လိက်လညာတ်၊ အံက်သာ

မၞိဟ်မွဲမွဲ နူစအဝဲမံၚ်ဘာ စဵုကဵုစိုပ်အဝဲမၞိဟ်လဒေါဝ် သ္ဂောံနွံကဵုလညာတ် သမ္တီ ပညာ နာနာသာ်မာန်ဂှ် မ္ဒးလ္ၚတ် မ္ဒးဆိုက်ပဒက်ကဵု ပွမဗှ်လိက်ရ။ ပွမဗှ်လိက်ဟေၚ် သွက်အံၚ်ဇၞးဘဝဇကု သ္ဂောံစိုပ်အာ ဂၠံင်တရဴ မဍာံပြမာန်ရ။ သ္အာင်နူဂှ်ပၠန် ပွမဗှ်လိက်ဂှ် ဖန်ဗဒှ်ကဵု ပရေင်ယဝီုကောန်တၟံ မြက်နူပကတိဂှ်လေဝ် သ္ဂောံသိင်အောန်စှ်ေအာကီု သီုကဵုပရေင်ဖျုန်လတေင်ကောန်ကၞိ မကြံင်မ္ၚိုဟ်မံင်တံဂှ် သာဍိုန်စှ်ေတုဲ ဖဍိုက်ဗပေင်ကဵုပရေင်ရုပ်သာ် သွက်သ္ဂောံဍိုက်ပေင် ကျေဝ်ဆာဲကၠုင်ရ။

ညးမဗှ်လိက်ဂၠိုင်ဂှ် က္လိဂွံ ပရေင်စိုတ်ဓာတ်တန်ကြန်တုဲ စိုတ်ဓာတ်လေဝ်ကြံင်မ္ၚိုဟ် ခိုင်ဗိုန်ရ။ အစောံဒြဟတ် ပရေင်ဖောအ်ဗြေဝ်က္ဍဟ်လေဝ် သၠုင်တဴရ။ စရိုတ်ခိုဟ်တုဲ ကသပ်ခိုဟ်ရ။ သွက်သ္ဂောံသြုင်တတ်ကၠောံအာ ပရေင်ခက်ခိုအ် ဆိုအ်ဗနာနာလေဝ် လ္ဇုဲလ္ဇဟွံမွဲရ။ ပရေင်ကဵုသ္ဂုတ်သွာတ်လေဝ် ဍာံပြရ။ တးပါဲကၠေံ ပွဟွံခိုဟ်ဆာဲတံဂှ်တုဲမ္ဂး လ္တူညးမွဲသ္အာင် ကၠိုဟ်ကၠးညာတ်ကေတ်စိုတ် ဗွဲမသၠဲလးတုဲ စိုတ်ဓာတ်လေဝ် သၠုင်ပြဲတဴရ။

ညးမဗှ်လိက်ဂၠိုင်ဂှ် ဟီုအရေဝ်လေဝ်ခိုဟ်ရ။ ရုဲစှ်ပွဳပွူခိုဟ်ဟ်လေပ်တုဲ က္လိဂွံဂုဏ်ဖဵု မၞုံကဵုၚုဟ်မးရ။ ဆေင်စပ်ကဵုဗှ်လိက်တုဲ ဗီုပြင်လိက်ဂကူလဵု ဂွံဗှ်ရောဂှ် ၜိုန်ရစၟတ်လဝ်ဟွံမွဲကီုလေဝ် လိက်အုပ်ဂကူ မပလေဝ်ကဵုစရိုတ် ပ္ဍဲစိုတ်ပိုဲမာန်တံဂှ်ကီု၊ လိက်အုပ်ဂကူ မပရံင်ကဵုလညာတ်သမ္တီ ဉာဏ်ပညာဗဟုသုတကီု သီုကဵုလိက်လၟေတ်ညးသပ္ပုရိုဟ် သွက်ပိုဲတံသ္ဂောံဒ္ဂေတ်ဗက်တံဂှ် ရုဲစှ်တုဲဗှ်မ္ဂး ဒးရးဂၠိုင်ရောၚ် မိက်ဂွံသ္ဂးရ။

စိုပ်ကၠုင်ခေတ်ကာလတ္ၚဲဏံ မၞိဟ်သၟတ်တံ ဗွဲမဂၠိုင်ဂှ် ဗှ်လ္ရတ်ကၠုင်လိက် ဆလ္တူလပှ်ကျာသၟးဟေင် ဂၠိုင်ကၠုင်တုဲ ညးဗှ်လိက်အုပ်တံ အောန်ကြဳစှ်ေကၠုင်ရ။ ဗှ်လိက်နကဵုဖုင်ကီု၊ ဗှ်လိက်နကဵုကောန်ပျူတာကီုတံဂှ် ရှ်သာဗှ်လိက် ဟွံတုပ်ကဵုဗှ် နကဵုလိက်အုပ်လးလးရ။ (ဟီုမွဲနဲပၠန်မ္ဂး) ဗှ်လိက်နူကဵုဗလးမုက်ဖုင်ကီု၊ ဗှ်လိက်နူကဵုဂၠးမုက်ကောန်ပျူတာကီုတံဂှ် က္လိဂွံရှ်သာ ၜိုတ်ဗှ်ပ္ဍဲလိက်အုပ် ဟွံဒှ်ရ။

ပ္ဍဲမၞိဟ်မွဲမွဲဂှ် တန်တဴဒၟံင်ကဵု ပွမဍိုက်ပေင်တဴကဵုလညာတ်သမ္တီသၠဲလး ကဵု ဉာဏ်ပညာစဳကၠး ကေုာံ  ပရေင်ဖောအ်ဗြေဝ်က္ဍဟ် ကဵု ကသပ်ဂၞန်ခိုဟ်တအ်ရ။ လညာတ်သမ္တီသၠဲလးဂှ် ပံင်ဗ္စပ်ကဵု ဉာဏ်ပညာစဳကၠးမာန်မ္ဂး က္လိဂွံအစောံဍာ်ဒကေဝ် ပရေင်ဖန်ဗဒှ်ကဵု အရာတၟိတၟိခိုဟ်ဟ်မာန်ရ။ ပရေင်မၞုံကဵုဉာဏ်ပညာ ကဵု ပရေင်လညာတ်သမ္တီသၠဲလးဂှ် တၞဟ်ခြာမံင်ရေင်သ္ကံရ။

ပွမၞုံကဵုပရေင်ဉာဏ်ပညာဂှ် ဒှ်အစောံဍာ်ဒကေဝ် မဒုင်သဇိုင်ကဵု ပညာတီ၊ ပရေင်ဆဵုဂဗ၊ ပရေင်ကၠိုဟ်ခၠင်၊ ပရေင်ချပ်က္သပ် (ဟွံသေင်မ္ဂး) ပရေင်သွက်သ္ဂောံကၠောန် နတဲတအ်ရ။ ညးမၞုံကဵုဉာဏ်ပညာဂှ် ဒှ်သဇိုင်ရိုဟ်ကၞက်ဘဝ က္ဍိုပ်သ္ကိုပ်မွဲရ။ ကပေါတ်မတိတ်ကၠုင် နူဉာဏ်ပညာဂှ် ပ္ဍဲအရာမသောင်က္လးပြသၞာမ္ဂး ကတဵုဗဒှ်ကဵုဂုဏ်ဖဵုတုဲ ဒှ်ဂၠံင် မပၠကဵုတရဴ သွက်အနာဂတ်ဘဝဇကုရ။

ပရေင်လညာတ်သမ္တီမသၠဲလးဝွံ ဒှ်တၚ်နၚ် ဆေင်စပ်ကဵုပရောပရာမွဲရ။ ဇၟာပ်အခိင်နွံပၟိက်ဂှ် မၞုံကဵုဓဝ်ပတှ်ေ သွက်သ္ဂောံစကာနတဲ စပ်ကဵုလညာတ်သမ္တီတံဂှ်ရ။ ပ္ဍဲကဵုပရောပရာမွဲမွဲ ဂွံတီကေတ် ဓဝ်ဍာံ ကဵု ဒဒှ်ဍာံ ဗွဲမကၠးဖ္ဍးမာန်ရ။ ဟိုတ်နူလညာတ်သမ္တီသၠဲလးတုဲ ကာလဒးရေင်တၠုင် ကမၠောန်မွဲမွဲမ္ဂး သာ်လဵုသ္ဂောံကၠောန်ရောဂှ် တီကေတ်သဘဴဓဝ် ဆေင်စပ်ကဵု ဓဝ်ဍာံရ။

ညးမၞုံကဵုလညာတ်သမ္တီသၠဲလးဂှ် နကဵုအကာဲအရာသာ်လဵုဒှ်ဒှ် နကဵုအလဵုဉာဏ်ဇကုဇကု ဒတူလိုင်မာန်ရ။ ညးနွံပၟိက် သၟိက်မိက်ဂွံက္လိဂွံမံင် ပညာတီ (လညာတ်သမ္တီသၠဲလး) မ္ဂး မ္ဒးလုပ်လ္ၚတ်ကေတ် ချိုတ်တ်ပၠိုတ်တ် ပ္ဍဲပရောပရာ ဇကုစိုတ်မလုပ်စမွဲမွဲဂှ်ရောင်။ ပ္ဍဲဘဝမၞိဟ်ပိုဲတံဂှ် ပရေင်ကတ်လ္ၚတ်ဗ္တောန်ဟီုမ္ဂး သ္ပပတံနူကတဵုဒှ်ကၠုင်မၞိဟ်တုဲ စဵုကဵုစုတိတေံ ပၟိက်ဇၞော်မံင်လၟိုန်ကာလရ။ လညာတ်ဉာဏ်ပညာ မက္လိဂွံလဝ်တံဂှ် ရပ်စပ်စကာအာ ဗွဲမစှ်ေကဵု ဗၞတ်ဗ္ၜတ်မာန်မ္ဂး ဂွံဒုင်ယၟုညးမၞုံကဵုပညာရောင်။

ပညာတီ ကဵု ဉာဏ်ပညာဂှ် သဘဴသဘာဝဍေံ ၜိုန်ရဟွံတုပ်ကီုလေဝ် နကဵုမွဲသာ်ဓဝ် ဗွဲတၞဟ်ခြာ တန်တဴဂွံဟွံသေင်ရ။ မွဲကဵုမွဲ ဗွဲမဂတးဂတန် မ္ဒးဗ္ဒဗ္ဒါဲ စ္ၜုဲစ္ၜော်ရေင်သ္ကံနွံရ။ ဉာဏ်ပညာ ကဵု လညာတ်သမ္တီဂှ် သွက်ဘဝမၞိဟ်မွဲမွဲ ဟွံမွဲဟွံတုဲ ပၟိက်ဇၞော်မံင်လၟိုန်တုဲ သွက်သ္ဂောံရပ်စပ်စကာအာ ပညာတီဂှ် ဉာဏ်ပညာသ္ဒးနွံရောင်။ ဉာဏ်ပညာဂှ်လေဝ် ပါ်ကရေက်ပတိတ် တင်နင်ပ္ဍဲဍေံနာနာသာ် ဒးမာန်ရောင်ဂှ် ပၟိက်ဇၞော်မံင်တုဲ မ္ဒးရေင်တၠုင်အာ နကဵုအရီုအဗင် လညာတ်သမ္တီ (ပညာတီ) ဂှ်ရောင်။

ကာလပစ္စုပ္ပန်ဏံ နဲကဲပညာတင်နင် ဇၞော်မောဝ်ဖောအ်ဗြေဝ်တောတက်ကၠုင်ဒၟံင်တုဲ ညးမဂၠိုက်ဂၠာဲလ္ၚတ် လညာတ်သမ္တီ ကေုာံ သုတေသဳဂမၠိုင်တံ သၟိက်မိက်ဂွံတီတံဂှ် ဟွံဒးအာကျောဝ် ပ္ဍဲတိုက်ရံင်လိက်မွဲသာ် လုပ်ပံက်ကျောဝ်ဂၠာဲကေတ် ပ္ဍဲကဵုဝေပ်သာ် ဝဳကဳဗဳဒဳယာ (Wikipedia) မာန်ရ။ ဝဳကဳဗဳဒဳယာ (Wikipedia) ဟီုမ္ဂးဂှ် ဒှ်ပြကိုဟ်လိက်ပတ်ဇၞော် မၞိဟ်ဗွဲမဂၠိုင် ပံင်ကောံတုဲ လုပ်ချူဆန်လဝ်ရ။ ပြကိုဟ်ဗိသ္တာ ဝဳကဳဗဳဒဳယာ (Wikipedia) ဂှ် နူကဵုသၞာံ ၂၀၀၁ ၊ ဂိတုဂျာန်ဏဝါရဳ ၁၅ တေံ ရန်တၟံကဵု သွက်သ္ဂောံပကောံပကေဝ် ဗဟုသုတဂမၠိုင် နကဵုဘာသာစုင်တုဲ ဂျင်မဳဝေလ် ကေုာံ လာရဳဇြာမ်ဂါတံ စပတန်လဝ်တုဲ လၟုဟ်မ္ဂး အာယုက်ပေင်ကၠုင် ၂၄ သၞာံရ။

ဝဳကဳဗဳဒဳယာ (Wikipedia) ဂှ် ဒှ်လိက်လပှ်ကျာ မၞုံကဵုတင်နင်နိဿဲဍာံပြတုဲ ဒှ်လိက်မၞိဟ်ဂမၠိုင် ဒးဂၞပ်စိုတ်ရ။ ဒှ်လိက်ဘာသာဇဳ ၃၀၉ ဘာသာနွံတုဲ အပံင်လိက်ပရေင် ၅၆ ပြကောဋိကိုဋ်ပိုဒ်ရ။ ဟိုတ်ဂှ်ရ ဝဳကဳဗဳဒဳယာ (Wikipedia) ဂှ် ဒှ်ဒၞါဲညးမၞုံပၟိက်ကဵုပညာ လညာတ် ဉာဏ်သမ္တီတံ မ္ဒးလုပ်ဂၠာဲ ဗ္ဒဗ္ဒါဲ လညာတ်ဉာဏ်ပညာ ဗဟုသုတမွဲဒၞါဲရ။ ပ္ဍဲဝဳကဳဗဳဒဳယာ (Wikipedia) ဂှ် ဗီုတင်ခိုဟ်နွံဂှ် ဟိုတ်နူမၞိဟ်တှ်ေတုဲ လုပ်ချူပလေဝ်မာန်ဂှ်ရ တင်ၜတ်ကၞတ်လေဝ် နွံတဴဒၟံင်ကီုရ။

ၜိုန်ဂှ်လေဝ် ဝဳကဳဗဳဒဳယာ (Wikipedia) ဂှ် မၞုံကဵုတင်နင်နိဿဲဍာံပြခိုင်ကၠိုက်ဂၠိုင်တုဲ ဝေပ်သာ် မၞိဟ်ဂမၠိုင်ဒးစိုတ် အလုံဂၠးတိမွဲ နွံဒၟံင် ဝေပ်သာ် ၅၀ ဂှ် ဝဳကဳဗဳဒဳယာ (Wikipedia) ဂှ် ပါလုပ်လၟိဟ် နကဵုအဆံင်လၟေင် ၁၃ ရ။ ခေတ်ကာလဏံ ဒှ်ခေတ်ပညာတုဲ သွက်သ္ဂောံက္လိဂွံတင်နင် ဇကုနွံပၟိက်တံမာန်ဂှ် က္ဍိုပ်ပရောပရာ ဇကုမိက်ဂွံတီဂှ် နကဵုအရီုအဗင် အေန်တာနေတ် လုပ်ကျောဝ်ဗဵုကေတ် ပ္ဍဲကဵုဝဳကဳဗဳဒဳယာ (Wikipedia) နကဵုဘာသာဇဳ မွဲချိုန်ခဏဓဝ်ဂှ် တီကေတ်မာန်ရ။

ဟိုတ်ဒှ်သာ်ဂှ်တုဲ ပွမဗှ်လိက် နူကဵုအေန်တာနေတ်ကီုဒှ်၊ နူကဵုလိက်အုပ်ကီုဒှ် ပညာဗဟုသုတ ဇၞော်မောဝ်ဖောအ်ဗြေဝ်တိုန်တုဲ ဒှ်ဂုဏ်ဖဵု သွက်အနာဂတ်၊ သွက်ပစ္စုပ္ပန် ဘဝဇကုရ။ ဟိုတ်နူဗှ်လိက်တုဲ လညာတ်ဉာဏ်သၠဲလးကၠုင်ဂှ်ရ ဒှ်အထံက်အရီုကဵုကမၠောန် လွဳလမျီုဇကုရ။ ဉာဏ်ချပ်ဗ္စာရဏာ ကြံင်ဍုဟ်ကၠုင်တုဲ က္လိဂွံပရေင်ဘဝ မတောတက် ဇၞော်မောဝ်ဖောအ်ဗြေဝ်ရောင်။ ဟိုတ်ဂှ်ရ ဇၟာပ်မၞိဟ် သၠုင်ပတိုန်အဆံင်ဘဝဇကု နကဵုပွမဗှ်လိက်အိုတ်ညိဂှ် ဗတိုက်ဖအောဝ်ဏာ နကဵုလိက်ဝွံရအဴ။