ ကေတ်ဟွံတုပ်ညးသ္ကအ်ပုဟ်၊ လ္ပာ်ဒပ်ပၞာန်ဗၟာ ကဵု ဒပ်မင်ကင်ကွာန်တံဂှ်တှ်ေ ကာဒ်မွဲတၞး ၇၀၀၀၊ ကာဒ်ဟွံမွဲတှ်ေ လ္ပာ်ဒပ်ပၞာန်ဗၟာဂှ်တှ်ေ ဟွံကဵုအခေါင်တိတ် မ္ၚးကွာန်၊ စိုပ်ကၠအ်ပၠန်လေဝ် ကာဒ်ဟွံမွဲတှ်ေ ရဲမ္ၚးတေံ ရပ်စၟဳစၟတ်၊ ညးဒေသပိုဲဏံ ထုဲမံင်ကဵု ကာဒ်ကၠောန်ကမၠောန်ဏံ ဖအိုတ်ရ” သာ်ဝွံ ညးဒေသဂှ် ဆက်ဟီုရ။
ပ္ဍဲပွိုင်ဍုင်ရေဝ်သၟဝ်ကျာ ဒေသလ္ၚဵုဂှ် ပါဲနူကဵုဒးဒုင်ကဵုအကံက်ခေါန် မၞိဟ် တၠကမၠောန်တုဲ ညးပိုင်ပြဳလဝ်ကၠအ်တံလေဝ် ဒးဒုင်ကဵုမံင်အကံက်ခေါန် ကဵုဂကောံပၠန်ဂတးရပ်လွဟ် မပ္တံကဵု မန်၊ ကရေင်၊ ဗမာ သီုပိဂကောံနွံရောင် ဂွံတီကေတ်ရ။
အကံက်ခေါန်ကၠအ်တံဂှ် ဂကောံရပ်လွဟ်ဂမၠိုင် ကေတ်မံၚ်ကဵုသၞာံတုဲ ကၠအ်ဍောတ်မ္ဂး လၟိဟ်ကဵုဠက် (၁၀၀၀၀) ဒး ကဵုတုဲ ကၠအ်ဇၞော်မ္ဂး လၟိဟ်ကဵုကိုဋ် (၁၀၀၀၀၀) ဒးကဵုမံင်အကံက်ခေါန်ကၠအ်အိုတ်ရ။
